Kapitulo 51

Ginpatay ha Birthday

KATAPOS tagan ni Jesus hin instruksyon an mga apostol, iya ginpadis-padis hira ngan ginpakadto ha teritoryo. Posible nga magkaupod an magbugto nga hira Pedro ngan Andres, sugad man hira Santiago ngan Juan, Felipe ngan Bartolome, Tomas ngan Mateo, Santiago ngan Tadeo, ngan Simon ngan Judas Iscariote. Inin unom ka padis nga ebanghelisador nagpasamwak han maopay nga sumat han Ginhadian ngan milagroso nga nanambal bisan diin hira kumadto.

Priso pa gihapon hi Juan nga Parabaptis hin haros duha ka tuig na. Ginbuhayhag niya hadto ha publiko nga sayop nga asawahon ni Herodes Antipas hi Herodias nga asawa ni Felipe nga iya bugto. Tungod kay nasiring hi Herodes nga ginsusunod niya an Mosaiko nga Balaud, husto la nga ginbuhayhag ni Juan ito nga pag-adulteryo. Salit iginpapriso niya hi Juan, bangin tungod han pagsulsol ni Herodias.

Maaram hi Herodes nga hi Juan matadong nga tawo ngan nalilipay pa ngani hiya pagpinamati ha iya. Salit diri hiya maaram han iya bubuhaton kan Juan. Pero hi Herodias nasisina kan Juan ngan karuyag niya nga ipapatay hiya. Yana, nagkaada higayon hi Herodias nga buhaton ito.

Antes han Paskua han 32 C.E., nag-andam hi Herodes hin engrande nga selebrasyon han iya birthday. Nakadto an ngatanan niya nga opisyal nga hitaas an ranggo, mga kumander ha militar, ngan mga prominente ha Galilea. Hito nga gab-i, ginpasayaw ha atubangan han mga bisita hi Salome nga daraga nga anak ni Herodias ha iya asawa hadto nga hi Felipe. Naruyag gud hito an kalalakin-an nga bisita.

Nalipay gud hi Herodes kan Salome. “Aroa ha akon an bisan ano nga imo karuyag, ngan ihahatag ko ito ha imo,” siring niya. Nagsaad pa ngani hiya: “Bisan ano nga aroon mo ha akon, ihahatag ko ha imo, bisan an katunga han akon ginhadian.”

Antes bumaton hi Salome, ginawas anay hiya ngan nagpakiana ha iya nanay: “Ano an akon aaroon?”

Higayon na ini! Binaton dayon hi Herodias: “An ulo ni Juan nga Parabaptis.”

Kinadto dayon hi Salome kan Herodes ngan nagsiring: “Karuyag ko nga ihatag mo dayon ha akon ha bandihado an ulo ni Juan nga Parabaptis.”

Nasubo gud hito hi Herodes. Pero naawod hiya nga igbalewaray ito kay nakagsaad na hiya ha atubangan han mga bisita, bisan kon patayon an inosente nga tawo. Ginpakadto dayon niya ha prisohan an magpapatay nga gintagan hin makangingirhat nga sugo. Waray pag-iha, binalik an nagpatay nga dara an ulo ni Juan nga iginbutang ha bandihado, ngan iginhatag ito kan Salome. Katapos iginhatag ito han daraga ha iya nanay. Han hinbaroan han mga disipulo ni Juan an nahitabo, kinadto hira ngan ginkuha an iya lawas ngan iginlubong ito. Katapos ginsumatan nira hi Jesus han nahitabo.

Han hinbatian ni Herodes nga nananambal hi Jesus ngan nagpapagawas hin mga demonyo, nahadlok hiya kay naghunahuna hiya nga hi Jesus amo hi Juan nga ginbanhaw. Salit karuyag gud niya nga makita hi Jesus, diri basi mamati ha iya pagsangyaw, kondi basi hibaroan kon may hinungdan an iya kahadlok o waray. Mateo 10:1-5; 11:1; 14:1-12; Marcos 6:14-29; Lucas 9:7-9.

▪ Kay ano nga napriso hi Juan, ngan kay ano nga diri karuyag ni Herodes nga ipapatay hiya?

▪ Paonan-o nagkaada higayon hi Herodias nga ipapatay hi Juan?

▪ Han patay na hi Juan, kay ano nga karuyag ni Herodes nga makita hi Jesus?