Ginwara an Kasubo han Balo
Kapitulo 37
Ginwara an Kasubo han Balo
WARAY pag-iha katapos tambalon ni Jesus an surugoon han opisyal han kasundalohan, kinadto hiya ha Nain, usa nga syudad nga sobra 32 ka kilometro an kahirayo ha Capernaum. Kaupod niya an mga disipulo ngan an damu nga tawo. Posible nga tikagab-i na han inabot hira ha gawas han Nain. Didto iginkatapo hira hin prosesyon han lubong. Gindadara tipagawas han syudad an patay nga olitawohay basi ilubong.
Makasurubo gud an kahimtang han iroy, kay balo hiya ngan ito la an iya anak. Bisan kon namatay an iya bana, naliaw hiya kay may anak hiya. An iya mga paglaom, hingyap, ngan ambisyon nakasentro ha kabubuwason han iya anak. Pero yana, waray na makakaliaw ha iya. Duro gud an iya kasubo samtang gin-uupdan hiya han iya mga kahimungto ngadto ha lubnganan.
Han nakita ni Jesus an babaye nga masurub-on gud, nalooy hiya. Salit mahigugmaon, pero may karig-on nga ginpasarig hiya ni Jesus, ngan nagsiring: “Ayaw na pagtinangis.” An paggawi ngan ginbuhat ni Jesus nakakuha han atensyon han mga tawo. Salit han dinaop hiya ngan ginkaptan an tiheras nga ginhihigdaan han patay, inundang an mga nagdadara hito. Interesado gud an ngatanan kon ano an iya bubuhaton.
Oo, nakita han mga kaupod ni Jesus nga milagroso nga gintambal niya an damu nga may-ada sakit. Pero waray pa gud hira makakita nga nagbanhaw hiya hin patay. Mahihimo gud ba ito ni Jesus? Ginsidngan ni Jesus an patay: “Batan-on, ginsusugo ko ikaw: Buhát!” An batan-on liningkod! Nagyakan hiya, ngan iginhatag hiya ni Jesus ha iya nanay.
Pakakita han mga tawo nga nabuhi an batan-on, nagsiring hira: “Usa nga harangdon nga propeta an ginsugo nganhi ha aton.” An iba nagsiring: “Nalooy an Dios ha iya katawohan.” Ito nga milagro nahibantog dayon ha bug-os nga Judea ngan ha ngatanan nga kahigrani nga nasud.
Priso pa hi Juan nga Parabaptis, ngan karuyag niya hibaroan an mga ginbubuhat ni Jesus. Ginsumatan hiya han iya mga disipulo hito nga mga milagro. Ano an iya reaksyon? Lucas 7:11-18.
▪ Ano an nakita nira Jesus han tisulod na hira ha Nain?
▪ Ano an reaksyon ni Jesus ha iya nakita, ngan ano an iya ginbuhat?
▪ Ano an reaksyon han mga tawo ha milagro nga ginbuhat ni Jesus?
