Kapitulo 21

Ha Sinagoga ha Bungto ni Jesus

NALIPAY gud an mga taga-Nazaret han inuli hi Jesus. Antes hiya binaya basi magpabawtismo kan Juan sobra usa ka tuig na an naglabay, kilala hiya sugad nga panday. Pero yana, kilala na hiya ha bisan diin sugad nga magburuhat hin milagro. Eksayted gud an iya mga kahimungto nga himoon niya ha ira lugar an pipira hito nga mga milagro.

Mas nagin eksayted gud hira han tipakadto hi Jesus ha sinagoga, sugad han iya nabatasan. Han panahon na ha pagbasa han Kasuratan, tinindog hiya basi magbasa, ngan iginhatag ha iya an linukot nga basahon ni propeta Isaias. Nakita niya kon diin iginsurat an mahitungod han Usa nga ginpili ni Jehova pinaagi han espiritu, nga mababasa ha kapitulo 61 ha Biblia.

Katapos basahon kon paonan-o hini nga Usa igpapasamwak an kagawasan han mga bihag, an pagpahiuli han pagkita han mga buta, ngan an mahitungod han panahon nga makakarawat utro nira an bendisyon ni Jehova, iginbalik ni Jesus an linukot nga basahon ha kabulig ngan liningkod. Ginkinita hiya han ngatanan nga tawo. Katapos nagyakan hiya, posible hin mauruiha, basi magsaysay: “Yana nga adlaw natuman ini nga kasuratan nga iyo pa la nabatian.”

Nahipausa gud an mga tawo ha iya “makaruruyag nga mga pulong” ngan nagsiring hira: “Diri ba anak hiya ni Jose?” Maaram hi Jesus nga karuyag nira nga maghimo hiya hin mga milagro, salit nagsiring hiya: “Sigurado nga ako an iyo ginhuhunahuna hini nga puplunganon: ‘Doktor, tambala an imo kalugaringon,’ ngan masiring kamo ha akon: ‘Hinbatian namon an imo ginbuhat ha Capernaum, salit buhata liwat ito dinhi ha imo lugar.’” Matin-aw nga naghuhunahuna an mga amyaw hadto ni Jesus nga an pagtambal sadang tikangan ha iya lugar, basi an iya mga kahimungto an siyahan nga magpahimulos. Salit para ha ira, ginbalewaray hira ni Jesus.

Tungod kay maaram hi Jesus han ira ginhuhunahuna, nag-istorya hiya hin mga nahitabo hadto. Siring niya nga damu an balo nga babaye ha Israel ha panahon ni Elias, pero waray hiya sugoa ngadto ha ira. Lugod, ginpakadto hiya ha diri-Israelita nga balo ha Sidon. Didto nagbuhat hiya hin milagro nga nagtalwas hin kinabuhi. Ha panahon ni Eliseo, damu liwat an may liprosi ha Israel, pero hi Naaman la nga taga-Sirya an iya gintambal.

Nasina an mga nakadto ha sinagoga kay waray nira maruyagi ito nga pagtanding nga nagbubuhayhag han ira kahakog ngan kawaray pagtoo, salit nanindog hira ngan gindara hi Jesus ngadto ha gawas han syudad. Didto ha may pangpang han bukid nga hinmumutangan han Nazaret, nangalimbasog hira paghulog ha iya. Pero nakapalagiw hi Jesus ngan talwas nga binaya. Lucas 4:16-30; 1 Hadi 17:8-16; 2 Hadi 5:8-14.

▪ Kay ano nga nalipay gud an mga taga-Nazaret?

▪ Ano an reaksyon han mga tawo mahitungod han iginsaysay ni Jesus, pero kay ano nga nasina gud hira?

▪ Ano an ginpangalimbasogan han mga tawo nga buhaton kan Jesus?