Kapitulo 2

Ginpasidunggan Antes Matawo

KATAPOS sumatan han anghel nga hi Gabriel an daraga nga hi Maria nga manganganak hiya hin lalaki nga magigin hadi ha waray kataposan, hi Maria nagpakiana: “Paonan-o ini mahitatabo nga waray man ako bana?”

Hi Gabriel nagsaysay: “An baraan nga espiritu maabot ha imo ngan an gahum han Gihitaasi malandong ha imo. Tungod hito, ini nga matatawo tatawagon nga baraan ngan Anak han Dios.”

Basi buligan hi Maria nga tumoo ha mensahe, hi Gabriel nagsiring: “An imo paryente nga hi Elizabeth unom ka bulan na yana nga burod, bisan kon lagas na ngan nasiring an mga tawo nga baog hiya, kay waray kapahayagan han Dios nga diri matutuman.”

Tinoo hi Maria ha ginsiring ni Gabriel. Ano an iya reaksyon? Hiya nagsiring: “Iini ako, an kan Jehova uripon nga babaye! Matuman unta ha akon an imo ginsiring.”

Han pagbaya ni Gabriel, nag-andam hi Maria basi bisitahon hi Elizabeth, nga kaupod han iya bana nga hi Sakarias, ha bukiron nga distrito han Judea. Tikang ha balay ni Maria ha Nazaret, maiha ito nga biyahe nga bangin mga tulo o upat ka adlaw.

Pag-abot ni Maria ha balay ni Sakarias, sinulod hiya ngan nangumusta. Hi Elizabeth napuno han baraan nga espiritu ngan nagsiring kan Maria: “Darayawon ka ha ngatanan nga kababayin-an, ngan darayawon an bunga han imo tiyan! Kay ano nga nagkaada ako hini nga pribilehiyo nga bisitahon han nanay han akon Ginoo? Kay pakabati ko han imo pangumusta, an bata ha akon tiyan nagkiwa tungod han daku nga kalipay.”

Pakabati hini ni Maria, kinasingkasing nga nagpasalamat hiya: “Gindadayaw ko hi Jehova, ngan diri mapugngan han akon kasingkasing an daku nga kalipay ha Dios nga akon Paratalwas, tungod kay nakita niya an ubos nga kahimtang han iya uripon nga babaye. Ngan tikang yana tatawagon ako nga malipayon han ngatanan nga henerasyon kay an gamhanan nga Dios nagbubuhat hin mga urusahon para ha akon.” Pero bisan pa han pag-uyon nga iginpakita kan Maria, iginhatag niya an ngatanan nga kadayawan ha Dios. “Baraan an iya ngaran,” nagsiring hiya, ngan “ha ngatanan nga panahon nagpapakita hiya hin kalooy ha mga nahahadlok ha iya.”

Hi Maria padayon nga nagdayaw ha Dios pinaagi hin giniyahan ngan matagnaon nga kanta, nga nasiring: “Naghihimo hiya hin gamhanan nga mga buhat pinaagi han iya butkon, ngan iya ginpapapatlaag ha higrayo nga lugar an mga mapahitas-on an kasingkasing. Iya ginpapalusad tikang ha mga trono an gamhanan nga mga tawo ngan ginpapahitaas an mga ubos, iya ginbubusog hin mag-opay nga butang an mga nagugutom, ngan ginpapabaya nga waray dara an mga rikohanon. Ginbubuligan niya an Israel nga iya surugoon basi ipakita an kalooy ha kadayonan, sugad la han iya ginsiring ha aton kaapoy-apoyan, kan Abraham ngan ha iya katulinan.”

Inukoy hi Maria kanda Elizabeth hin tulo ka bulan, ngan sigurado nga nakabulig gud hiya durante han ultimo nga mga semana han pagburod ni Elizabeth. Maopay gud nga inin duha nga matinumanon nga babaye nga pariho burod ha bulig han Dios, magkaupod hinin makalilipay nga panahon ha ira kinabuhi!

Naobserbaran mo ba an pagpasidungog kan Jesus bisan waray pa hiya matawo? Gintawag hiya ni Elizabeth nga “akon Ginoo,” ngan an iya iginbuburod nagkiwa tungod ha kalipay han pag-abot ni Maria. Ha luyo nga bahin, waray respetoha han iba hi Maria ngan an iya magigin anak, sugad han aton mahibabaroan. Lucas 1:26-56.

▪ Ano an ginsiring ni Gabriel basi buligan hi Maria nga masabtan kon paonan-o hiya magbuburod?

▪ Paonan-o ginpasidunggan hi Jesus antes hiya matawo?

▪ Ano an ginsiring ni Maria ha matagnaon nga kanta ha pagdayaw ha Dios?

▪ Pira ka bulan nag-ukoy hi Maria kanda Elizabeth? Kay ano nga angayan la nga nag-ukoy hiya didto hito nga panahon?