Kapitulo 7

Hi Jesus Ngan an mga Astrologo

MAY mga lalaki tikang ha Este nga mga astrologo—nag-aangkon nga nakakainterpretar han posisyon han mga bitoon. Han nakadto pa hira ha Este, nakakita hira hin bag-o nga bitoon, ngan ginsundan nira ito hin ginatos ka kilometro ngadto ha Jerusalem.

Pag-abot nira ha Jerusalem, nagpakiana hira: “Hain an natawo nga hadi han mga Judio? Nakita namon an iya bitoon han nakadto kami ha Este, salit kinanhi kami basi magyukbo ha iya.”

Han hinbatian ito ni Hadi Herodes ha Jerusalem, nasina gud hiya. Salit iginpatawag niya an punoan nga mga saserdote ngan ginpakianhan kon diin matatawo an Kristo. Binaton hira basado ha Kasuratan: “Ha Betlehem.” Iginpatawag dayon ni Herodes an mga astrologo ngan ginsidngan: “Kadto kamo, pamilnga hin maopay an bata, ngan kon makita niyo hiya, balik kamo ngan sumati ako basi makakadto liwat ako ngan magyukbo ha iya.” Pero an totoo, karuyag ni Herodes nga mabilngan an bata basi patayon!

Pagbaya nira, may urusahon nga nahitabo. An bitoon nga ira nakita ha Este naggiya ha ira. Sigurado nga diri ito ordinaryo nga bitoon, lugod may nagpahinabo hito basi giyahan hira. Ginsinundan ito han mga astrologo tubtob nga inundang ito ha igbaw han balay nira Jose ngan Maria.

Pagsulod han mga astrologo ha balay, nakita nira hi Maria pati an iya anak, an bata nga hi Jesus. Ngan yinukbo hira ha bata. Ginkuha liwat nira ha surudlan an ira mga regalo nga bulawan, busag nga insenso, ngan mira. Katapos, han tibalik na hira basi sumatan hi Herodes kon hain an bata, ginpahamangnoan hira han Dios pinaagi hin inop nga diri ito buhaton. Salit pagtipauli nira, iba na an ira gin-agian.

Ha imo paghunahuna, hin-o an nagpahinabo hito nga bitoon nga nagkikiwa basi giyahan an mga astrologo? Hinumdumi, waray hira direkta nga giyahi hito ngadto kan Jesus ha Betlehem. Lugod, gin-giyahan hira hito ngadto ha Jerusalem diin nakaistorya nira hi Hadi Herodes, nga naruruyag pagpatay kan Jesus. Ngan ito gud unta an iya bubuhaton kon waray pahamangnoi han Dios an mga astrologo nga diri hiya sumatan kon hain hi Jesus. Matin-aw nga an kaaway han Dios, hi Satanas nga Yawa, an naruruyag nga mamatay hi Jesus, ngan gin-gamit niya ito nga bitoon basi matuman an iya katuyoan. Mateo 2:1-12; Mika 5:2.

▪ Kay ano nga diri ordinaryo nga bitoon an nakita han mga astrologo?

▪ Nakain hi Jesus han nakit-an hiya han mga astrologo?

▪ Kay ano nga masisiring naton nga hi Satanas an nagpahinabo han bitoon nga naggiya ha mga astrologo?