Kapitulo 61

Gintambal an Bata nga Ginsaniban

SAMTANG hira Jesus, Pedro, Santiago, ngan Juan posible nga nakadto pa ha Bukid Hermon, an iba nga disipulo nagkaada problema. Pagbalik ni Jesus, nakita niya nga ginpapalibotan han mga tawo an iya mga disipulo, ngan nakikigdiskusyon ha ira an mga eskriba. Pakakita han mga tawo kan Jesus, nasurprisa gud hira ngan nagdadlagan basi tapoon hiya. Nagpakiana hi Jesus: “Ano an gindidiskusyonan niyo ngan han mga disipulo?”

May usa ha ira nga dinaop ngan linuhod kan Jesus ngan nagsiring: “Magturutdo, gindara ko nganhi ha imo an akon anak nga lalaki kay ginsaniban hiya hin espiritu salit nangula hiya, ngan kon ginpapasakitan hiya hito natutumba hiya ha tuna, ngan nagbubura an iya baba, nangingigot an ngipon, ngan nagluluya hiya. Ginsidngan ko an imo mga disipulo nga pagawson ito, pero waray nira ito mapagawas.”

Posible nga ginsalingabot han mga eskriba an diri pakatambal han mga disipulo ha bata, ngan bangin gintamay an ira pangalimbasog. Hito nga takna inabot hi Jesus. Nagsiring hiya: “Waray pagtoo nga henerasyon, tubtob san-o ako makikig-upod ha iyo? Tubtob san-o ako magpapailob ha iyo?”

An iya ginyakan baga hin para ha ngatanan nga presente, pero para adto ha mga eskriba nga nakikigdiskusyon ha iya mga disipulo. Katapos, nagsiring hiya mahitungod ha bata: “Dad-a hiya ha akon.” Kondi han nadaop na an bata kan Jesus, gintumba hiya ngan ginpakisaykisay han demonyo nga nagsanib ha iya. Nagpuropulilid hiya ngan nagbura an baba.

“Kakan-o pa ini nagtikang mahitabo ha iya?” nagpakiana hi Jesus.

“Tikang pa han iya kabata,” binaton an tatay. “Agsob hiya ilabog ha kalayo ngan ha tubig basi patayon hiya.” Katapos nakimalooy an tatay: “Kon may mahihimo ka, malooy ka ha amon ngan buligi kami.”

Bangin pipira ka tuig na nga an tatay nagpipinamiling hin makakabulig. Ngan yana nahuhulop gud hiya han waray nahimo an mga disipulo. Tungod han desperado nga pakimalooy niya kan Jesus, ginparig-on hiya: “Kay ano nga nasiring ka, ‘Kon may mahihimo ka’? Para ha usa nga may pagtoo, mahihimo an ngatanan.”

“May pagtoo ako!” nagyakan an tatay ha daku nga tingog, pero nakimalooy hiya: “Buligi ako nga magmarig-on an akon pagtoo!”

Pakakita ni Jesus nga an mga tawo nagdadadlagan ngada ha ira, ginsaway niya an demonyo: “Ikaw nga espiritu nga nakakapangula ngan nakakapabungol, ginsusugo ko ikaw nga gumawas ha iya ngan ayaw na pagsulod utro ha iya.” Samtang tigawas an demonyo, ginpaguliat ngan ginpakisaykisay hito an bata hin damu ka beses. Katapos, waray na magkiwa an bata, salit an kadam-an nagsiring: “Patay na hiya!” Pero han ginkaptan hiya ni Jesus ha kamot, binuhát hiya.

Diri pa la maiha, han ginsugo an mga disipulo nga magsangyaw, nagpagawas hira hin mga demonyo. Salit han sinulod hira ha balay, nagpakiana hira kan Jesus han hira na la: “Kay ano nga waray namon ito mapagawas?”

Basi ipakita nga tungod ito kay kulang hira hin pagtoo, hi Jesus binaton: “Ito nga klase mapapagawas la pinaagi han pag-ampo.” Matin-aw nga kinahanglan an pagpangandam basi mapagawas iton makusog gud nga demonyo. Kinahanglan an marig-on nga pagtoo ngan pag-ampo ha Dios para hin bulig.

Katapos nagsiring pa hi Jesus: “Ha pagkamatuod, susumatan ko kamo: Kon may pagtoo kamo nga bisan sugad la kagutiay han liso han mustasa, ini nga bukid mabalhin kon sidngan niyo, ‘Balhin ngadto,’ ngan mababalhin ito, ngan waray imposible ha iyo.” Daku gud an nahihimo han pagtoo!

An mga ulang ngan kakurian nga nakakapugong ha pag-uswag ha pag-alagad kan Jehova baga hin daku ngan diri nababantad sugad hin hitaas nga bukid. Pero iginpapakita ni Jesus nga kon patuboon naton ha kasingkasing an pagtoo, nga ginsasaribohan ngan gin-aataman ito, magigin hamtong ito ngan mabulig ha aton nga malamposan an sugad-bukid nga mga ulang ngan kakurian. Marcos 9:14-29; Mateo 17:19, 20; Lucas 9:37-43.

▪ Ano an sitwasyon han binalik hi Jesus tikang ha Bukid Hermon?

▪ Paonan-o ginparig-on ni Jesus an tatay han bata nga ginsaniban?

▪ Kay ano nga waray mapagawas han mga disipulo an demonyo?

▪ Ano an ginsiring ni Jesus nga nahihimo han pagtoo?