Kapitulo 41

Hinungdan han Kontrobersya

WARAY pag-iha, katapos nga gin-imbitar hi Jesus ha balay ni Simon, gintikangan niya an ikaduha nga paglibot ha bug-os nga Galilea basi magsangyaw. Ha iya una nga paglibot didto, gin-updan hiya han iya siyahan nga mga disipulo nga hira Pedro, Andres, Santiago, ngan Juan. Pero yana upod niya an 12 nga apostol, ngan may kababayin-an liwat, nga hira Maria Magdalena, Susana, ngan Juana nga an bana opisyal ni Hadi Herodes.

Samtang nag-uuswag an ministeryo ni Jesus, nagdudugang liwat an kontrobersya mahitungod han iya buruhaton. May gindara ha iya nga lalaki nga buta ngan diri nakakayakan nga ginsaniban hin demonyo. Han gintambal hiya ni Jesus, ginawas an demonyo katapos nakayakan ngan nakakita na hiya, salit nahipausa an mga tawo. Nagsiring hira: “Posible ba nga hiya an Anak ni David?”

Napuno hin tawo an palibot han balay nga gin-uukyan ni Jesus, salit hiya ngan an mga disipulo waray na makapangaon. Labot hadton naghuhunahuna nga bangin hiya an iginsaad nga “Anak ni David,” may inabot liwat nga mga eskriba ngan mga Pariseo nga tikang pa ha Jerusalem basi magpakaraot ha iya. Han nahibaro hito nga samok an mga paryente ni Jesus, kinadto hira basi dakpon hiya. Kay ano?

Tungod kay bisan an kabugtoan mismo ni Jesus diri pa natoo nga hiya an Anak han Dios. Labot pa, an samok ngan araway han mga tawo tungod ha iya, hirayo gud mahitabo ha Jesus nga ira kilala nga nagtubo ha Nazaret. Tungod hito, natoo hira nga may diperensya hiya ha hunahuna. “Nalulurong na hiya” siring nira, ngan karuyag nira nga dakpon hiya basi ig-uli.

Pero klaro nga gintambal ni Jesus ito nga ginsaniban. Maaram an mga eskriba ngan mga Pariseo nga diri gud hira makakanigar hito. Salit ginpakaraot nira hi Jesus, ngan ginsidngan an mga tawo: “Ini nga tawo nagpapagawas hin mga demonyo pinaagi kan Beelsebub, an magmarando han mga demonyo.”

Maaram hi Jesus han ira ginhuhunahuna, salit ginpadaop niya an mga eskriba ngan mga Pariseo ngan ginsidngan: “An tagsa nga ginhadian nga nagkakabahinbahin mabubungkag, ngan an tagsa nga syudad o panimalay nga nagkakabahinbahin diri matindog. Sugad man, kon hi Satanas an nagpapagawas kan Satanas, hiya mismo nababahin. Salit paonan-o matindog an iya ginhadian?”

Maopay gud ito nga lohika! Tungod kay an mga Pariseo nasiring nga nakakapagawas hira hin mga demonyo, nagpakiana hi Jesus: “Kon nagpapagawas ako hin mga demonyo pinaagi kan Beelsebub, pinaagi kan kanay ginpapagawas hira han iyo mga anak?” Karuyag sidngon, an ira akusasyon kan Jesus angay liwat ig-akusar ha ira. Ginpahamangnoan hira ni Jesus: “Pero kon nagpapagawas ako hin mga demonyo pinaagi han espiritu han Dios, waray kamo mahibaro nga an Ginhadian han Dios inabot na.”

Basi iilustrar nga an iya pagpagawas han mga demonyo nagpapakita nga mas gamhanan hiya kan Satanas, nagsiring hiya: “Paonan-o an usa makakasulod ha balay han makusog nga tawo basi pangawaton an iya mga panag-iya, kon diri anay niya gapuson ito nga makusog nga tawo? Katapos, makakapangawat na hiya hito nga balay. An diri nadapig ha akon nakontra ha akon, ngan an diri nabulig pagtirok han mga tawo ngadi ha akon nagtatabog ha ira pahirayo ha akon.” Klaro nga an mga Pariseo nakontra kan Jesus, nga nagpapakita nga mga sakop hira ni Satanas. Ira gintatabog an mga Israelita pahirayo ha iya.

Salit ginpahamangnoan ni Jesus an mga parakontra nga dapig kan Satanas nga “diri mapapasaylo an pagpasipara ha espiritu.” Nagsaysay hiya: “Mapapasaylo an bisan hin-o nga nagyayakan kontra ha Anak han tawo. Pero an bisan hin-o nga nagyayakan kontra ha baraan nga espiritu diri mapapasaylo, diri gud bisan hini nga sistema o ha maabot nga sistema.” An mga eskriba ngan mga Pariseo nakabuhat hin diri mapapasaylo nga sala kay nagsiring hira nga tikang kan Satanas an milagro nga ginhimo ha bulig han baraan nga espiritu han Dios. Mateo 12:22-32; Marcos 3:19-30; Lucas 8:1-3; Juan 7:5.

▪ Ano an kaibahan han ikaduha nga paglibot ni Jesus ha bug-os nga Galilea kay han siyahan?

▪ Kay ano nga karuyag dakpon hi Jesus han iya mga paryente?

▪ Ano an pakaraot han mga Pariseo ha mga milagro ni Jesus, ngan ano an iya baton?

▪ Ano an sala han mga Pariseo, ngan kay ano?