Kapitulo 44

Ginpakalma an Subasko

DAMU an ginbuhat ni Jesus ha bug-os nga adlaw, upod na an pagtutdo ha damu nga tawo ha baybayon ngan an pag-esplikar han mga ilustrasyon ha iya mga disipulo. Han tikagab-i na, hiya nagsiring: “Kadto kita ha tabok nga baybayon.”

Ha este nga baybayon han Dagat han Galilea nahimumutang an rehiyon han Decapolis, tikang ha Griego nga deʹka, nangangahulogan nga “napulo,” ngan poʹlis, nangangahulogan nga “syudad.” An mga syudad han Decapolis amo an sentro han Griego nga kultura, bisan kon damu liwat nga Judio an naukoy didto. Pero gutiay la an nahimo didto ni Jesus. Bisan hini nga iya pagkadto, waray hiya mag-iha kay may nakapugong ha iya, sugad han aton hibabaroan.

Han naghangyo hi Jesus nga tumabok ha luyo nga baybayon, sinakay hiya ngan an mga disipulo ha daku nga baluto. Pero may nakakita han ira paglarga. Sinakay dayon an iba ha ira mga baluto ngan sinunod. Diri gud hirayo an pagtabok. An Dagat han Galilea linaw la nga daku nga mga 21 ka kilometro an kahilaba ngan 12 ka kilometro an kahilapad.

Sigurado nga ginkakapoy gud hi Jesus. Salit han nagbibiyahe na hira, hinigda hiya ha ulin han baluto, ngan nahingaturog dayon. An iba han mga apostol eksperyensyado nga parapanagat, kay parapangisda hira hadto ha Dagat han Galilea. Salit hira an nagmaniobra han baluto.

Pero magigin makuri ito nga biyahe. Tungod han mas mapaso nga temperatura ha bawbaw han linaw, nga mas ubos hin 210 metros kay ha lebel han dagat, ngan han mas mahagkot nga hangin tikang ha kabukiran, usahay nahuyop tipaubos an magkusog nga hangin nga hinungdan han tigda nga subasko. Ini an nahitabo. Waray pag-iha, an baluto ginpupusakan hin dagku nga balud, salit hirani na ito malunod. Pero nagkikinaturog la hi Jesus!

An eksperyensyado nga mga parapanagat natatarantar ha pagmaniobra han baluto. Sigurado nga nakaeksperyensya na hira hin mga subasko hadto. Pero yana, ginhimo na nira an ngatanan nga ira mahihimo. Tungod ha kahadlok nga namimeligro na hira, ginpukaw nira hi Jesus. ‘Ginoo, diri ka ba nababaraka? Malulunod na kita!’ ginuliat hira. ‘Talwasa kami, kay malulumos na kami!’

Binuhat hi Jesus ngan ginsugo an hangin ngan dagat: “Husto na! Maglinaw ka!” Nagluya an hangin ngan nagkalma an dagat. Katapos nagsiring hiya ha mga disipulo: “Kay ano nga nahahadlok kamo? Waray pa ba kamo pagtoo?”

Salit nahadlok gud an mga disipulo. ‘Hin-o gud ba ini nga tawo,’ nagpakianahay hira, ‘kay ginsusugo niya bisan an hangin ngan an tubig, ngan nasugot ito ha iya?’

Urusahon gud nga gahum an iginpakita ni Jesus! Makakasarig gud kita nga an aton Hadi may gahum ha natural nga mga elemento ngan kon mandoan na niya an tuna durante han iya paghadi ha Ginhadian, an ngatanan magkikinabuhi nga may seguridad kay waray na makaharadlok nga natural nga mga kalamidad!

Waray pag-iha katapos nga nagkalma an subasko, talwas nga nakaabot hi Jesus ngan an mga disipulo ha este nga baybayon. Bangin an iba nga mga baluto nakatalwas liwat ha makusog nga subasko ngan nakauli. Marcos 4:35–5:1; Mateo 8:18, 23-27; Lucas 8:22-26.

▪ Ano an Decapolis? Diin ito nahimumutang?

▪ Ano an hinungdan han magkusog nga subasko ha Dagat han Galilea?

▪ Han waray na mahihimo an mga disipulo basi matalwas hira, ano an ira ginbuhat?