Kapitulo 121

Ha Atubangan han Sanhedrin Ngan ni Pilato

TIKAAGA na. Iginnigar na ni Pedro hin tulo ka beses hi Jesus, ngan human na an mga membro han Sanhedrin ha ira hinimo-himo nga pagbista ngan nagburublag na hira. Pero aga-aga pa han Biernes, nagkatirok utro hira, kondi yana didto na ha katirokan han Sanhedrin. Posible nga ginbuhat nira ito basi pagawson nga legal an nahitabo nga pagbista ha naglabay nga gab-i. Han gindara hi Jesus ha ira atubangan, gin-utro na liwat nira an ira ginsiring han gab-i: “Kon ikaw an Kristo, sumati kami.”

“Bisan kon sumatan ko kamo, diri gud kamo matoo,” siring ni Jesus. “Ngan kon pakianhan ko kamo, diri gud kamo mabaton.” Pero maisugon nga iginsumat ni Jesus kon hin-o hiya: “Tikang yana, an Anak han tawo malingkod ha too han gamhanan nga Dios.”

“Kon sugad, ikaw ba an Anak han Dios?” hira ngatanan karuyag mahibaro.

“Kamo mismo an nasiring nga ako,” binaton hi Jesus.

Para hini nga mga tawo nga an intensyon amo an pagpatay, igo na ito nga baton. Ginhuhunahuna nira nga pagpasipara ito. “Kay ano nga magkikinahanglan pa kita hin testigo?” nagpakiana hira. “Nabatian naton mismo an iya ginsiring.” Salit gin-gapos nira hi Jesus, gindara ngan igintubyan ha Romano nga gobernador nga hi Ponsio Pilato.

Hi Judas nga nagtraydor kan Jesus, nag-iinobserbar han nahitatabo. Han nakita niya nga ginsentensyahan hi Jesus hin kamatayon, nasubo gud hiya. Salit kinadto hiya ha punoan nga mga saserdote ngan ha katigurangan basi ibalik an 30 ka sinselyo nga silber. Nagsiring hiya: “Nakasala ako han gintraydoran ko an dugo nga matadong.”

“Ano an labot namon ha imo? Problema mo na ito!” waray kalooy nga nagsiring hira. Salit iginlabog ni Judas ha templo an kwarta, katapos binaya hiya ngan naghikog. Pero nabari an sanga nga ginhigtan niya han pisi, salit nahulog hiya ha mga bato ha ubos, ngan naburit an iya tiyan.

Diri maaram an punoan nga mga saserdote kon ano an hihimoon ha kwarta. “Supak ha balaud nga ikadto ini ha sagrado nga burutangan han bahandi,” nagsiring hira, “kay bayad ini han dugo.” Katapos magsarabot, ira ito iginpalit hin tuna han parahimo hin daba, basi magin lubnganan han mga estranghero. Salit gintawag ito nga “Tuna han Dugo.”

Temprano pa ha aga han gindara hi Jesus ha palasyo han gobernador. Pero waray sumulod an mga Judio nga nagdara ha iya kay natoo hira nga mahuhugawan hira kon humirani ha mga Hentil. Salit basi maasikaso hira, ginawas ni Pilato. “Ano an iyo akusasyon hini nga tawo?” nagpakiana hiya.

“Kon ini nga tawo waray makasala, diri unta namon hiya dadad-on nganhi ha imo,” binaton hira.

Tungod kay nadiri hi Pilato nga mahidabi, nagsiring hiya: “Dad-a niyo hiya ngan hukmi sumala ha iyo balaud.”

Naibuhayhag nga may intensyon an mga Judio ha pagpatay kay nagsiring hira: “Supak ha balaud nga patayon namon an bisan hin-o.” Kon ginpatay nira hi Jesus durante han Piyesta han Paskua, posible nga nagsaramok an mga tawo, kay damu an may daku nga pagtahod ha iya. Pero kon makombinse nira an mga Romano nga patayon hiya ha politikal nga hinungdan, diri hira an babasulon han mga tawo.

Salit an mga lider han relihiyon naghimo-himo yana hin iba pa nga mga akusasyon. Pero waray nira unabiha an naglabay nga pagbista han nag-akusar hira nga nagpapasipara hi Jesus. Ini an ira tulo nga akusasyon: “Nakita namon nga [1] ginsasamok hini nga tawo an aton nasud, [2] igindidiri an pagbayad hin buhis ha Cesar, ngan [3] nasiring nga hiya an Kristo nga hadi.”

Nabaraka hi Pilato ha akusasyon nga nag-aangkon hi Jesus nga hadi hiya. Salit sinulod utro hiya ha palasyo, gintawag hi Jesus, ngan ginpakianhan: “Ikaw ba an Hadi han mga Judio?” Karuyag niya sidngon, gintalapas mo ba an balaud pinaagi ha pagsiring nga usa ka nga hadi nga nakontra ha Cesar?

Karuyag ni Jesus hibaroan kon mationan-o na kadamu an nabatian ni Pilato mahitungod ha iya, salit nagpakiana hiya: “Ginsiring mo ba ito kay ito an imo kalugaringon nga mga ideya, o may nagsumat ha imo mahitungod ha akon?”

Nagsiring hi Pilato nga diri niya kilala hi Jesus ngan karuyag niya hibaroan kon ano gud an totoo. “Diri ako Judio, diri ba?” binaton hi Pilato. “Gindara ka nganhi han imo mismo mga kahimungto ngan han punoan nga mga saserdote. Ano an imo ginbuhat?”

Waray gud likayi ni Jesus an isyu mahitungod han pagin hadi. Salit kakalasan hi Pilato ha ibabaton ni Jesus. Lucas 22:66–23:3; Mateo 27:1-11; Marcos 15:1; Juan 18:28-35; Buhat 1:16-20.

▪ Kay ano nga nagkatirok utro an Sanhedrin han aga?

▪ Paonan-o namatay hi Judas? Ano an ginhimo ha 30 ka sinselyo nga silber?

▪ Kay ano nga karuyag han mga Judio nga an mga Romano an magpatay kan Jesus imbes nga hira mismo an magpatay ha iya?

▪ Ano an mga akusasyon han mga Judio kan Jesus?