Kapitulo 132

Ha Too nga Kamot han Dios

AN PAGBUHOS han baraan nga espiritu han Pentekostes nagpapamatuod nga inabot na hi Jesus ha langit. Waray pag-iha, an bisyon nga iginpakita ha disipulo nga hi Esteban nagpapamatuod liwat nga inabot na Hiya didto. Antes batuhon hi Esteban tungod han iya matinumanon nga pagpamatuod, nagsiring hiya: “Nakikita ko an langit nga naabrihan ngan an Anak han tawo nga natindog ha too han Dios!”

Samtang hi Jesus nakada ha too nga kamot han Dios, naghuhulat hiya nga sugoon han iya Amay: “Maghadi ka ha butnga han imo mga kaaway.” Pero samtang naghuhulat, tubtob nga gumios hiya kontra ha iya mga kaaway, ano an iya ginbubuhat? Ginmamandoan niya an iya dinihogan nga mga disipulo, gin-gigiyahan hira ha pagsangyaw, ngan igin-aandam hira nga magin mga hadi kaupod niya ha Ginhadian han iya Amay kon banhawon na hira.

Pananglitan, ginpili ni Jesus hi Saul (mas nakilala ha iya Romano nga ngaran nga Pablo) basi manguna ha pagbulig ha mga tawo ha iba nga nasud nga magin mga disipulo. Masinugtanon hi Pablo ha Balaud han Dios, pero natutdoan hiya hin sayop han Judio nga mga lider han relihiyon. Tungod hito, diri la kay inuyon hiya nga patayon hi Esteban, kinadto liwat hiya ha Damasco dara an awtorisasyon tikang ha hitaas nga saserdote nga hi Caifas basi arestuhon ngan dad-on ha Jerusalem an bisan hin-o nga kalalakin-an ngan kababayin-an nga sumurunod ni Jesus. Pero samtang nagbabaktas hi Saul, tigda la nga may lamrag nga nagsanag ha iya palibot ngan natumba hiya.

Katapos may nagpakiana pero diri niya nakikita: “Saul, Saul, kay ano nga gintitimaraot mo ako?” Nagpakiana hi Saul: “Hin-o ka, Ginoo?”

“Ako hi Jesus, nga imo gintitimaraot,” binaton ito.

Nabuta hi Saul tungod han milagroso nga lamrag. Ginpakadto hiya ni Jesus ha Damasco ngan ginpahulat han ihahatag nga mga instruksyon. Katapos, nagpakita hi Jesus ha iya disipulo nga hi Ananias pinaagi hin bisyon. Nagsiring hiya kan Ananias mahitungod kan Saul: ‘Ini nga tawo sugad hin surudlan nga akon ginpili nga magdara han akon ngaran ngadto ha mga nasud pati ha mga hadi ngan ha mga anak ni Israel.’

Oo, pinaagi han bulig ni Jesus, hi Saul (nga Pablo na yana) ngan an iba nga ebanghelisador naglampos gud ha ira pagsangyaw ngan panutdo. Ha pagkamatuod, mga 25 ka tuig katapos magpakita hi Jesus ha iya ha dalan ngadto ha Damasco, iginsurat ni Pablo nga an “maopay nga sumat” ‘naisangyaw na ha ngatanan nga hinimo han Dios ha ilarom han langit.’

Paglabay han damu nga katuigan, sunod-sunod nga bisyon an iginpakita ni Jesus ha iya hinigugma nga apostol nga hi Juan. Pinaagi hini nga mga bisyon nga iginsaysay ni Juan ha libro nga Pahayag ha Biblia, sugad hin buhi hiya ngan nakita an pagbalik ni Jesus ha pagmando ha Ginhadian. Nagsiring hiya nga “pinaagi han baraan nga espiritu” gindara hiya ngadto ha tidaraon ha “adlaw han Ginoo.” Ano ito nga “adlaw”?

Pinaagi han maopay nga pag-aram han mga tagna ha Biblia, pati han tagna mismo ni Jesus mahitungod ha kataposan nga mga adlaw, hibabaroan nga an “adlaw han Ginoo” nagtikang ha makasaysayan gud nga tuig han 1914! Salit nahitabo han 1914 an diri nakikita nga pagbalik ni Jesus. Waray ito ig-anunsyo ha publiko ngan an iya magtinumanon nga surugoon la an maaram han iya pagbalik. Hito nga tuig, ginsugo hiya ni Jehova nga maghadi na ha butnga han iya mga kaaway!

Ginsunod ni Jesus an sugo han iya Amay, salit iya ginlimpyohan an langit pinaagi ha paglabog kan Satanas ngan han iya mga demonyo nganhi ha tuna. Katapos makita ni Juan ha iya bisyon ini nga hitabo, nakabati hiya hin tingog ha langit nga nasiring: “Yana nahitabo na an katalwasan, ngan an pagpakita han gahum, ngan an kaestablisar han Ginhadian han aton Dios, ngan an paggamit han awtoridad han iya Kristo.” Oo, nagtikang pagmando an Kristo sugad nga Hadi han 1914!

Maopay nga sumat gud ito para ha mga magsiringba ni Jehova ha langit! Gin-aghat hira: “Magkalipay kamo, kamo nga mga langit ngan kamo nga naukoy dida!” Pero ano an magigin kahimtang han mga aanhi ha tuna? “Kairo han tuna ngan han dagat,” siring hito nga tingog, “kay an Yawa linusad ha iyo nga may daku nga kasina, kay maaram hiya nga halipot na la an iya panahon.”

Nagkikinabuhi na kita durante hiton halipot nga panahon. Iginpapakita yana han mga tawo kon kwalipikado hira makasulod ha bag-o nga kalibotan han Dios o kon mabubungkag. Ha pagkamatuod, an imo kabubuwason nadepende han imo reaksyon ha maopay nga sumat han Ginhadian han Dios nga iginsasangyaw ha bug-os nga tuna pinaagi han paggiya han Kristo.

Katapos hito, gagamiton han Dios hi Jesu-Kristo ha pagbungkag han bug-os nga sistema ni Satanas dinhi ha tuna ngan han ngatanan nga nasuporta hito. An ngatanan nga karaotan wawad-on ni Jesus ha girra nga gintatawag ha Biblia nga Har–Magedon, o Armagedon. Katapos, hi Satanas ngan an iya mga demonyo dadakpon ni Jesus, an pinakaharangdon nga Persona ha uniberso nga ikaduha kan Jehova nga Dios. Gagapuson hira ni Jesus ha sulod hin 1,000 ka tuig didto ha “kahiladman,” karuyag sidngon, ha kahimtang nga sugad hin patay nga waray mahihimo. Buhat 7:55-60; 8:1-3; 9:1-19; 16:6-10; Salmo 110:1, 2; Hebreo 10:12, 13; 1 Pedro 3:22; Lucas 22:28-30; Colosas 1:13, 23; Pahayag 1:1, 10; 12:7-12; 16:14-16; 20:1-3; Mateo 24:14.

▪ Han sinaka hi Jesus ha langit, diin hiya nakapwesto, ngan ano an iya ginhuhulat?

▪ Katapos sumaka hi Jesus ha langit, hin-o an iya ginmamandoan? Paonan-o nakikita ito nga iya pagmando?

▪ Kakan-o nagtikang an “adlaw han Ginoo”? Ano an nahitabo ha tinikangan hito?

▪ Paonan-o an pagsangyaw nga nagpapadayon yana personal nga nakakaapekto ha tagsa ha aton?

▪ Kon matapos na an pagsangyaw, ano an sunod nga mahitatabo?