Kapitulo 109

Ginkondenar ni Jesus an mga Parakontra

NASUPLA gud ni Jesus an nakontra ha iya nga mga lider han relihiyon salit nahadlok hira pagpakiana pa ha iya. Tungod hito, hiya an nag-una ha pagpakiana basi ibuhayhag an ira kaignorante: “Ano an iyo paghunahuna mahitungod han Kristo? Kan kanay hiya anak?”

“Kan David,” binaton an mga Pariseo.

Waray magnigar hi Jesus nga hi David an kaapoy-apoyan han Kristo, o Mesias, pero nagpakiana hiya: “Kon amo, kay ano man nga pinaagi han giya han baraan nga espiritu, gintawag hiya ni David nga Ginoo [ha Salmo 110], nga nasiring, ‘Hi Jehova nagsiring ha akon Ginoo: “Lingkod ha akon too tubtob nga ibutang ko an imo mga kaaway ha ilarom han imo mga tiil”’? Salit kon gintawag hiya ni David nga Ginoo, paonan-o hiya nagin anak ni David?”

Waray makabaton an mga Pariseo, kay diri hira maaram han totoo nga pangirilal-an han Kristo, o han usa nga dinihogan. An Mesias diri la kay tulin ni David, sugad han posible nga gintotoohan han mga Pariseo, kondi nakadto na hiya nga daan ha langit ngan mas labaw hiya kan David, o hiya an iya Ginoo.

Yana ginpahamangnoan niya an mga tawo ngan an mga disipulo kontra ha mga eskriba ngan mga Pariseo. Tungod han ira pagtutdo han Balaud han Dios, hira “naglugaring paglingkod ha lingkoran ni Moises,” salit nagsagdon hi Jesus: “Buhata ngan tumana niyo an ngatanan nga ira ginsisiring, pero ayaw pagsubara an ira ginbubuhat, kay diri nira ginbubuhat an ira ginyayakan.”

Mga hipokrito hira, salit ginkondenar hira ni Jesus hin haros pariho han iya ginsiring samtang nakaon hiya ha balay han usa nga Pariseo pipira ka bulan na an naglabay. Nagsiring hiya: “Karuyag nira nga makita han mga tawo an ngatanan nga ira ginbubuhat.”

Katapos naghatag hiya hin mga ehemplo: “Ginpapadaku nira an gudtiay nga kahon nga surudlan han mga mensahe han Kasuratan nga ira iginsusul-ot sugad nga panalipod.” Iton gudtiay nga kahon nga iginhihigot ha ira agtang o butkon, may sulod nga upat nga bahin han Balaud: Eksodo 13:1-10, 11-16; ngan Deuteronomio 6:4-9; 11:13-21. Pero ginpapadaku han mga Pariseo ito nga mga kahon basi sidngon nga ginsusunod gud nira an Balaud.

Nagsiring pa hi Jesus nga ira “ginpapahalapad an sidsid han ira bado.” Ha Numeros 15:38-40, ginsugo an mga Israelita nga dugtongan hin tasel an sidsid han ira bado, pero mas halapad kay ha iba an igindudugtong han mga Pariseo. Pakita la ito ngatanan! “Naruruyag hira lumingkod ha pinakamaopay nga pwesto,” siring ni Jesus.

Makasurubo nga an mga disipulo mismo ni Jesus naimpluwensyahan han hingyap nga magin prominente. Salit nagsagdon hiya: “Ayaw kamo pagpatawag nga Rabbi, kay usa la an iyo Magturutdo, ngan kamo ngatanan magburugto. Diri liwat niyo tawagon nga amay an bisan hin-o ha tuna, kay usa la an iyo Amay nga aadto ha langit. Ngan ayaw kamo pagpatawag nga mga lider, kay usa la an iyo Lider, an Kristo.” Kinahanglan isalikway han mga disipulo an hingyap nga magin siyahan! Nagsagdon hi Jesus: “An may daku nga awtoridad ha iyo, sadang magin surugoon niyo.”

Katapos, sunod-sunod nga iginpahayag niya nga kairo han mga eskriba ngan mga Pariseo, ngan pauroutro nga gintawag hira nga hipokrito. Ira “ginsasadhan an Ginhadian han langit ha mga tawo,” siring niya, ngan “gin-aagaw nira an mga balay han mga balo nga babaye ngan nag-aampo hin higlaba pero pakita la.”

“Kairo niyo, mga buta nga paratugway,” siring niya. Ginkondenar niya an mga Pariseo kay diri uyon ha katutdoan han Dios an ira igintututdo, sugad han ira waray basihan nga mga surundon. Pananglitan, nasiring hira, ‘Bisan hin-o nga nagsusumpa pinaagi han templo, diri nakakasayop bisan kon diri niya ito tumanon, pero obligado hiya nga tumanon ito kon nagsusumpa hiya pinaagi han bulawan ha templo.’ Tungod kay mas importante ha ira an bulawan ha templo kay ha espirituwal nga kapulsanan hito nga lugar han pagsingba, naipapakita nira nga mga buta hira o diri maaram kon ano an husto o sayop.

Katapos, sugad han ginhimo pa la ni Jesus, ginkondenar niya an mga Pariseo kay ira ginbabalewaray “an mas importante nga mga sugo han Balaud, sugad han hustisya, kalooy, ngan pagkamatinumanon,” lugod mas importante ha ira an paghatag hin ikanapulo han diri importante nga mga tanom.

Gintawag ni Jesus an mga Pariseo nga ‘mga buta nga paratugway, nga ginsasarà an tagnok pero gintutulon an kamel!’ Ginsasarà nira an tagnok ha ira bino diri la tungod kay insekto ito kondi kay mahugaw ito sumala ha Balaud. Pero an ira pagbalewaray ha mas importante nga mga sugo han Balaud maipapariho ha pagtulon hin kamel nga mahugaw liwat sumala ha Balaud. Mateo 22:41–23:24; Marcos 12:35-40; Lucas 20:41-47; Lebitiko 11:4, 21-24.

▪ Kay ano nga waray makabaton an mga Pariseo han nagpakiana ha ira hi Jesus mahitungod han ginsiring ni David ha Salmo 110?

▪ Kay ano nga ginpapadaku han mga Pariseo an ira kahon nga surudlan han mga mensahe han Kasuratan ngan ginpapahalapad an tasel han ira bado?

▪ Ano an iginsagdon ni Jesus ha iya mga disipulo?

▪ Ano an waray basihan nga mga surundon han mga Pariseo? Paonan-o hira ginkondenar ha pagbalewaray han mas importante nga mga sugo?