Kapitulo 28

Ginpakianhan Mahitungod han Pagpuasa

HAROS usa ka tuig na tikang nga kinadto hi Jesus ha selebrasyon han Paskua han 30 C.E. Hi Juan nga Parabaptis pipira ka bulan na yana nga priso. Bisan kon karuyag niya nga an iya mga disipulo magin sumurunod han Kristo, diri ngatanan nagin sumurunod.

An iba nga disipulo ni Juan kinadto kan Jesus ngan nagpakiana: “Kay ano nga kami ngan an mga Pariseo nagpupuasa pero an imo mga disipulo diri nagpupuasa?” An mga Pariseo nagpupuasa duha ka beses kada semana sugad nga rituwal han ira relihiyon. Bangin ginbubuhat liwat ito han mga disipulo ni Juan. Posible nga nagpupuasa hira tungod han kasubo ha kapriso ni Juan, ngan diri nira masabtan kon kay ano nga an mga disipulo ni Jesus diri nakikisimpatiya han ira kasub-anan.

Hi Jesus binaton: “An kasangkayan han karaslon nga lalaki waray rason nga masubo mentras kaupod nira hiya, diri ba? Pero maabot an panahon nga an karaslon nga lalaki kukuhaon ha ira, ngan dida hito magpupuasa hira.”

Angay hinumdoman han mga disipulo ni Juan nga hi Jesus amo an Karaslon nga Lalaki sumala ha ginsiring mismo ni Juan. Salit samtang aada pa hi Jesus, para kan Juan diri hiya angay magpuasa, sugad man an mga disipulo ni Jesus. Han namatay hi Jesus, nasubo ngan nagpuasa an iya mga disipulo. Pero han ginbanhaw hiya ngan sinaka ha langit, waray na hira hinungdan nga magpuasa tungod ha kasubo.

Katapos nagsaysay hi Jesus hin mga ilustrasyon: “Waray nagtatangkop hin bag-o nga tela ha daan nga pantungbaw nga panapton, kay pagkuro hini madugang la kagisi an gintangkopan. Waray liwat nagsusulod hin bag-o nga bino ha daan nga anit nga surudlan, kay mabuburit ito ngan makakarag an bino. Lugod, an bag-o nga bino iginsusulod ha bag-o nga anit nga surudlan.” Ano an koneksyon hini ha pagpuasa?

Ginbuligan ni Jesus an mga disipulo ni Juan nga Parabaptis basi makasabot nga waray sadang mag-obligar ha mga sumurunod ni Jesus nga magtuman han mga tradisyon han Judaismo, sugad han pagpuasa. Waray hiya kumanhi basi tangkopan ngan ipadayon an daan ngan liriwanan na nga sistema han pagsingba. An Kristianidad diri mahimo ipahiuyon ha Judaismo ngan ha mga tradisyon hito nga hinimo han tawo. Diri ito puydi, pariho han bag-o nga tela nga diri puydi itangkop ha daan nga tela, o han bag-o nga bino nga diri puydi isulod ha daan nga anit nga surudlan. Mateo 9:14-17; Marcos 2:18-22; Lucas 5:33-39; Juan 3:27-29.

▪ Hin-o an mga nagpupuasa, ngan tungod ha ano?

▪ Kay ano nga diri nagpupuasa an mga disipulo ni Jesus samtang kaupod nira hiya? Kay ano nga hirani na mawara an hinungdan ha pagpuasa?

▪ Ano nga mga ilustrasyon an iginsaysay ni Jesus, ngan ano an kahulogan hito?