Kapitulo 92

Gintambal ni Jesus an Napulo nga May Liprosi

NAPAKYAS an Sanhedrin nga patayon hi Jesus han binaya hiya ha Jerusalem ngan kinadto ha syudad han Efraim, mga 24 ka kilometro la ha norte han Jerusalem. Nagpabilin hiya didto kaupod an mga disipulo, nga hirayo ha iya mga kaaway.

Pero hirani na isaurog an Paskua han 33 C.E., ngan waray pag-iha nagbiyahe na liwat hi Jesus. Inagi hiya ha Samaria ngan kinadto ha Galilea. Ito an iya ultimo nga pagbisita hito nga lugar antes hiya mamatay. Didto ha Galilea, posible nga nakaupod niya ngan han mga disipulo an iba nga nagbibiyahe ngadto ha Jerusalem basi isaurog an Paskua. Inagi hira ha dalan nga tipakadto ha distrito han Perea, ha este han Salog Jordan.

Diri pa la maiha durante han pagbiyahe, samtang tisulod hi Jesus ha usa nga baryo bangin ha Samaria o ha Galilea, nakita hiya han napulo nga lalaki nga may liprosi. Tungod hinin makangingirhat nga sakit, hinay-hinay nga nadudunot an mga bahin han lawas han tawo—an mga tudlo ha kamot ngan tiil, mga talinga, irong, ngan im-im. Basi diri mataponan an iba, ini an Balaud han Dios para ha may liprosi: “Iya tabonan an iya igbaw nga im-im, ngan magguliat: mahugaw, mahugaw. Ha ngatanan nga mga adlaw nga aada pa ha iya an sakit hiya magmamahugaw; . . . hiya mag-ukoy nga usa la.”

Ginsusunod han napulo nga may liprosi an igindidiri han Balaud ha mga may liprosi salit waray hira humirani kan Jesus. Pero nagsinggit hira: “Jesus, Magturutdo, kalooyi kami!”

Han nakita hira ni Jesus ha hirayo, nagsugo hiya: “Kadto kamo ngan pagpakita ha mga saserdote.” Iginsugo niya ito kay ha Balaud han Dios an mga saserdote an may katungod ha pagdeklara nga nag-opay na an may liprosi. Katapos, tutugotan na hira nga makig-upod utro ha mga mahimsog an panlawas.

Nasarig gud an napulo nga may liprosi ha gahum ni Jesus ha paghimo hin milagro. Salit nagdagmit hira pagkadto ha mga saserdote, bisan kon waray pa hira mag-opay. Samtang tipakadto, ginbalosan an ira pagtoo kan Jesus. Ira nakita ngan inabat nga natambal na hira!

An siyam nga nag-opay na nagpadayon ha ira kakadtoan, pero an usa nga nag-opay, nga usa nga Samaritano, binalik basi bilngon hi Jesus. Kay ano? Kay nagpapasalamat gud hiya nga natambal hiya. Gindayaw niya an Dios ha daku nga tingog, ngan han hinkit-an niya hi Jesus yinukbo hiya ha may tiil ngan nagpasalamat ha iya.

Nagsiring hi Jesus: “Napulo an natambal, diri ba? Hain man an siyam? Waray ba iba nga binalik basi magdayaw ha Dios kondi ini la nga tawo nga taga-iba nga nasud?”

Katapos ginsidngan ni Jesus an Samaritano: “Tindog ngan lakat; nag-opay ka tungod han imo pagtoo.”

Kon ginbabasa naton an pagtambal ni Jesus ha napulo nga may liprosi, sadang naton pamalandungon an iginpapasabot han iya pakiana: “Hain man an siyam?” An pagin diri mapasalamaton han siyam daku gud nga sayop. Pariho ha Samaritano, magpapasalamat ba kita ha Dios tungod han aton mga nakakarawat tikang ha Iya, upod na an sigurado nga saad nga kinabuhi nga waray kataposan ha Iya matadong nga bag-o nga kalibotan? Juan 11:54, 55; Lucas 17:11-19; Lebitiko 13:16, 17, 45, 46; Pahayag 21:3, 4.

▪ Paonan-o napakyas an pag-ikaparatay kan Jesus?

▪ Diin sunod nga nagbiyahe hi Jesus, ngan tipakain hiya?

▪ Kay ano nga diri nahirani ha mga tawo an mga may liprosi? Kay ano nga ginsidngan hira ni Jesus nga kumadto ha mga saserdote?

▪ Ano an aton mahibabaroan tikang hini?