Kapitulo 30

Ginbaton an mga Nag-aakusar

HAN gin-akusaran hi Jesus han Judio nga mga lider han relihiyon nga nagtatalapas hiya han Sabbath, binaton hiya: “An akon Amay padayon nga nagbubuhat tubtob yana, ngan ako liwat padayon nga nagbubuhat.”

Kabaliktaran han ira akusasyon, an ginbuhat ni Jesus diri supak ha balaud han Sabbath. An iya pagsangyaw ngan panambal toka han Dios, ngan ginbubuhat niya ito kada adlaw sugad nga pagsubad ha Dios. Kondi tungod han iya baton, dinugang an kasina han mga Judio, salit gin-ikaparatay hiya. Kay ano?

Tungod kay labot la nga natoo hira nga gintatalapas ni Jesus an Sabbath, gintagad liwat nira nga pasipara an iya pag-angkon nga Anak hiya han Dios. Kondi waray mahadlok hi Jesus ngan padayon nga nagsumat han iya maopay nga relasyon ha Dios. “Pinalangga han Amay an Anak ngan ginpapakita ha iya an ngatanan nga Iya ginbubuhat,” siring niya.

“Ginbabanhaw han Amay an mga patay ngan gintatagan hira hin kinabuhi, salit gintatagan liwat han Anak hin kinabuhi adton karuyag niya tagan,” siring ni Jesus. Ha pagkamatuod, ginbabanhaw na han Anak an mga patay ha espirituwal! “An namamati han akon pulong ngan natoo ha nagsugo ha akon,” siring niya, “pariho . . . hin tawo nga namatay ngan buhi na yana.” Hiya nagdugang: “Maabot an oras, ngan yana na, nga an mga patay makakabati han tingog han Anak han Dios, ngan an mga naghatag hin atensyon mabubuhi.”

Bisan kon hito nga panahon waray pa hi Jesus literal nga ginbanhaw, ginsumatan niya an mga nag-aakusar ha iya nga magkakaada literal nga pagkabanhaw. “Ayaw kamo kahipausa hini,” siring niya, “kay maabot an oras nga an ngatanan nga aadto ha handumanan nga mga lubnganan makakabati han iya tingog ngan mababanhaw.”

Hito pa gud la nga takna dayag nga nagsumat hi Jesus han iya importante nga papel ha katuyoan han Dios hin sugad kaklaro ngan kaprangka. Pero mahitungod hito, damu na an nahibaroan han mga nag-aakusar ha iya kay han iya mismo pamatuod ha ira. “Nagsugo kamo hin mga tawo ngadto kan Juan,” nagpahinumdom hi Jesus, “ngan nagsumat hiya han kamatuoran.”

Duha pa la ka tuig an naglabay, ginsumatan ni Juan nga Parabaptis ito nga mga lider han relihiyon mahitungod han Usa nga makanhi sunod ha iya. Ginpahinumdom hira ni Jesus han ira hadto hitaas nga pagtagad kan Juan nga priso yana. Nagsiring hiya: “Ha halipot nga panahon nalipay gud kamo han iya lamrag.” Iginpahinumdom ito ni Jesus kay naglalaom hiya nga mabubuligan hira nga matalwas. Pero diri la hiya nakadepende ha pamatuod ni Juan.

“Ini nga mga buruhaton nga akon ginbubuhat [lakip an milagro nga iya pa la ginhimo], nagpapamatuod nga an Amay an nagsugo ha akon.” Labot hito, siring ni Jesus: “An Amay mismo nga nagsugo ha akon nagpapamatuod mahitungod ha akon.” Pananglitan, ha bawtismo ni Jesus, an Dios nagpamatuod mahitungod ha iya, nga nasiring: “Ini an akon Anak nga hinigugma.”

An mga nag-aakusar kan Jesus waray gud rason nga isalikway hiya. An Kasuratan mismo nga siring nira nga ira gin-aadman nagpapamatuod mahitungod ha iya! “Kon natoo kamo kan Moises matoo liwat kamo ha akon,” nagsiring hi Jesus, “kay nagsurat hiya mahitungod ha akon. Pero kon diri kamo natoo ha iya mga sinurat, paonan-o kamo matoo ha akon mga pulong?” Juan 5:17-47; 1:19-27; Mateo 3:17.

▪ Kay ano nga diri supak ha Sabbath an ginbuhat ni Jesus?

▪ Paonan-o iginsumat ni Jesus an iya importante nga papel ha katuyoan han Dios?

▪ Basi pamatud-an ni Jesus nga hiya an Anak han Dios, kan kanay pamatuod an iya gin-unabi?