Kapitulo 101

Ha Balay ni Simon ha Betania

PAGBAYA ni Jesus ha Jerico, kinadto hiya ha Betania. Haros usa ka adlaw ito nga pagbaktas, kay 19 ka kilometro ito nga sagkahon ha lugar nga makuri agian. An Jerico mas ubos hin mga 250 metros kay ha lebel han dagat, ngan an Betania mas hitaas hin mga 760 metros kay ha lebel han dagat. Bangin nahinunumdoman mo pa nga taga-Betania hi Lasaro ngan an iya kabugtoan. Ito nga gutiay nga baryo mga tulo ka kilometro an distansya ha Jerusalem, ngan nahimumutang ito ha este nga bakilid han Bukid han mga Olibo.

Damu na an inabot ha Jerusalem para han Paskua. Temprano hira nga kinadto basi maglimpyo ha kalugaringon uyon ha Balaud. Bangin nakakapot hira hin patay nga lawas o may nabuhat nga nakapahugaw ha ira. Salit ginsunod nira an surundon ha paglimpyo ha kalugaringon basi uyonan an ira pagsaurog han Paskua. Han nagkatirirok ha templo an temprano nga nangabot, damu an naghuhunahuna kon maatender ba hi Jesus han Paskua.

Kadam-an ha Jerusalem an nag-uuroistorya mahitungod kan Jesus. Maaram an mga tawo nga karuyag han mga lider han relihiyon nga arestuhon hiya basi patayon. Ha pagkamatuod, nagsugo hira nga an bisan hin-o nga mahibaro kon hain hi Jesus kinahanglan magsumat ha ira. Tulo ka beses ha naglabay nga mga bulan—ha Piyesta han mga Tabernakulo, ha Piyesta han Pagdedikar, ngan han katapos banhawon hi Lasaro—gin-ikaparatay hi Jesus hini nga mga lider. Salit naghuhunahuna an mga tawo kon magpapakita pa ba hiya ha publiko. “Ha iyo paghunahuna, diri gud ba hiya makanhi ha piyesta?” nagpakianahay hira.

Hito nga takna, inabot hi Jesus ha Betania unom ka adlaw antes an Paskua han Nisan 14 ha kalendaryo han mga Judio. Biernes nga gab-i adto, nga amo an tinikangan han Nisan 8. Diri hiya puydi kumadto ha Betania ha Sabado kay igindidiri ha balaud han mga Judio an pagbiyahe kon Sabbath—tikang ha katunod han adlaw ha Biernes tubtob ha katunod han adlaw ha Sabado. Posible nga kinadto hi Jesus ha balay nira Lasaro, sugad han iya ginbuhat hadto, ngan hinuron didto han Biernes nga gab-i.

Pero han Sabado, may taga-Betania nga nag-imbitar hin pangiklop kan Jesus ngan ha iya mga kaupod. Hiya hi Simon nga may liprosi hadto nga posible nga gintambal ni Jesus. An maduruto nga hi Marta amo an nag-aasikaso ha mga bisita. Pero hi Maria, matinagaron kan Jesus sugad han iya nabatasan, nga hito nga higayon nagin hinungdan han diskusyon.

Gin-abrihan ni Maria an gutiay nga alabastro nga surudlan, nga may sulod nga mga tunga ka litro han mahamot nga lana, nga “puro nga nardo.” Marahalon gud ito, kay an kantidad hito mga usa ka tuig nga sweldo! Han iginbubo ni Maria an lana ha ulo ngan mga tiil ni Jesus ngan ginpamara an mga tiil pinaagi han iya buhok, nagharamot ha bug-os nga balay.

Nasina an mga disipulo ngan nagpakiana: “Kay ano nga ginkakaragan ito?” Katapos nagsiring hi Judas Iscariote: “Kay ano nga waray na la ibaligya hin 300 ka denaryo ito nga mahamot nga lana basi ihatag ha mga pobre?” An totoo, diri hiya nagtatagad ha mga pobre, kay ginkikinawat niya an kwarta ha kahon nga gintitipigan han mga disipulo.

Gindepensahan ni Jesus hi Maria. “Pabay-i niyo hiya,” siring ni Jesus. “Kay ano nga iyo ginsisinamok hiya? Maopay an iya ginbuhat ha akon. An mga pobre pirme niyo kaupod, ngan kon karuyag niyo, pirme kamo makakabulig ha ira, pero ako diri niyo pirme makakaupod. Ginbuhat niya an iya mahihimo. Ginpahiran niya hin mahamot nga lana an akon lawas sugad nga pangandam ha paglubong. Ha pagkamatuod susumatan ko kamo: Bisan diin isangyaw an maopay nga sumat ha bug-os nga kalibotan, an ginbuhat hini nga babaye igsusumat liwat sugad nga paghinumdom ha iya.”

Sobra 24 ka oras na hi Jesus ha Betania, ngan nahibantog nga aadto hiya. Salit damu an kinadto ha balay ni Simon basi makita hi Jesus, pero karuyag liwat nira makita hi Lasaro didto. Tungod hito, nagsarabot an punoan nga mga saserdote nga patayon hi Jesus ngan hi Lasaro, kay nagtitikadamu an natoo kan Jesus han nakita nira an iya ginbanhaw! Maraot gud ito nga mga lider han relihiyon! Juan 11:55–12:11; Mateo 26:6-13; Marcos 14:3-9; Buhat 1:12.

▪ Ano an uruistorya han mga tawo ha templo ha Jerusalem, ngan kay ano?

▪ Kay ano nga Biernes inabot hi Jesus ha Betania imbes nga Sabado?

▪ Han inabot hi Jesus ha Betania, posible nga diin hiya naghuron durante han Sabbath?

▪ Ano an ginbuhat ni Maria nga nagin hinungdan han diskusyon? Paonan-o hiya gindepensahan ni Jesus?

▪ Ano an nagpapakita nga maraot gud an punoan nga mga saserdote?