Kapitulo 82

Hi Jesus Nagbiyahe Utro Ngadto ha Jerusalem

WARAY pag-iha, nagbiyahe na liwat hi Jesus basi manutdo ha tagsa nga syudad ngan baryo. Posible nga aadto hiya ha distrito han Perea, ha tabok han Salog Jordan tikang ha Judea. Pero tipakadto hiya ha Jerusalem.

Sumala ha pilosopiya han mga Judio gutiay la an matatalwas. Bangin ito an hinungdan nga nagpakiana an usa nga lalaki: “Ginoo, gutiay la ba an matatalwas?” An baton ni Jesus nag-aghat ha mga tawo nga hunahunaon an ginkikinahanglan basi matalwas: “Paniguro gud [karuyag sidngon, mangalimbasog o manalinguha] kamo pagsulod ha haligot nga purtahan.”

Kinahanglan magin apurado hito kay siring ni Jesus, “damu an mangangalimbasog pagsulod pero diri hira makakahimo.” Kay ano? Hiya nagsaysay nga ‘pagbuhát han tagbalay ngan pagtrangkahi han purtahan, an mga tawo nga natindog ha gawas ngan nagtutuktok ha purtahan, nasiring, “Ginoo, abrihi kami.” Pero mabaton hiya: “Diri ako maaram kon diin kamo tikang. Iwas ha akon, kamo ngatanan nga magburuhat hin karaotan!”’

Posible nga an mga nasadhan inabot ha oras nga kombinyente la ha ira. Pero hito nga oras ginsadhan ngan gintrangkahan na an purtahan salit waray na oportunidad nga makasulod. Inabot unta hira hin temprano bisan kon diri kombinyente ha ira. Oo, makasurubo gud an mahitatabo ha mga tawo nga diri gin-uuna ha ira kinabuhi an pagsingba kan Jehova!

Hi Jesus ginsugo basi magserbi ha mga Judio, pero kadam-an ha ira an nagbalewaray ha maopay gud nga oportunidad nga karawaton an tagana han Dios basi matalwas. Salit nagsiring hi Jesus nga mananangis hira ngan mangingigot an mga ngipon kay ginpagawas hira. Ha luyo nga bahin, an mga tawo nga “tikang ha este, weste, norte, ngan sur,” oo, tikang ha ngatanan nga nasud, ‘malingkod ha may lamesa ha Ginhadian han Dios.’

Nagsiring pa hi Jesus: “May mga nauurhi [an tinamay nga mga diri-Judio, pati an tinalumpigos nga mga Judio] nga mahiuuna, ngan may mga nahiuuna [an mga Judio nga riko ngan may katungdanan ha relihiyon] nga mauurhi.” An ira pagin urhi nangangahulogan nga an sugad nga mga tawo nga hubya ngan diri mapasalamaton diri gud makakasulod ha Ginhadian han Dios.

May inabot nga mga Pariseo ngan nagsiring kan Jesus: “Gawas ngan iwas dinhi, kay karuyag ni Herodes [Antipas] nga patayon ka.” Bangin kan Herodes nagtikang ito nga hurobhurob basi bumaya hi Jesus. Posible nga nahahadlok hiya nga mahidabi ha kamatay han usa pa nga propeta han Dios sugad han kahidabi niya ha pagpatay kan Juan nga Parabaptis. Pero ginsidngan ni Jesus an mga Pariseo: “Kadto kamo ngan sumati ito nga garong, ‘Pamati! Nagpapagawas ako hin mga demonyo ngan nananambal yana pati buwas, ngan ha ikatulo ka adlaw matatapos ako.’”

Han natapos ni Jesus an iya buruhaton didto, nagpadayon hiya pagbiyahe ngadto ha Jerusalem kay iginsaysay niya nga “an usa nga propeta diri puydi patayon ha gawas han Jerusalem.” Kay ano nga ginlalaoman nga papatayon hi Jesus ha Jerusalem? Tungod kay ito an kapital nga syudad nga hinmumutangan han Sanhedrin, an korte suprema, nga may 71 nga membro ngan didto iginhahalad an mga hayop. Salit diri puydi patayon “an Kordero han Dios” ha iba nga lugar kondi ha Jerusalem la.

Masurub-on nga nagsiring hi Jesus: “Jerusalem, Jerusalem, an parapamatay han mga propeta ngan nagbabato han mga ginsugo ngada ha imo! Makadamu ako nangalimbasog nga tirukon an imo mga anak, sugad hin ugang nga nagtitirok han iya mga pisô ha ilarom han iya mga pako, pero diri kamo naruruyag! Kitaa! Babayaan han Dios an iyo balay.” Ginhukman ito nga nasud kay iginsalikway nira an Anak han Dios!

Samtang tipakadto hi Jesus ha Jerusalem, gin-imbitar hiya ngadto ha balay han usa nga lider han mga Pariseo. Adlaw adto han Sabbath, ngan ginbibinantayan gud hiya han mga tawo, kay may lalaki didto nga nanhuhupong, nga posible ha iya mga kamot ngan mga tiil. Ginpakianhan ni Jesus an mga Pariseo ngan an mga eksperto ha Balaud nga nakadto: “Uyon ba ha Balaud an pagtambal ha adlaw han Sabbath o diri?”

Waray hira bumaton. Salit gintambal ni Jesus an lalaki ngan ginpalakat. Katapos ginpakianhan hira: “Hin-o ha iyo an diri makadto dayon basi kuhaon an iya anak o toro kon mahulog ito ha atabay ha adlaw han Sabbath?” Waray na liwat hira makabaton. Lucas 13:22–14:6; Juan 1:29.

▪ Sumala kan Jesus, ano an ginkikinahanglan basi matalwas? Kay ano nga damu an waray makasulod?

▪ Hin-o an “nauurhi” nga mahiuuna, ngan an “nahiuuna” nga mauurhi?

▪ Kay ano nga bangin kan Herodes nagtikang an hurobhurob nga karuyag niya patayon hi Jesus?

▪ Kay ano nga diri puydi patayon ha gawas han Jerusalem an usa nga propeta?