Kapitulo 112

Hirani na an Ultimo nga Paskua ni Jesus

HAN tikatunod na an adlaw han Martes, Nisan 11, natapos na hi Jesus pagtutdo ha mga apostol didto ha Bukid han mga Olibo. Okupado gud ngan makapoy ito nga adlaw! Yana, posible nga tipabalik na hira ha Betania basi didto magpalabay han kagab-ihon. Nagsiring hiya ha mga apostol: “Maaram kamo nga duha ka adlaw tikang yana isiselebrar an Paskua, ngan an Anak han tawo igtutubyan basi igraysang ha kahoy.”

Kinabuwasan, han Mierkoles, Nisan 12, posible nga kinadto hi Jesus ngan an mga apostol ha mamingaw nga lugar basi pumahuway. Han naglabay nga adlaw, ginsaway niya ha publiko an mga lider han relihiyon, ngan nasantop niya nga karuyag nira nga patayon hiya. Salit han Mierkoles waray hiya dayag nga magpakita kay diri niya karuyag nga may makaulang han iya pagsaurog han Paskua kinabuwasan han gab-i upod an mga apostol.

Hito nga panahon, an punoan nga mga saserdote ngan an katigurangan nagkatirok ha bungsaran han hitaas nga saserdote nga hi Caifas. Nasina hira han ginkondenar hira ni Jesus han naglabay nga adlaw, salit nagplano hira nga arestuhon hiya ha malimbong nga paagi ngan patayon. Pero nagsiniring hira: “Ayaw naton ito buhata ha panahon han piyesta basi diri magsaramok an mga tawo.” Nahahadlok hira ha mga tawo kay nadapig hira kan Jesus.

Samtang an maraot nga mga lider han relihiyon nagpaplano ha pagpatay kan Jesus, nagkaada hira hin bisita. Nahipausa hira kay usa hiya han mga apostol mismo ni Jesus, hi Judas Iscariote, nga gin-impluwensyahan ni Satanas nga magtraydor ha iya Agaron! Nalipay gud hira han nagpakiana hi Judas: “Ano an ihahatag niyo ha akon kon itubyan ko hiya ha iyo?” Nagkauruyon dayon hira nga tagan hiya hin 30 ka sinselyo nga silber, an kantidad han usa nga uripon sumala ha Mosaiko nga Balaud. Tikang hito nga panahon, nagpinamiling hi Judas hin maopay nga higayon ha pagtraydor kan Jesus nga waray mga tawo ha palibot.

An Nisan 13 nagtikang ha katunod han adlaw han Mierkoles. Han naglabay nga Biernes inabot hi Jesus tikang ha Jerico, salit ito an ikaunom ngan ultimo nga gab-i nga paghuron niya ha Betania. Kinabuwasan, han Huwebes, kinahanglan iandam na an mga arandamon para ha Paskua, nga magtitikang ha katunod han adlaw. Kinahanglan patayon hito nga adlaw an nati nga karnero para ha Paskua ngan bug-os nga litsunon. Diin hira magsasaurog han piyesta, ngan hin-o an mag-aandam?

Waray ighatag ni Jesus an mga detalye, posible nga basi diri magsumat hi Judas ha punoan nga mga saserdote kay bangin dakpon nira hi Jesus durante han pagsaurog han Paskua. Pero yana, posible nga Huwebes na nga kulop. Ginsugo ni Jesus hira Pedro ngan Juan tikang ha Betania: “Lakat kamo ngan pag-andam para ha Paskua basi mangaon kita.”

Nagpakiana hira: “Diin mo karuyag nga iandam namon ito?”

“Pagsulod niyo ha syudad,” siring ni Jesus, “tatapoon kamo hin lalaki nga may dara nga tibod hin tubig. Upod kamo ha iya ngadto ha balay nga iya susudlan. Ngan sidnga an tagbalay, ‘An Magturutdo nasiring ha imo: “Hain an kwarto para ha bisita nga akon kakaonan para han panihapon ha Paskua upod an akon mga disipulo?”’ Ipapakita niya ha iyo an daku nga kwarto ha igbaw nga nakaandam na. Pag-andam kamo didto.”

An tagbalay sigurado nga disipulo ni Jesus nga bangin naglalaom na nga maghahangyo hi Jesus nga gamiton an iya balay para hiton espesyal nga okasyon. Pag-abot nira Pedro ngan Juan ha Jerusalem, nakita nira an ngatanan sugad la han ginsiring ni Jesus. Salit ginsiguro nira nga an nati nga karnero andam na pati an iba pa nga angay iandam para ha 13 nga magsasaurog han Paskua, hi Jesus ngan an iya 12 nga apostol. Mateo 26:1-5, 14-19; Marcos 14:1, 2, 10-16; Lucas 22:1-13; Eksodo 21:32.

▪ Ano an posible nga ginbuhat ni Jesus han Mierkoles, ngan kay ano?

▪ Ano nga katirok an ginhimo ha balay han hitaas nga saserdote? Kay ano nga kinadto hi Judas ha mga lider han relihiyon?

▪ Hin-o an ginpakadto ni Jesus ha Jerusalem han Huwebes, ngan kay ano?

▪ Ano an nakita han mga ginsugo nga nagpamatuod na liwat nga may milagroso nga gahum hi Jesus?