Kapitulo 18

Hi Juan Naiibanan, hi Jesus Nadudugangan

KATAPOS han Paskua ha katsaringsing han 30 C.E., binaya ha Jerusalem hi Jesus ngan an iya mga disipulo. Kondi waray hira umuli ha ira tagsa-tagsa nga balay ha Galilea, lugod kinadto hira ha distrito han Judea, diin nanbawtismo hira. Hi Juan nga Parabaptis nanbabawtismo liwat mga usa ka tuig na, ngan may mga disipulo pa hiya nga nag-iinupod ha iya.

Diri hi Jesus an aktuwal nga nagbabawtismo kondi an iya mga disipulo uyon ha iya instruksyon. An kahulogan han ira pagbawtismo pariho han kan Juan, nagsisimbolo ito ha pagbasol han mga Judio ha ira mga sala kontra ha ginkasabotan nga Balaud han Dios. Pero katapos banhawon hi Jesus, ginsugo niya an iya mga disipulo nga manbawtismo nga iba na an kahulogan. An bawtismo han Kristiano yana nagsisimbolo han paghatag han kalugaringon ha pag-alagad kan Jehova nga Dios.

Ha tinikangan han ministeryo ni Jesus, bisan kon magkabulag hira ni Juan, nanunutdo ngan nanbabawtismo hira ha mga mabinasulon. Kondi nangabugho an mga disipulo ni Juan ngan nagreklamo mahitungod kan Jesus: “Rabbi, . . . kitaa, nanbabawtismo hiya ngan an ngatanan napakadto ha iya.”

Imbes nga mangabugho, nalipay hi Juan ha kalamposan ni Jesus ngan karuyag liwat niya nga malipay an iya mga disipulo. Ginpahinumdom niya hira: “Kamo mismo mga testigo nga nagsiring ako, Diri ako an Kristo, kondi ginsugo ako nga mag-una ha iya.” Katapos naghatag hiya hin maopay nga ilustrasyon: “An tag-iya han maarasawa amo an karaslon nga lalaki. Pero an sangkay han karaslon nga lalaki nga natindog hirani han karaslon nalilipay gud kon nakakabati han iya tingog. Salit daku gud ini nga akon kalipay.”

Hi Juan, sugad nga sangkay han Karaslon nga Lalaki, nalipay gud han iginpakilala niya kan Jesus an iya mga disipulo mga unom ka bulan na an naglabay. An iba ha ira may paglaom nga magin membro han langitnon nga maarasawa nga klase han Kristo nga ginkukompwesto han mga Kristiano nga dinihogan han espiritu. Karuyag ni Juan nga an iya mga disipulo magin sumurunod liwat ni Jesus, kay katuyoan niya nga iandam an dalan para ha kalamposan han ministeryo han Kristo. Sugad han iginsaysay ni Juan nga Parabaptis: “Hiya padayon nga madudugangan, pero ako padayon nga maiibanan.”

An bag-o nga disipulo ni Jesus nga hi Juan, nga disipulo liwat hadto ni Juan nga Parabaptis, nagsurat mahitungod han gintikangan ni Jesus ngan han Iya importante nga papel ha katalwasan han katawohan. Nagsiring hiya: “An napakanhi tikang ha igbaw amo an labaw ha ngatanan. . . . Hinigugma han Amay an Anak ngan gintagan hiya hin awtoridad ha ngatanan nga butang. An nagpapakita hin pagtoo ha Anak may kinabuhi nga waray kataposan; an diri nasugot ha Anak diri magkakaada hin kinabuhi, kondi padayon nga kangangalasan hiya han Dios.”

Waray pag-iha katapos hisgotan ni Juan nga Parabaptis an kaibani han iya buruhaton, gin-aresto hiya ni Hadi Herodes. Gin-asawa ni Herodes hi Herodias nga asawa ni Felipe nga iya bugto. Han iginbuhayhag ni Juan ha publiko an sayop nga ginbuhat ni Herodes, iginpapriso hiya. Pakabati ni Jesus nga gin-aresto hi Juan, binaya hiya ha Judea ngan kinadto ha Galilea upod an iya mga disipulo. Juan 3:22–4:3; Buhat 19:4; Mateo 28:19; 2 Corinto 11:2; Marcos 1:14; 6:17-20.

▪ Ano an kahulogan han panbawtismo uyon ha instruksyon ni Jesus antes han iya pagkabanhaw? Ngan katapos han iya pagkabanhaw?

▪ Paonan-o iginpakita ni Juan nga diri angay magreklamo an iya mga disipulo?

▪ Kay ano nga ginpriso hi Juan?