Kapitulo 133

Gintuman ni Jesus an Tanan nga Sugo han Dios

KON bungkagon na han Girriro nga Hadi nga hi Jesu-Kristo hi Satanas ngan an iya maraot nga kalibotan, daku gud ito nga hinungdan han kalipay! Katapos, magtitikang na an mamurayawon nga Usa ka Yukot ka Tuig nga Pagmando ni Jesus!

Ha paggiya ni Jesus ngan han iya kaupod nga mga hadi, lilimpyohon han mga nakatalwas ha Armagedon an mga nadaot han matadong nga girra. Posible nga may panahon nga magkakaada liwat hira mga anak nga mabulig ha ira ha makalilipay nga trabaho ha pagkultibar han tuna basi magin makaruruyag gud nga hardin.

Pag-abot han panahon, babanhawon ni Jesus an diri maihap nga minilyon basi magpahimulos han makaruruyag nga Paraiso. Tutumanon niya ito sumala han iya mismo iginsaad: “Maabot an oras nga an ngatanan nga aadto ha handumanan nga mga lubnganan . . . mababanhaw.”

Kaupod han mga babanhawon ni Jesus an makasasala hadto nga namatay ha pasakitan nga kahoy ha sapit niya. Hinumdumi nga hi Jesus nagsaad ha iya: “Ha pagkamatuod susumatan ko ikaw yana, Makakaupod ko ikaw ha Paraiso.” Ito nga tawo diri hingangadto ha langit basi maghadi kaupod ni Jesus, ngan diri liwat hi Jesus magigin tawo utro ngan magkikinabuhi ha Paraiso nga tuna upod niya. Lugod, makakaupod hiya ni Jesus kay Iya babanhawon hiya ha Paraiso ngan tatagan gud han iya mga panginahanglan ha pisikal ngan ha espirituwal, sugad han makikita ha retrato ha sunod nga pahina.

Hunahunaa la! Ha mahigugmaon nga pagmangno ni Jesus, magtitikahingpit an ngatanan nga tawo—an mga nakatalwas ha Armagedon, an ira mga anak, ngan an minilyon nga nabanhaw nga nasugot ha iya. Ha espirituwal nga paagi, hi Jehova maukoy upod han mga tawo pinaagi han iya Anak nga hadi, hi Jesu-Kristo. Sumala han tingog nga hinbatian ni Juan tikang ha langit: “Papahiron niya an mga luha ha ira mga mata, ngan mawawara na an kamatayon, pati an kabido, pagtangis, ngan kasakit.” Waray na mag-aantos o may sakit nga tawo ha tuna.

Kon matapos na an Usa ka Yukot ka Tuig nga Pagmando ni Jesus, an kahimtang magigin pariho ha orihinal nga katuyoan han Dios han ginsidngan niya an siyahan nga mag-asawa nga hira Adan ngan Eva nga magdamu ngan pun-on an tuna. Oo, an tuna mapupuno han magtadong ngan perpekto nga mga tawo. Tungod ito kay an mga kapulsanan han halad lukat ni Jesus bug-os nga mapapahimulsan na han ngatanan. Mawawara na gud an kamatayon nga resulta han sala ni Adan!

Hito nga paagi, matutuman gud ni Jesus an ngatanan nga iginsugo ha iya ni Jehova. Salit ha kataposan han 1,000 ka tuig, ibabalik niya an Ginhadian ha iya Amay pati an hingpit na nga mga tawo. Katapos hito, bubuhian han Dios hi Satanas ngan an iya mga demonyo tikang ha kahiladman, ha kahimtang nga sugad hin patay nga waray mahihimo. Kay ano?

Ha kataposan han 1,000 ka tuig, kadam-an han mga nagkikinabuhi ha Paraiso amo an mga binanhaw nga waray pa gud masarihi an pagtoo. Antes hira mamatay, waray gud hira mahibaro han mga saad han Dios salit waray hira makagpakita hin pagtoo hito. Katapos hira banhawon ngan tutdoan han mga kamatuoran ha Biblia, magigin masayon ha ira an pag-alagad ha Dios ha Paraiso kay waray mga pagkontra. Pero kon tagan hi Satanas hin higayon ha pagpugong ha ira ha padayon nga pag-alagad ha Dios, magigin maunungon daw la hira bisan pa han pagsari? Basi mabaton ini, bubuhian hi Satanas.

