Kapitulo 59

Hin-o Gud ba hi Jesus?

HAN dinuong ha Betsaida an baluto nga ginsasakyan ni Jesus ngan han iya mga disipulo, gindara ha iya han mga tawo an buta nga lalaki, ngan nakimalooy hira nga kaptan hiya ni Jesus ngan tambalon. Ginkaptan hiya ni Jesus ha kamot ngan gintugwayan ngadto ha gawas han baryo. Katapos luraan an iya mga mata ginpakianhan hiya: “May-ada ka ba nakikita?”

“Nakakakita ako hin mga tawo,” siring han lalaki, “kay baga hin may mga kahoy, pero nagkakalakat hira.” Ginkaptan ni Jesus an mga mata han lalaki, salit nakakita na hiya hin klaro. Katapos ginpauli hiya ni Jesus ngan ginsidngan nga diri sumulod ha syudad.

Yana hi Jesus ngan an mga disipulo makadto na ha mga baryo han Cesarea Filipos, ha pinakadurho ha norte han Palestina. Hilaba ito nga sagkahon, nga mga 50 ka kilometro, ngadto ha maopay pagkit-on nga lugar han Cesarea Filipos, nga mga 350 metros an kahitaas tikang ha lebel han dagat. Posible nga mga duha ka adlaw ito nga pagbiyahe.

Durante han biyahe, binulag hi Jesus basi mag-ampo. Mga siyam o napulo na la ka bulan antes han iya kamatayon, ngan nababaraka hiya ha iya mga disipulo. Damu an waray na sumunod ha iya. An iba bangin nawuwurok ngan nasusubo kay ginbalewaray niya an pangalimbasog han mga tawo nga himoon hiya nga hadi, ngan waray hiya maghatag hin tigaman tikang ha langit han nangaro an iya mga kaaway basi pamatud-an an iya pagin hadi. Ano an pagkakilala kan Jesus han iya mga apostol? Han kinadto hira ha lugar diin nag-aampo hi Jesus, nagpakiana hiya: “Hin-o ako sumala ha mga tawo?”

Binaton hira: “An iba nasiring nga hi Juan nga Parabaptis, may nasiring nga hi Elias, ngan an iba nasiring nga hi Jeremias o usa han mga propeta.” Oo, naghuhunahuna an mga tawo nga hi Jesus usa hito nga kalalakin-an nga ginbanhaw!

“Kondi para ha iyo, hin-o ako?” nagpakiana hi Jesus.

Hi Pedro binaton dayon: “Ikaw an Kristo, an Anak han buhi nga Dios.”

Katapos umuyon ha ginsiring ni Pedro, nagsiring hi Jesus: “Ikaw hi Pedro, ngan dinhi hini nga daku nga bato akon titindugon an akon kongregasyon, ngan an mga ganghaan han Hades diri makakadaog hito.” Dinhi siyahan nga iginpahibaro ni Jesus nga magtitindog hiya hin kongregasyon ngan bisan an kamatayon diri makakabihag ha mga membro hito katapos han ira matinumanon nga pagkinabuhi ha tuna. Ngan nagsiring hiya kan Pedro: “Ihahatag ko ha imo an mga yawi han Ginhadian han langit.”

Iginpapasabot ni Jesus nga hi Pedro makarawat hin espesyal nga mga pribilehiyo. Pero waray hiya tagi hin pinakalabaw nga posisyon ha mga apostol, ngan waray liwat hiya himoa nga pundasyon han kongregasyon. Hi Jesus mismo an Daku nga Bato diin titindugon an iya kongregasyon. Kondi tatagan hi Pedro hin tulo nga yawi basi abrihan, siring pa, an oportunidad para ha grupo han mga tawo nga makasulod ha Ginhadian han langit.

Gagamiton ni Pedro an siyahan nga yawi ha Pentekostes 33 C.E. basi ipakita ha mabinasulon nga mga Judio kon ano an ira kinahanglan buhaton basi matalwas. Ngan diri mag-iiha gagamiton niya an ikaduha basi abrihan an oportunidad para ha tumuroo nga mga Samaritano nga makasulod ha Ginhadian han Dios. Katapos, ha 36 C.E. gagamiton niya an ikatulo nga yawi basi abrihan an pariho nga oportunidad para ha diri turi nga mga Hentil, hi Cornelio ngan an iya kasangkayan.

May igin-istorya pa hi Jesus ha mga apostol. Nasubo hira han ginsumatan niya nga diri mag-iiha mag-aantos hiya ngan mamamatay ha Jerusalem. Waray masabti ni Pedro nga babanhawon hi Jesus ngadto ha langit, salit gindara niya hi Jesus ha ligid. “Ayaw pagyakan hin sugad hito, Ginoo,” siring niya. “Diri gud ito mahitatabo ha imo.” Tinalikod hi Jesus ngan nagsiring: “Ayaw ako pag-ulanga, Satanas! Hiparakdolan ka ha akon, kay imo gintatagad an panhunahuna han mga tawo, diri an panhunahuna han Dios.”

Sigurado nga may iba pa nga upod hi Jesus ha pagbiyahe labot han mga apostol, salit iya gintawag hira ngan ginsidngan nga diri masayon an pagin iya sumurunod. “An bisan hin-o nga naruruyag sumunod ha akon, isalikway niya an iya kalugaringon ngan pas-anon an iya pasakitan nga kahoy ngan padayon nga sumunod ha akon. Kay an bisan hin-o nga nagpapanalipod han iya kalag mawawad-an hito, pero an bisan hin-o nga mawad-an han iya kalag tungod ha akon ngan han maopay nga sumat magtatalwas hito,” siring niya.

Oo, basi mapamatud-an han mga sumurunod ni Jesus nga angay hira han iya pag-uyon, kinahanglan hira magmaisugon ngan padayon nga magsakripisyo. Nagsiring hiya: “Kay kon ako ngan an akon mga pulong ikaawod han bisan hin-o hinin diri-matinumanon ha Dios ngan makasasala nga henerasyon, ikakaawod liwat hiya han Anak han tawo kon umabot na hiya ha himaya han iya Amay upod han baraan nga mga anghel.” Marcos 8:22-38; Mateo 16:13-28; Lucas 9:18-27.

▪ Kay ano nga nababaraka hi Jesus ha mga disipulo?

▪ Hin-o hi Jesus sumala ha mga tawo?

▪ Ano nga mga yawi an iginhatag kan Pedro, ngan ha ano ito gagamiton?

▪ Ano nga pagsaway an nakarawat ni Pedro, ngan kay ano?