Kapitulo 119

Gindara kan Anas, Katapos kan Caifas

NAKAGAPOS hi Jesus nga sugad hin kriminal han gindara hiya kan Anas, an maimpluwensya nga hitaas nga saserdote ha naglabay. Hi Anas an hitaas nga saserdote han an rabiniko nga mga magturutdo ha templo nahipausa ha 12 anyos nga hi Jesus. May mga anak hi Anas nga nagin hitaas nga saserdote, ngan yana an iya umagad nga hi Caifas an aada hito nga katungdanan.

Posible nga gindara anay hi Jesus ha balay ni Anas tungod han maiha nga pagin prominente niya ha kasaysayan ha relihiyon han mga Judio sugad nga punoan nga saserdote. Tungod hito nga paghapit kan Anas, nakahigayon an hitaas nga saserdote nga hi Caifas ha pagtirok han 71 nga membro han Sanhedrin, an korte suprema han mga Judio, ngan ha pagtirok hin buwa nga mga testigo.

Ginpakianhan hi Jesus han punoan nga saserdote nga hi Anas mahitungod han mga disipulo ngan han iya igintututdo. Pero binaton hi Jesus: “Nagyakan ako ha atubangan han mga tawo. Pirme ako nagtututdo ha sinagoga ngan ha templo, diin nagkakatirok an mga Judio; ngan waray ako igintatago ha iyo. Kay ano nga ginpapakianhan mo ako? Pakianhi an mga nakabati kon ano an akon ginyakan ha ira. Maaram gud hira han akon ginyakan.”

Tungod hito, gintampalo hi Jesus han usa han mga opisyal nga natindog hirani ha iya, ngan nagsiring: “Sugad ba hito an imo pagbaton ha punoan nga saserdote?”

Binaton hi Jesus: “Kon sayop an akon ginsiring, pamatud-i nga sayop ito; pero kon husto an akon ginsiring, kay ano nga gintampalo mo ako?” Katapos hini, ginpakadto ni Anas kan Caifas an nakagapos nga hi Jesus.

Hito nga takna, magkakatirok na an ngatanan nga punoan nga saserdote ngan an katigurangan ngan mga eskriba, oo, an bug-os nga Sanhedrin. Klaro nga didto hira magkakatirok ha balay ni Caifas. Supak gud ha balaud han mga Judio nga himoon an pagbista ha gab-i han Paskua. Pero waray ito makapugong ha maraot gud nga plano han mga lider han relihiyon.

Pipira ka semana na an naglabay, han ginbanhaw ni Jesus hi Lasaro, nagsarabot an mga membro han Sanhedrin nga kinahanglan patayon hiya. Ngan han naglabay nga duha ka adlaw, han Mierkoles, nagsarabot an mga lider han relihiyon nga arestuhon hiya ha malimbong nga paagi basi patayon. Hunahunaa la, ginsentensyahan na hiya antes hiya bistahon!

Namimiling hira yana hin mga testigo nga magpapamatuod hin buwa basi makasohan hi Jesus. Pero waray hira mabilngan nga mga testigo nga nagkakauruyon an testimonya. Waray pag-iha, may duha nga inabot ngan nagsiring: “Hinbatian namon hiya nga nagyakan, ‘Bubungkagon ko ini nga templo nga ginhimo han mga kamot, ngan ha sulod hin tulo ka adlaw magtitindog ako hin iba nga diri hinimo han mga kamot.’”

“Waray ka ba ibabaton?” nagpakiana hi Caifas. “Ano an imo masisiring ha ira testimonya kontra ha imo?” Pero waray pagtingog hi Jesus. Bisan pa kon buwa ito nga akusasyon, waray la gihapon magkauruyon an testimonya han mga testigo, salit kaarawdan gud ito han Sanhedrin. Yana, iba nga taktika an gin-gamit han hitaas nga saserdote.

Maaram hi Caifas nga nasisina gud an mga Judio ha bisan hin-o nga nag-aangkon nga Anak han Dios. Ha naglabay, makaduha nira gintawag hi Jesus sugad nga parapasipara nga angay mamatay, han sayop nga naghunahuna hira nga nag-aangkon hiya nga katupong han Dios. Yana malimbong nga nagsugo hi Caifas: “Ginpapasumpa ko ikaw ha atubangan han buhi nga Dios nga magsumat ka han kamatuoran kon ikaw an Kristo, an Anak han Dios!”

Bisan ano pa an hunahunaon han mga Judio, hi Jesus amo gud an Anak han Dios. Ngan kon diri hiya mabaton, mahimo ito hunahunaon nga nagninigar hiya nga hiya an Kristo. Salit waray kahadlok nga binaton hiya: “Oo, ako, ngan makikita niyo an Anak han tawo nga nalingkod ha too han Usa nga Gamhanan, ngan napakanhi upod han mga dampog ha langit.”

Tungod hito gin-gisi ni Caifas an iya panapton, ngan nagsiring: “Nagpapasipara hiya ha Dios! Kinahanglan pa ba naton hin mga testigo? Kitaa! Iyo yana nabatian an iya pagpasipara. Ano an iyo masisiring?”

“Angay hiya patayon,” nagpahayag an Sanhedrin. Katapos, ginhimo nira nga pataraw-an hi Jesus, ngan damu an ira ginsiring nga nakakatamay ha iya. Ira gintampalo hiya ngan gintuprahan ha nawong. Gintahoban han iba an iya nawong, ginsuntok hiya, ngan nakakainsulto nga nagsiring: “Kristo, kon propeta ka, sumati kami, hin-o an nagsuntok ha imo?” Nahitabo ito nga ira pag-abuso ngan ilegal nga ginbuhat durante han pagbista ha gab-i. Mateo 26:57-68; 26:3, 4; Marcos 14:53-65; Lucas 22:54, 63-65; Juan 18:13-24; 11:45-53; 10:31-39; 5:16-18.

▪ Diin anay gindara hi Jesus, ngan ano an nahitabo ha iya didto?

▪ Ngain sunod gindara hi Jesus, ngan kay ano?

▪ Ano an ginbuhat ni Caifas basi maipahayag han Sanhedrin nga angay patayon hi Jesus?

▪ Ano nga pag-abuso ngan ilegal nga ginbuhat an nahitabo durante han pagbista?