An iginpahayag kan Juan nagpapakita nga katapos han Usa ka Yukot ka Tuig nga Pagmando ni Jesus, maglalampos gud hi Satanas nga italikod ha pag-alagad ha Dios an diri maihap nga mga tawo. Pero katapos han ultimo nga pagsari, pupoohon ha kadayonan hi Satanas, an iya mga demonyo, ngan an ngatanan nga nasulay niya. Ha luyo nga bahin, mabubuhi ha waray kataposan an maunungon nga mga nakatalwas nga nasarihan gud, basi magpahimulos han mga bendisyon han ira Amay ha langit.

Matin-aw nga ginbuhat gud ni Jesus an iya importante nga papel ha pagtuman han makaruruyag nga mga katuyoan han Dios, ngan padayon nga bubuhaton niya ito. Magigin makalilipay gud an aton kabubuwason tungod han ngatanan nga iya ginbubuhat sugad nga harangdon nga Hadi ha langit nga ginpili han Dios. Pero syempre, diri gud naton hingangalimtan an ngatanan nga iya ginbuhat han nakanhi pa hiya ha tuna.

Kinaburut-on nga kinanhi hi Jesus ha tuna ngan gintutdoan kita mahitungod han iya Amay. Labot pa hito, iginpakita niya an makaruruyag nga mga kalidad han Dios. Nababantad an aton kasingkasing kon aton ginhuhunahuna an iya duro nga kaisog ngan karig-on, an iya diri-matupngan nga kinaadman, an iya ekselente nga abilidad sugad nga magturutdo, an iya waray kahadlok nga pagpanguna, ngan an iya mahigugmaon nga pagpaid ngan empatiya. Kon aton nahinunumdoman an iya duro nga kasakit tungod ha paghatag han lukat, an amo la nga paagi nga mahimo kita magkaada hin kinabuhi, sigurado nga kinasingkasing nga maaapresyar gud naton hiya!

Oo, ha aton pag-aram han kinabuhi ni Jesus hinbaroan naton nga naiiba gud hiya! An iya pagkaharangdon diri gud karuhaduhaan ngan waray kapariho. Masisiring liwat naton an ginyakan han Romano nga gobernador nga hi Ponsio Pilato: “Kitaa! An tawo!” Oo, “An tawo,” an pinakabantogan nga tawo nga nabuhi!

Pinaagi han aton pagkarawat han halad lukat ni Jesus, mawawara an mga epekto han sala ngan kamatayon nga napanunod naton kan Adan, ngan magigin aton ‘Amay ha Kadayonan’ hi Jesus. An ngatanan nga naruruyag mabuhi ha waray kataposan kinahanglan magkaada hin kahibaro ha amo la nga totoo nga Dios ngan ha iya Anak nga hi Jesu-Kristo. Mabuligan ka unta han imo pagbasa ngan pag-aram hini nga libro nga magkaada han kahibaro nga naghahatag hin kinabuhi! 1 Juan 2:17; 1:7; Juan 5:28, 29; 3:16; 17:3; 19:5; Lucas 23:43; Genesis 1:28; 1 Corinto 15:24-28; Pahayag 20:1-3, 6-10; 21:3, 4; Isaias 9:6.

▪ Ano an makalilipay nga pribilehiyo han mga makakatalwas ha Armagedon ngan han ira mga anak?

▪ Labot han mga makakatalwas ha Armagedon ngan han ira mga anak, hin-o pa an maukoy ha Paraiso? Paonan-o nira makakaupod hi Jesus?

▪ Ano an magigin kahimtang ha kataposan han 1,000 ka tuig, ngan ano an bubuhaton ni Jesus?

▪ Kay ano nga bubuhian hi Satanas tikang ha kahiladman? Ano an mahitatabo ha iya ngan ha ngatanan nga nasunod ha iya?

▪ Paonan-o hi Jesus magigin aton ‘Amay ha Kadayonan’?