Kapitulo 66

Ha Piyesta han mga Tabernakulo

HI Jesus nagin kilala hin haros tulo ka tuig na tikang nga nabawtismohan hiya. Yinukot an nakakita han iya mga milagro, ngan an iya mga ginbuhat nahibantog ha bug-os nga nasud. Han nagkatirok an mga tawo ha Jerusalem para ha Piyesta han mga Tabernakulo, ginbiniling nira hiya. “Hain ito nga tawo?” karuyag nira mahibaro.

Nagdiskusyon an mga tawo mahitungod kan Jesus. An iba nagsiring: “Maopay hiya nga tawo.” May nagsiring liwat: “Diri hiya maopay, kay iginsisimang niya an mga tawo.” Damu an sugad hito nga hurobhurob ha siyahan nga mga adlaw han piyesta. Pero waray gud nagyakan ha publiko basi depensahan hi Jesus, kay nahahadlok hira nga bumulos an Judio nga mga lider.

Han katunga-tungaan han piyesta, inabot hi Jesus. Kinadto hiya ha templo, ngan nahipausa an mga tawo ha iya maopay gud nga pagtutdo. Tungod kay waray hiya mag-aram ha eskwelahan para magin rabbi o magturutdo, nahipausa an mga Judio: “Paonan-o ini nga tawo nagkaada kahibaro han mga sinurat nga waray man hiya mag-eskwela?”

“An akon igintututdo diri akon,” nagsaysay hi Jesus, “kondi tikang ha iya nga nagsugo ha akon. Kon an bisan hin-o naruruyag pagbuhat han Iya kaburut-on, mahibabaro hiya kon ito nga katutdoan tikang ha Dios o ha akon kalugaringon nga mga ideya.” An iya katutdoan uyon gud ha balaud han Dios. Salit klaro nga ginhihimaya niya an Dios, diri an iya kalugaringon. “Diri ba iginhatag ha iyo ni Moises an Balaud?” nagpakiana hi Jesus. Ngan ginsaway niya hira: “Diri niyo ginsusunod an Balaud.”

“Kay ano nga karuyag niyo ako patayon?” nagpakiana hi Jesus.

Diri maaram hito an iba nga nakadto ha piyesta, nga posible mga bisita. Diri hira makatoo nga may naruruyag pagpatay ha sugad kaopay nga magturutdo. Salit naghunahuna hira nga may diperensya hi Jesus kay nagyakan hiya hito. “May demonyo ka,” siring nira. “Hin-o an naruruyag pagpatay ha imo?”

Karuyag han Judio nga mga lider nga patayon hi Jesus, pero diri hito maaram an mga tawo. Usa ngan tunga ka tuig na an naglabay han nagtambal hi Jesus ha Sabbath, gin-ikaparatay hiya han mga lider. Salit ginbuhayhag niya nga diri hira makatadunganon han nagpakiana hiya: “Kon may gintuturi ha adlaw han sabbath basi diri matalapas an balaud ni Moises, kay ano nga nasisina gud kamo ha akon tungod kay nagtambal ako hin tawo ha adlaw han sabbath? Ayaw na kamo paghukom sumala ha iyo nakikita, kondi paghukom kamo ha matadong nga paagi.”

An mga taga-Jerusalem nga maaram han sitwasyon, nagsiring: “Diri ba ini an tawo nga karuyag nira patayon? Pero kitaa! Nagyayakan hiya ha publiko ngan waray hira ginsisiring ha iya. Diri gud maaram an mga lider nga hiya an Kristo, diri ba?” Iginsaysay hito nga mga taga-Jerusalem kon kay ano nga diri hira natoo nga hi Jesus an Kristo: “Maaram kita kon diin tikang ini nga tawo; pero kon umabot an Kristo, waray mahibabaro kon diin hiya tikang.”

Hi Jesus binaton: “Kilala niyo ako ngan maaram kamo kon diin ako tikang. Ngan kinanhi ako diri ha akon la kaburut-on, kondi ginsugo ako han Dios ngan diri kamo nakilala ha iya. Kilala ko hiya kay ako an iya representante, ngan Hiya an nagsugo ha akon.” Salit nangalimbasog hira pag-aresto ha iya, bangin basi prisuhon hiya o patayon. Kondi waray hira maglampos kay diri pa ito an oras nga mamatay hi Jesus.

Pero damu an tinoo ha iya, ngan husto gud ito. Syempre, naglakat hiya ha tubig, ginpakalma an makusog nga hangin ngan mabalud nga dagat, milagroso nga ginpakaon an yinukot pinaagi hin pipira nga tinapay ngan isda, gintambal an mga may sakit, ginpalakat an mga piay, ginpukrat an mata han mga buta, gintambal an mga may liprosi, ngan ginbanhaw pa ngani an mga patay. Salit nagpakiana hira: “Hiya an Kristo, kay waray magbubuhat hin mas damu pa nga milagro kay ha ginbuhat hini nga tawo, diri ba?”

Han hinbatian ito han mga Pariseo, hira ngan an punoan nga mga saserdote nagsugo hin mga opisyal basi arestuhon hi Jesus. Juan 7:11-32.

▪ Kakan-o inabot hi Jesus ha piyesta, ngan ano an hurobhurob han mga tawo mahitungod ha iya?

▪ Kay ano nga an iba nagsiring nga hi Jesus may demonyo?

▪ Para ha mga taga-Jerusalem, hin-o hi Jesus?

▪ Kay ano nga damu an tinoo kan Jesus?