Kapitulo 72

Ginsugo ni Jesus an 70

KATRAKDAG na han 32 C.E., eksakto nga tulo ka tuig tikang nga ginbawtismohan hi Jesus. Diri pa la maiha, hiya ngan an mga disipulo kinadto ha Piyesta han mga Tabernakulo ha Jerusalem, ngan posible aadto pa hira ha kahirani nga lugar. An kadak-an han nahibibilin nga unom ka bulan han ministeryo ni Jesus gin-gamit niya ha Judea o bangin ha tabok han Salog Jordan ha distrito han Perea. Ito nga lugar kinahanglan masangyawan liwat.

Katapos han Paskua han 30 C.E., mga walo ka bulan nga nagsangyaw hi Jesus ha Judea. Pero han gin-ikaparatay hiya didto han mga Judio han Paskua han 31 C.E., haros ha Galilea na la hiya nanutdo han sumunod nga usa ngan tunga ka tuig. Hito nga panahon, nag-organisa hiya hin daku nga grupo han magwarali nga ginbansay hin maopay, nga mas damu kay han una. Salit gintikangan niya yana an pangataposan nga maduruto nga pagsangyaw ha Judea.

Nagpili hi Jesus hin 70 nga disipulo, ginpadis-padis hira ngan ginsugo. Salit 35 ka padis hira nga magsarangyaw han Ginhadian. Mag-uuna hira pagkadto ha tagsa nga syudad ngan lugar nga plano kadtoan ni Jesus, kaupod syempre an iya mga apostol.

Imbes nga pakadtoon an 70 ha mga sinagoga, ginsugo hira ni Jesus nga kumadto ha mga balay, ngan gintugon: “Bisan diin nga balay kamo sumulod, siring anay: ‘Hinaot magkaada kamurayawan ini nga balay.’ Ngan kon may mamurayawon nga tawo didto, an iyo kamurayawan magpapabilin ha iya.” Ano an ira mensahe? “Sumati hira,” siring ni Jesus, “an Ginhadian han Dios hirani na ha iyo.” Mahitungod han buruhaton han 70 nga disipulo, an Matthew Henry’s Commentary nasiring: “Pariho ha ira Agaron, bisan diin hira kumadto, nagsasangyaw hira ha kada balay.”

An instruksyon ni Jesus ha 70 pariho ha iya iginhatag ha 12 nga apostol han ginsugo niya hira nga magsangyaw ha Galilea mga usa ka tuig na an naglabay. Labot la nga ginpahamangnoan niya an 70 ha pagkontra nga ira aatubangon ngan gintutdoan kon paonan-o isusumat an mensahe, gintagan liwat niya hira hin awtoridad ha pagtambal ha mga may sakit. Salit kon umabot hi Jesus, damu an malilipay gud nga makilala an Agaron han mga disipulo nga nakakahimo hin mga milagro.

Waray la pag-iha an pagsangyaw han 70 ngan an dugang pa nga ginbuhat ni Jesus. Binalik ha iya an 35 ka padis nga magsarangyaw. Malipayon nga nagsiring hira: “Ginoo, bisan an mga demonyo nasugot ha amon pinaagi ha paggamit namon han imo ngaran.” Nalipay gud hiya hiton maopay nga ira iginsumat, kay nagsiring hiya: “Nakita ko hi Satanas nga nahulog na sugad hin kidlat tikang ha langit. Kitaa! gintagan ko kamo hin awtoridad ha pagtamak ha mga halas ngan mga iskorpyon.”

Maaram hi Jesus nga katapos maestablisar an Ginhadian han Dios ha panahon han kataposan, hi Satanas ngan an iya mga demonyo papaiwason ha langit. Pero yana, ito nga pagpagawas ha diri nakikita nga mga demonyo pinaagi la hin tawo, dugang nga nagpapamatuod hiton tiarabot nga panhitabo. Salit, mahitatabo gud an ginsiring ni Jesus nga tiarabot nga paghulog kan Satanas tikang ha langit. Kon sugad, simboliko an paghatag ha 70 hin awtoridad ha pagtamak ha mga halas ngan mga iskorpyon. Pero hi Jesus nagsiring: “Ayaw kamo pagkalipay tungod kay nasugot ha iyo an magraot nga espiritu, lugod magkalipay kamo kay an iyo mga ngaran nahisurat na ha langit.”

Nalipay gud hi Jesus ngan dayag nga nagdayaw ha iya Amay kay Iya gin-gamit inin mapainubsanon nga mga surugoon ha sugad kagamhanan nga paagi. Katapos nagsiring hiya ha mga disipulo: “Malipayon an mga mata nga nakakakita han iyo nakikita. Susumatan ko kamo: Damu nga propeta ngan mga hadi an naghingyap nga makit-an an iyo nakikita kondi waray nira makita, ngan naghingyap nga mabatian an iyo nababatian kondi waray nira mabatii ito.” Lucas 10:1-24; Mateo 10:1-42; Pahayag 12:7-12.

▪ Diin nagsangyaw hi Jesus durante han tulo ka tuig han iya ministeryo? Ano nga teritoryo an iya ginsangyawan ha nahibibilin nga unom ka bulan?

▪ Diin ginsugo ni Jesus an 70 basi magsangyaw ha mga tawo?

▪ Kay ano nga nagsiring hi Jesus nga nakita niya hi Satanas nga nahulog na tikang ha langit?

▪ Ano an kahulogan han pagtamak han 70 nga disipulo ha mga halas ngan mga iskorpyon?