Kapitulo 42

Ginsaway an mga Pariseo

HI Jesus nangatadongan nga kon nagpapagawas hiya hin mga demonyo pinaagi ha gahum ni Satanas, kon sugad nababahin hi Satanas. “Kon maopay ka nga kahoy, magbubunga ka hin maopay,” siring niya. “Pero kon maraot ka nga kahoy, magbubunga ka hin maraot. Ha bunga makikita kon an kahoy maopay o diri.”

Kalurongan an pag-akusar nga an maopay nga bunga, sugad han pagpagawas hin mga demonyo, nahimo ni Jesus kay nag-aalagad hiya kan Satanas. Kon maopay an bunga, syempre diri maraot an kahoy. Kondi an maraot nga bunga sugad han linurong nga mga akusasyon ngan waray basihan nga pagkontra han mga Pariseo kan Jesus, nagpapamatuod nga maraot hira. Hi Jesus nagsiring: “Katulinan han mga halas, paonan-o kamo makakayakan hin maopay kon maraot kamo? Kay kon ano an aada ha kasingkasing amo an nagawas ha baba.”

An aton ginyayakan nagpapakita han aada ha aton kasingkasing, salit nagigin basihan ito han paghukom. “Susumatan ko kamo,” siring ni Jesus, “an mga tawo nga nagyayakan hin waray pulos, may baratunon ha Adlaw han Paghukom tungod hito, kay kon an imo mga pulong maopay, ipapahayag ka nga matadong, pero kon an imo mga pulong maraot, magigin salaan ka.”

Bisan pa han ngatanan nga milagro nga ginbuhat ni Jesus, an mga eskriba ngan mga Pariseo naghangyo: “Magturutdo, karuyag namon makakita hin tigaman tikang ha imo.” Bisan kon ito nga kalalakin-an nga tikang ha Jerusalem bangin waray makakita han iya mga milagro, may masasarigan nga mga testigo nga nahitabo ito. Salit ginsidngan niya an Judio nga mga lider: “An henerasyon nga maraot ngan diri-matinumanon ha Dios padayon nga namimiling hin tigaman, pero waray tigaman nga ihahatag ha ira labot la han tigaman ni Jonas nga propeta.”

Iginsaysay ni Jesus an kahulogan hito: “Sugad la nga hi Jonas nakadto ha tiyan han daku nga isda ha sulod hin tulo ka adlaw, sugad man an Anak han tawo mahingangadto ha lubnganan ha sulod hin tulo ka adlaw.” Katapos lamyon hi Jonas han isda, iginluwa hiya sugad hin ginbanhaw, amo nga nagtagna hi Jesus nga mamamatay hiya ngan babanhawon ha ikatulo ka adlaw. Pero bisan han ginbanhaw na hiya, iginsalikway han Judio nga mga lider an “tigaman ni Jonas.”

Salit hi Jesus nagsiring nga an mga taga-Ninibe nga nagbasol han nagsangyaw ha ira hi Jonas, mababanhaw ha panahon han paghukom basi ipakita nga salaan an mga Judio nga nagsalikway kan Jesus. Sugad man, igintanding niya hira ha rayna han Sheba, nga nagbiyahe hin hirayo basi mamati ha kinaadman ni Solomon ngan nalipay gud ha iya nakita ngan nabatian. “Pero kitaa,” siring ni Jesus, “labaw pa kan Solomon an aanhi!”

Katapos naghatag hiya hin ilustrasyon mahitungod hin tawo nga may maraot nga espiritu nga ginawas ha iya. Pero waray sudli hito nga tawo hin mag-opay nga butang an ginbayaan han espiritu, salit ginsaniban hiya hin pito pa nga magraot nga espiritu. “Sugad liwat hito an mahitatabo hinin maraot nga henerasyon,” siring ni Jesus. An nasud han Israel ginlimpyohan na ngan nagkaada mga pagbag-o—pariho han temporaryo nga pagbaya han maraot nga espiritu. Pero an ira pagsalikway ha mga propeta han Dios, nga ha ultimo an pagkontra ha Kristo mismo, nagpapakita nga an ira karaotan mas labaw pa kay ha tinikangan.

Samtang nagyayakan hi Jesus, inabot an iya nanay ngan kabugtoan nga nakadto la ha luyo han mga tawo. Salit may nagsiring: “Kitaa! Nagtitinindog ha gawas an imo nanay ngan kabugtoan, kay karuyag nira makiistorya ha imo.”

“Hin-o an akon nanay, ngan hin-o an akon kabugtoan?” nagpakiana hi Jesus. Samtang gintutudlok an iya mga disipulo, nagsiring hiya: “Kitaa! An akon nanay ngan an akon kabugtoan! Kay an bisan hin-o nga nagbubuhat han kaburut-on han akon Amay ha langit, hiya an akon bugto nga lalaki ngan bugto nga babaye ngan akon nanay.” Iginpapasabot ni Jesus nga bisan kon duok gud an iya relasyon ha iya kapamilya, mas duok an iya relasyon ha iya mga disipulo. Mateo 12:33-50; Marcos 3:31-35; Lucas 8:19-21.

▪ Kay ano nga an mga Pariseo waray magin maopay nga “kahoy” ngan “bunga”?

▪ Ano an “tigaman ni Jonas,” ngan paonan-o ito iginsalikway?

▪ Kay ano nga an nasud han Israel ha siyahan nga siglo pariho ha tawo nga may maraot nga espiritu nga ginawas ha iya?

▪ Paonan-o ginpabug-atan ni Jesus an iya duok nga relasyon ha mga disipulo?