Kapitulo 130

Ha Dagat han Galilea

YANA, binalik na ha Galilea an mga apostol, sugad han iginsugo ni Jesus. Pero diri hira maaram kon ano an ira bubuhaton didto. Waray pag-iha, nagsiring hi Pedro kanda Tomas, Natanael, ha magbugto nga hira Santiago ngan Juan, ngan ha duha pa nga apostol: “Mangingisda ako.”

Hira nga unom binaton: “Maupod kami ha imo.”

Ha bug-os nga gab-i, waray hira nadakop. Kondi han tikaaga na, nagpakita hi Jesus ha may baybayon, pero an mga apostol waray pakakilala ha iya. Ginuliat hiya: “Mga anak, may pagkaon ba kamo?”

“Waray!” ginuliat liwat hira.

“Itunod an pukot ha too nga dapit han baluto ngan makakadakop kamo,” siring niya. Han igintunod nira ito, waray na hira pakakaalsa han ira pukot tungod han damu nga isda.

“An Ginoo ito!” nagsiring hi Juan.

Pakabati hito ni Pedro, iginsul-ot niya an iya ginhubo nga pantungbaw nga panapton, ngan linukso hiya ha dagat. Naglangoy hiya hin sobra 90 metros ngadto ha baybayon. Sinunod ha iya an iba nga apostol nga nahibilin ha gutiay nga baluto samtang gindadanas an pukot nga puno hin isda.

Paghaw-as nira ha baybayon, nakita nira nga may isda nga iginsusugba ha baga ngan may tinapay. Nagsiring hi Jesus: “Pagdara ngadi hin mga isda nga iyo pa la nadakop.” Salit sinakay hi Pedro ha baluto ngan gindanas an pukot ngadto ha baybayon. Puno ito hin 153 nga dagku nga isda!

Gintawag hira ni Jesus: “Kadi, pamahaw na kamo.”

Waray bisan usa ha ira nga nagpakiana kon hin-o hiya, kay maaram hira nga hi Jesus ito. Ikapito na ito nga iya pagpakita tikang nga nabanhaw hiya, ngan ito an ikatulo nga pagpakita niya ha mga apostol sugad nga grupo. Yana, iginserbi niya an pagkaon, gintagan an tagsa ha ira hin tinapay ngan isda.

Katapos nira mangaon, posible nga ginkikinita ni Jesus an dagku nga isda han ginpakianhan niya hi Pedro: “Simon nga anak ni Juan, hinigugma mo ba ako labaw pa hini?” Sigurado nga an iya iginpapasabot, Mas karuyag mo ba an negosyo nga pangisda kay ha buruhaton nga iginpapabuhat ko ha imo?

Binaton hi Pedro: “Maaram ka nga hinigugma ko ikaw.”

“Pakaona an akon nati nga mga karnero,” siring ni Jesus.

Ha ikaduha nga higayon, nagpakiana hiya: “Simon nga anak ni Juan, hinigugma mo ba ako?”

“Oo Ginoo, maaram ka nga hinigugma ko ikaw,” sinsero nga binaton hi Pedro.

“Atamana an akon gudtiay nga karnero,” nagsugo na liwat hi Jesus.

Ha ikatulo nga higayon, nagpakiana hiya: “Simon nga anak ni Juan, hinigugma mo ba ako?”

Nasubo gud hi Pedro. Nahunahuna niya nga bangin nagruruhaduha hi Jesus han iya pagkamaunungon. Labi na kay han ginbista hi Jesus, tulo ka beses nga nagsiring hi Pedro nga diri niya kilala hi Jesus. Salit nagsiring hiya: “Ginoo, maaram ka han ngatanan; maaram ka nga hinigugma ko ikaw.”

“Pakaona an akon gudtiay nga karnero,” ginsugo hiya ni Jesus ha ikatulo nga higayon.

Ginsiring niya ito kan Pedro basi pabug-atan ha iba an buruhaton nga iya iginpapabuhat ha ira. Diri mag-iiha, mabaya na hiya ha tuna, ngan karuyag niya nga hira an manguna ha pagmangno han mga dadad-on ha toril han Dios.

Sugad la nga gin-aresto ngan ginpatay hi Jesus tungod kay gintuman niya an buruhaton nga iginsugo ha iya han Dios, ginsumatan ni Jesus hi Pedro nga mag-aantos liwat hiya. “Han burobata ka pa,” siring ni Jesus, “nakakalugaring ka pagbado ngan napakadto ka kon diin mo karuyag. Pero kon lagas ka na, uunaton mo an imo mga kamot ngan iba an magbabado ha imo ngan magdadara ha imo ngadto ha diri mo karuyag.” Bisan pa han makuri nga kamatayon nga aatubangon ni Pedro, gin-aghat hiya ni Jesus: “Padayon nga sunod ha akon.”

Han liningi hi Pedro, nakita niya hi Juan, ngan nagpakiana: “Ginoo, ano an bubuhaton hini nga tawo?”

Binaton hi Jesus: “Kon karuyag ko nga magpadayon hiya tubtob ha akon pagkanhi, kay ano nga mababaraka ka hito? Padayon nga sunod ha akon.” Damu han mga disipulo an naghunahuna nga an karuyag sidngon ni Jesus nga hi apostol Juan diri gud mamamatay. Pero sugad han iginsaysay ni apostol Juan ha urhi, hi Jesus waray magsiring nga diri mamamatay hi Juan, lugod nagsiring la hiya: “Kon karuyag ko nga magpadayon hiya tubtob ha akon pagkanhi, kay ano nga mababaraka ka hito?”

Ha urhi, iginpahayag liwat ni Juan inin importante nga obserbasyon: “Ha pagkamatuod, damu pa an ginbuhat ni Jesus, nga kon isusurat an bug-os nga detalye, ha akon paghunahuna diri maigo ha kalibotan an mga linukot nga ginsuratan.” Juan 21:1-25; Mateo 26:32; 28:7, 10.

▪ Ano an nagpapakita nga diri maaram an mga apostol han ira bubuhaton ha Galilea?

▪ Paonan-o nakilal-an han mga apostol hi Jesus didto ha Dagat han Galilea?

▪ Ikapira na yana nga pagpakita ni Jesus tikang nga nabanhaw hiya?

▪ Paonan-o ginpabug-atan ni Jesus an iya iginpapabuhat ha mga apostol?

▪ Ano an iginsaysay ni Jesus mahitungod han magigin kamatayon ni Pedro?

▪ Ano an ginsiring ni Jesus mahitungod kan Juan nga sayop an pagsabot han damu nga disipulo?