Kapitulo 96

Hi Jesus Ngan an Riko nga Batan-on nga May Awtoridad

HAN naagi hi Jesus ha distrito han Perea samtang tipakadto ha Jerusalem, usa nga batan-on nga lalaki an dinalagan ngadto ha iya ngan linuhod ha iya atubangan. Ito nga lalaki ginkikilala nga may awtoridad, bangin tungod kay may hitaas nga posisyon hiya ha ira sinagoga o bangin membro pa ngani han Sanhedrin. Riko liwat hiya hinduro. “Maopay nga Magturutdo,” nagpakiana hiya, “ano an kinahanglan ko buhaton basi mapanunod an kinabuhi nga waray kataposan?”

“Kay ano nga gintatawag mo ako nga maopay?” binaton hi Jesus. “Waray iba nga maopay kondi an Dios la.” Posible nga gin-gamit han batan-on an “maopay” sugad nga titulo, salit ginsidngan hiya ni Jesus nga ito nga titulo para la ha Dios.

Nagsiring pa hi Jesus: “Pero kon karuyag mo makarawat an kinabuhi, padayon nga tumana an mga sugo.”

“Hain hito nga mga sugo?” nagpakiana hiya.

Sugad nga baton, gin-unabi ni Jesus an lima han Napulo nga Sugo: “Diri ka magpatay, diri ka mag-adulteryo, diri ka mangawat, diri ka magtestigo hin buwa; pasidunggi an imo tatay ngan an imo nanay.” Ngan nagdugang hiya hin mas importante nga sugo: “Higugmaa an imo igkasi-tawo sugad ha imo kalugaringon.”

“Ginbubuhat ko na ito ngatanan,” sinsero nga binaton an lalaki. “Ano pa an akon kulang?”

Pakabati ni Jesus han iya sinsero gud nga hangyo, inabat hiya hin gugma ha iya. Pero naobserbaran ni Jesus nga gin-aawilan han lalaki an iya mga panag-iya salit ginsumatan hiya kon ano an kinahanglan buhaton: “Usa an kulang ha imo: Lakat, ibaligya an imo mga gintatag-iya ngan ihatag ha mga pobre, ngan magkakaada ka bahandi ha langit, ngan kadi, sunod ha akon.”

Sigurado nga nalooy hi Jesus samtang ginkikita niya an lalaki nga nabuhat ngan nabaya nga masurub-on gud. Waray makita han lalaki an pagkabirilhon han totoo nga bahandi kay nabutahan hiya han iya karikohan. Salit nasusubo nga nagsiring hi Jesus: “Makuri gud makasulod ha Ginhadian han Dios an mga tawo nga damu an kwarta!”

Nahipausa an mga disipulo ha iya ginsiring. Pero mas nahipausa hira han gin-unabi niya an kasagaran nga nahitatabo: “Mas masayon pa an kamel makalusot ha luho han dagum kay ha makasulod ha Ginhadian han Dios an riko nga tawo.”

“Hin-o man la an matatalwas?” nagpakiana an mga disipulo.

Ginkita hira ni Jesus ngan ginsidngan: “Ha mga tawo imposible ito, pero ha Dios diri, kay an ngatanan posible ha Dios.”

An ginpili nira iba gud han ginpili han riko nga batan-on nga may awtoridad, amo nga nagsiring hi Pedro: “Kitaa! Ginbayaan namon an ngatanan ngan nagsisinunod ha imo.” Salit nagpakiana hiya: “Ano an makakarawat namon?”

Nagsaad hi Jesus: “Kon bag-uhon na an ngatanan, ha panahon nga an Anak han tawo lumingkod ha iya mahimayaon nga trono, kamo nga nasunod ha akon malingkod liwat ha 12 nga trono ngan maghuhukom ha 12 nga tribo han Israel.” Karuyag niya ipasabot nga babag-uhon an ngatanan nga kahimtang ha tuna basi magin pariho hadto ha hardin han Eden. Ngan hi Pedro pati an iba nga disipulo magmamando upod han Kristo ha bug-os-tuna nga Paraiso sugad nga balos ha ira. Oo, an sugad kadaku nga balos takos gud han bisan ano nga sakripisyo!

Pero bisan yana may-ada na mga balos, sugad han iginpatin-aw ni Jesus: “Bisan hin-o nga binaya ha balay o kabugtoan o nanay o tatay o mga anak o kaumhan tungod ha akon ngan han maopay nga sumat makarawat yana nga panahon hin 100 ka pilo nga balay, kabugtoan, nanay, anak, ngan kaumhan, pati mga pagtimaraot, ngan ha maabot nga sistema kinabuhi nga waray kataposan.”

Sugad han iginsaad ni Jesus, bisan diin kumadto an iya mga disipulo, malilipay hira ha pagkaada mas duok ngan presyoso nga relasyon ha mga igkasi-Kristiano kay han ira mga kapamilya mismo. Pero an riko nga batan-on nga may awtoridad posible nga nawad-an hini nga balos ngan han kinabuhi nga waray kataposan ha Ginhadian han Dios ha langit.

Nagsiring pa hi Jesus: “Pero damu nga nahiuuna an mahiuurhi, ngan an nahiuurhi mahiuuna.” Ano an iya karuyag sidngon?

Karuyag niya sidngon nga damu nga “nahiuuna” ha pagkaada hin mga pribilehiyo ha relihiyon, pariho han riko nga batan-on nga may awtoridad, an diri makakasulod ha Ginhadian. “Mahiuurhi” hira. Pero damu nga tawo, upod na an mapainubsanon nga mga disipulo ni Jesus, nga ginmiminos han nagpapakamatadong nga mga Pariseo sugad nga “nahiuurhi”—sugad nga mga tawo han tuna, o ‛am ha·’aʹrets—an “mahiuuna.” An ira pagin “nahiuuna” nangangahulogan nga makakapribilehiyo hira nga magin mga igkasi-magmarando han Kristo ha Ginhadian. Marcos 10:17-31; Mateo 19:16-30; Lucas 18:18-30.

▪ Ano an posible nga awtoridad han riko nga batan-on?

▪ Kay ano nga diniri hi Jesus nga tawagon nga “maopay”?

▪ Sugad han nahitabo ha batan-on nga may awtoridad, kay ano nga peligroso an pagin riko?

▪ Ano nga mga balos an iginsaad ni Jesus ha iya mga sumurunod?

▪ Paonan-o an nahiuuna mahiuurhi, ngan an nahiuurhi mahiuuna?