Kapitulo 46

Ginkaptan an Panapton ni Jesus

NAHIBANTOG ha Capernaum nga mauli na hi Jesus tikang ha Decapolis. Salit damu nga tawo an nagtirirok ha baybay basi tapoon hiya. Sigurado nga nabatian nira nga ginpakalma niya an subasko ngan gintambal an kalalakin-an nga ginsaniban hin demonyo. Pag-abot niya ha baybayon, interesado gud ngan eksayted an mga tawo nga nakapalibot ha iya.

Usa han karuyag gud makigkita kan Jesus amo an punoan nga opisyal han sinagoga nga hi Jairo. Yinukbo hiya ha may tiil ni Jesus ngan nagpinakimalooy: “An akon daragita grabe an sakit. Alayon upod ha akon ngan kapti hiya basi mag-opay ngan diri mamatay.” Tungod kay ito la an iya anak ngan 12 anyos pa la, pinaura gud hiya ni Jairo.

Naruyag hi Jesus pagkadto ha balay ni Jairo, ngan inupod an damu nga tawo. Mahuhunahuna naton nga eksayted gud an mga tawo nga nagpapamulat hin usa pa nga milagro. Pero may babaye didto nga an ginhuhunahuna la an iya daku nga problema.

Dose ka tuig na hiya nga nag-iinantos hin pagdinugui. Nagpakadto na hiya ha iba-iba nga doktor, ngan naubos na an iya kwarta ha pagpatambal. Pero waray hiya mabuligi, nagdugang la lugod an iya problema.

Bangin nahuhunahuna mo nga labot la nga nakakapaluya gud an iya sakit, makaarawod ngan nakakawara liwat ito han dignidad. An may sugad hito nga sakit kasagaran nga diri dayag nga nag-iistorya mahitungod hito. Dugang pa, sumala ha Mosaiko nga Balaud mahugaw an gindidinugoan nga babaye, ngan bisan hin-o nga nakakapot ha iya o ha iya may dugo nga mga panapton kinahanglan kumarigo ngan magigin mahugaw tubtob ha gab-i.

Hinbatian hito nga babaye an mga milagro ni Jesus ngan ginpinamiling niya hiya. Tungod kay mahugaw hiya, waray niya ito ipaabat han sinuksok hiya ha mga tawo, ngan nagsiniring ha iya kalugaringon: “Bisan makaptan ko la an iya pantungbaw nga panapton mag-oopay na ako.” Han nakaptan niya ito, inabat dayon niya nga waray na hiya pagdinugui!

“Hin-o an kinapot ha akon?” Nahadlok gud hiya ha ginsiring ni Jesus! Paonan-o nahibaro hi Jesus? ‘Magturutdo,’ siring ni Pedro, ‘ginpapalibotan ngan ginsusuok ka han mga tawo, kay ano nga nagpapakiana ka, “Hin-o an kinapot ha akon?”’

Naglingi-lingi hi Jesus basi makita kon hin-o an kinapot ha iya, ngan nagsiring: “May kinapot ha akon, kay inabat ko nga may gahum nga ginawas ha akon.” Urusahon an resulta hito, kay nakatambal an gahum nga ginawas ha iya.

Pakasabot han babaye nga hinbaroan an iya ginbuhat, nahahadlok ngan nangungurog nga dinaop hiya kan Jesus ngan hinapa ha iya atubangan. Iginsumat niya ha atubangan han ngatanan nga tawo an bug-os nga kamatuoran mahitungod han iya sakit ngan han katambal pa la niya.

Tungod han ngatanan nga iya iginsumat, nalooy hi Jesus ngan ginliaw hiya: “Anak, tungod han imo pagtoo nag-opay ka. Lakat nga mamurayawon, ngan mag-opay ka ha imo grabe nga sakit.” Makalilipay gud hibaroan nga Hiya nga ginpili han Dios nga magmamando han tuna mahigugmaon ngan mapinairon, nagmamangno ha mga tawo ngan may gahum ha pagbulig ha ira! Mateo 9:18-22; Marcos 5:21-34; Lucas 8:40-48; Lebitiko 15:25-27.

▪ Hin-o hi Jairo, ngan kay ano nga kinadto hiya kan Jesus?

▪ Ano an problema han usa nga babaye? Kay ano nga makuri gud ha iya nga dumaop kan Jesus basi magpabulig?

▪ Paonan-o natambal an babaye, ngan paonan-o hiya ginliaw ni Jesus?