Kapitulo 69

Gindiskusyonan kon Hin-o an Amay

HAN piyesta, nagin mas tensyonado an diskusyon ni Jesus ngan han Judio nga mga lider. “Maaram ako nga katulinan kamo ni Abraham,” siring ni Jesus, “pero karuyag niyo ako patayon, kay diri niyo ginkakarawat an akon pulong. Iginsusumat ko an akon mga nakita samtang kaupod ko an akon Amay; salit buhata niyo an nababatian niyo ha iyo amay.”

Bisan kon waray ngarani ni Jesus an ira amay, iginpatin-aw niya nga magkaiba an ira amay. Tungod kay diri maaram an Judio nga mga lider kon hin-o an ginhuhunahuna ni Jesus, binaton hira: “Hi Abraham an amon amay.” Para ha ira, an ira pagtoo pariho kan Abraham nga sangkay han Dios.

Kondi, kinalasan hira han baton ni Jesus: “Kon mga anak kamo ni Abraham, buhata niyo an mga buhat ni Abraham.” Oo, an totoo nga anak nasubad ha iya amay. “Pero karuyag niyo ako patayon,” siring ni Jesus, “usa nga tawo nga nagsusumat ha iyo han kamatuoran nga akon nabatian ha Dios. Waray ini buhata ni Abraham.” Salit nagsiring na liwat hiya: “Ginbubuhat niyo an mga buhat han iyo amay.”

Waray la gihapon nira masabti kon hin-o an ginsisiring ni Jesus. Nangatadongan hira nga lehitimo hira nga mga anak ni Abraham: “Waray kami ig-anak tungod ha imoralidad.” Nag-aangkon hira nga totoo hira nga magsiringba pariho kan Abraham, salit nag-insister hira: “May-ada kami usa nga Amay, an Dios.”

Pero an Dios gud ba an ira Amay? “Kon an Dios an iyo Amay,” siring ni Jesus, “hihigugmaon unta ako niyo, kay tikang ako ha Dios ngan aanhi ako pinaagi ha iya. Kinanhi ako diri ha akon la karuyag, kondi ginsugo ako han Dios. Kay ano nga diri niyo masabtan an akon ginyayakan?”

Iginpasabot ni Jesus ha mga lider han relihiyon an mga resulta han ira pagsalikway ha iya. Prangka nga nagsiring hiya: “Tikang kamo ha iyo amay nga Yawa, ngan karuyag niyo buhaton an mga hingyap han iyo amay.” Ano nga klase hin amay an Yawa? Gintawag hiya nga parapamatay, ngan nagsiring liwat hi Jesus: “Buwaon hiya ngan amay han kabuwaan.” Ini an konklusyon ni Jesus: “An tikang ha Dios namamati ha ginsisiring han Dios. Amo nga diri kamo namamati, kay diri kamo tikang ha Dios.”

Nasina hito an mga Judio salit binaton hira: “Diri ba tama an amon ginsiring nga Samaritano ka ngan may demonyo?” An pulong nga “Samaritano” ginagamit sugad nga pakaalo ngan pakaraot, kay nasisina an mga Judio ha mga Samaritano.

Ginbalewaray ni Jesus an pag-insulto ha iya han gintawag hiya nga Samaritano, salit nagsiring hiya: “Waray ako demonyo, ngan ginpapasidunggan ko an akon Amay, pero diri niyo ako ginpapasidunggan.” Ngan naghatag hi Jesus hinin diri katoohan nga saad: “An bisan hin-o nga nagtutuman han akon pulong, diri gud mamamatay.” Syempre, diri niya iginpapasabot nga an nasunod ha iya diri literal nga mamamatay. Lugod, iginpapasabot niya nga diri gud hira huhukman hin dayon nga kabungkagan, o “ikaduha nga kamatayon,” nga waray na pagkabanhaw.

Pero literal an pagsabot han mga Judio ha iya mga ginyakan. Nagsiring hira: “Maaram na kami yana nga may demonyo ka. Namatay hi Abraham ngan an mga propeta, pero nasiring ka, ‘An bisan hin-o nga nagtutuman han akon pulong, diri gud mamamatay.’ Mas importante ka ba kay ha amon amay nga hi Abraham? Patay na hiya sugad man an mga propeta. Hin-o ka ba ha imo paghunahuna?”

Hini nga diskusyon, iginpatin-aw ni Jesus ha ira nga hiya gud an iginsaad nga Mesias. Pero imbes nga batunon hin direkta an ira pakiana mahitungod han iya pangirilal-an, nagsiring hiya: “Kon ginhihimaya ko an akon kalugaringon, waray pulos an akon himaya. An akon Amay an naghihimaya ha akon, hiya nga iyo ginsisiring nga iyo Dios; pero diri kamo nakilala ha iya. Kondi kilala ko hiya. Ngan kon magsiring ako nga diri ko hiya kilala, magigin buwaon ako pariho ha iyo.”

Gin-unabi utro ni Jesus an matinumanon nga hi Abraham: “An iyo amay nga hi Abraham nalipay gud ha paglaom nga makita an akon adlaw; nakita niya ito ngan nalipay hiya.” Oo, pinaagi han pagtoo ni Abraham, ginpamulat niya an pag-abot han iginsaad nga Mesias. Diri hito makatoo an mga Judio, salit nagsiring hira: “Waray ka pa ngani mag-50 anyos, nakita mo na hi Abraham?”

“Ha pagkamatuod susumatan ko kamo,” binaton hi Jesus, “antes matawo hi Abraham, buhi na ako.” Syempre, an gin-uunabi niya amo an iya kinabuhi sugad nga gamhanan nga espiritu nga persona ha langit antes magin tawo.

Nasina an mga Judio ha ginsiring ni Jesus nga buhi na hiya antes pa matawo hi Abraham, salit namurot hira hin bato basi batuhon hiya. Pero tumago hiya ngan talwas nga nakagawas ha templo. Juan 8:37-59; Pahayag 3:14; 21:8.

▪ Paonan-o iginpatin-aw ni Jesus nga magkaiba an amay niya ngan an amay han iya mga kaaway?

▪ Kay ano nga hi Jesus gintawag nga Samaritano han mga Judio?

▪ Ano an kahulogan han ginsiring ni Jesus nga an iya mga sumurunod diri gud mamamatay?