Kapitulo 99

Hi Jesus Nagtutdo ha Jerico

WARAY pag-iha, hi Jesus ngan an damu nga tawo nga kaupod niya ha pagbiyahe inabot ha syudad han Jerico, nga mga usa ka adlaw nga baraktason tikang ha Jerusalem. Posible nga duha ka syudad an Jerico, an daan nga Judio nga syudad nga mga usa ngan tunga ka kilometro an distansya tikang ha bag-o nga Romano nga syudad. Samtang nagawas an damu nga tawo tikang ha daan nga syudad ngan hirani na ha bag-o nga syudad, duha nga buta nga makililimos an nakabati han karigumok. Bartimeo an ngaran han usa ha ira.

Han hinbaroan nira nga hi Jesus an naagi, hi Bartimeo ngan an iya kaupod nagsinggit: “Ginoo, Anak ni David, malooy ka ha amon!” Ginsidngan hira han mga tawo nga diri mag-inaringasa, pero nagtikadaku la lugod an ira pagsinggit: “Ginoo, Anak ni David, malooy ka ha amon!”

Hinbatian ni Jesus nga may nagsisininggit, salit inundang hiya. Nagsugo hiya ha iya mga kaupod nga dad-on ha iya an mga nagsisininggit. Kinadto hira ha mga buta nga makililimos ngan nagsiring ha usa ha ira: “Magmarig-on ka! Buhát, kay gintatawag ka niya.” Tungod han duro nga kalipay, iginwaklit han buta an iya pantungbaw nga panapton, tinindog dayon ngan dinaop kan Jesus.

“Ano an karuyag mo nga buhaton ko para ha imo?” nagpakiana hi Jesus.

“Ginoo, pukrata an amon mga mata,” nakimalooy an duha nga buta.

Tungod ha kalooy ginkaptan niya an ira mga mata. Sumala ha asoy ni Marcos, ginsidngan ni Jesus an usa ha ira: “Lakat, tungod han imo pagtoo nag-opay ka.” Nakakita dayon hira, ngan sigurado nga gindinayaw nira an Dios. Han nakita han mga tawo an nahitabo, gindayaw liwat nira an Dios. Inupod dayon kan Jesus hi Bartimeo ngan an iya kaupod.

Han naagi hi Jesus ha Jerico, damu gud an mga tawo. Karuyag makita han ngatanan an nagtambal ha buta nga kalalakin-an. Ginsusuok hiya han mga tawo, salit diri gud hiya nakikita han iba. Usa ha ira amo hi Sakeo nga punoan nga parasukot hin buhis ha sulod ngan ha palibot han Jerico. Tungod kay habubo hiya, diri niya nakikita an nahitatabo.

Salit dinalagan hi Sakeo ha unhan ngan sinaka ha kahoy nga igera ha dalan nga aagian ni Jesus. Ha iya pwesto, nakikita niya hin maopay an ngatanan. Han hirani na hi Jesus ngan an mga tawo, hinangad hiya ha may kahoy ngan nagsiring: “Sakeo, lusad dayon kay makadto ako yana ha imo balay.” Salit malipayon nga linusad hiya ngan nagdagmit pag-uli basi mag-andam para ha iya importante nga bisita.

Pero han nakita ito han mga tawo, nagngurutob hira. Para ha ira diri husto nga magin bisita hi Jesus han sugad hito nga tawo. Maaram ka, hi Sakeo nagriko kay nanunukot hiya hin buhis ha malimbong nga paagi.

Damu an nagsisinunod kan Jesus, ngan pagsulod niya ha balay ni Sakeo, nagreklamo hira: “Binisita hiya ha balay han usa nga makasasala.” Pero nakita ni Jesus nga may posibilidad nga magbasol hi Sakeo. Ngan waray gud hiya magsayop, kay tinindog hi Sakeo ngan nagsiring: “Kitaa, Ginoo! Ihahatag ko ha mga pobre an katunga han akon mga panag-iya, ngan anoman nga nakuha ko tikang ha bisan hin-o pinaagi han buwa nga akusasyon, ibabalik ko hin upat ka pilo.”

Iginpakita ni Sakeo nga totoo an iya pagbasol. Ihahatag niya ha mga pobre an katunga han iya mga panag-iya ngan an katunga hito iya ibabalik ha iya mga nalimbongan. Posible nga makikita niya ha iya mga rekord han buhis kon pira an iya nakuha ha mga tawo. Salit nagsaad hiya nga upat ka pilo an iya ibabalik, sugad nga pagsunod ha balaud han Dios nga nasiring: ‘Kon may lalaki nga mangawat hin karnero, magbabayad hiya hin upat nga karnero para han usa nga karnero.’

Nalipay hi Jesus ha saad ni Sakeo nga ihahatag an iya mga panag-iya, kay Hiya nagsiring: “Yana nga adlaw an katalwasan inabot hini nga panimalay kay anak ka liwat ni Abraham. Tungod kay an Anak han tawo kinanhi basi bilngon ngan talwason an nawara.”

Diri pa la maiha, gin-istorya ni Jesus an kahimtang han “nawara” nga waldas nga anak. Yana may ehemplo kita han usa nga aktuwal nga nawara nga hin-agian. Bisan kon an mga lider han relihiyon ngan an ira mga sumurunod nagngurutob ngan nagreklamo tungod han paghatag ni Jesus hin atensyon ha mga tawo nga pariho kan Sakeo, padayon nga ginpamiling ngan iginpahiuli niya ini nga mga anak ni Abraham nga nawawara. Mateo 20:29-34; Marcos 10:46-52; Lucas 18:35–19:10; Eksodo 22:1.

▪ Diin posible nakita ni Jesus an mga buta nga makililimos, ngan ano an iya ginbuhat ha ira?

▪ Hin-o hi Sakeo, ngan kay ano nga sinaka hiya ha kahoy?

▪ Paonan-o iginpakita ni Sakeo nga nagbabasol hiya?

▪ Ano nga leksyon an aton mahibabaroan ha pagtratar ni Jesus kan Sakeo?