Kapitulo 129

Iba Pa nga Pagpakita

NASUSUBO pa an mga disipulo. Diri nira masabtan kon kay ano nga waray na sulod an lubnganan ngan diri hira natoo ha iginsumat han kababayin-an. Salit hito nga Domingo han kulop, binaya ha Jerusalem hi Cleopas ngan an usa pa nga disipulo ngan kinadto hira ha Emaus, nga sobra 11 ka kilometro an kahirayo.

Samtang nagbabaktas ngan nag-iinistorya mahitungod han mga nahitabo hito nga adlaw, may estranghero nga inupod ha ira. Nagpakiana hiya: “Ano an iyo gin-iinistoryahan?”

Inundang hira nga masurub-on an pamayhon, ngan binaton hi Cleopas: “Estranghero ka ba nga naukoy nga nag-uusahan ha Jerusalem amo nga diri ka maaram han nahitatabo didto yana?” Nagpakiana hiya: “Ano nga hitabo?”

“An mahitungod kan Jesus nga Nazareno,” binaton hira. “Ngan an mahitungod han pagsentensyahi ha iya hin kamatayon ngan pagraysanga ha iya ha kahoy tungod han sulsol han aton punoan nga mga saserdote ngan mga opisyal. Kondi naglaom kami nga ini nga tawo ginpili basi talwason an Israel.”

Iginsaysay ni Cleopas ngan han iya kaupod an diri ordinaryo nga mga panhitabo hito nga adlaw—an sumat mahitungod han urusahon nga pakakita hin mga anghel ngan han waray na sulod nga lubnganan—pero nagsumat hira nga diri nira masabtan an kahulogan hito nga mga panhitabo. Ginsidngan hira han estranghero: “O mga tawo nga waray sarabotan ngan diri dayon natoo ha ngatanan nga ginyakan han mga propeta! Diri ba kinahanglan antuson ini han Kristo basi paghimayaon hiya?” Katapos, iya iginsaysay ha ira an mga asoy ha sagrado nga kasuratan mahitungod han Kristo.

Han hirani na hira ha Emaus, baga hin madiretso la an estranghero. Tungod kay karuyag han mga disipulo nga mamati pa ha iya, nagsiring hira: “Upod na la ha amon kay tikagab-i na.” Salit inupod hiya basi kumaon. Han nag-ampo hiya ngan gintipik-tipik an tinapay ngan iginhatag ito ha ira, nakilal-an nira nga hiya gud hi Jesus nga nagpakatawo. Pero katapos hito, waray na nira hiya makita.

Yana, nasabtan na nira kon kay ano nga damu gud an hinbabaroan han estranghero! “Diri ba nabantad gud an aton kasingkasing han nakikiistorya hiya ha aton ha dalan, samtang iya iginsasaysay ha aton hin maopay an Kasuratan?” nagpakianahay hira. Binuhát dayon hira ngan nagdagmit pagbalik ha Jerusalem. Pag-abot nira, nagkakatirok an mga apostol upod an iba pa. Waray pa pakakayakan hi Cleopas ngan an iya kaupod, malipayon nga nagsiring an iba: “Totoo gud nga an Ginoo ginbanhaw ngan nagpakita kan Simon!” Iginsaysay liwat han duha an pagpakita ha ira ni Jesus. Hito nga adlaw, upat ka beses nga nagpakita hiya ha iba-iba nga disipulo.

Ha ikalima nga higayon, tigda nga nagpakita hi Jesus. Bisan kon nakatrangka an mga purtahan, kay nahahadlok an mga disipulo ha mga Judio, sinulod hi Jesus ngan tinindog ha butnga nira mismo ngan nagsiring: “Magmamurayawon unta kamo.” Nahadlok hira kay kahuna nira nga espiritu an ira nakikita. Salit nagsaysay hi Jesus nga diri bisyon an ira nakikita. Nagsiring hiya: “Kay ano nga nalilisang kamo, ngan kay ano nga nagruruhaduha an iyo mga kasingkasing? Kitaa an akon mga kamot ngan tiil, kay ako mismo ini; kapti ngan kitaa ako, kay an espiritu waray unod ngan tul-an, pero ako may-ada sugad han nakikita niyo.” Pero nagruruhaduha la gihapon hira.

Basi masabtan nira nga hiya gud hi Jesus, nagpakiana hiya: “May-ada kamo dida makakaon?” Katapos niya karawaton an sinugba nga isda ngan kaunon ito, nagsiring hiya: “Han kaupod pa ako niyo [antes ako mamatay], nagyakan ako nga kinahanglan matuman an ngatanan nga iginsurat mahitungod ha akon ha Balaud ni Moises ngan ha sinurat han mga Propeta ngan ha Mga Salmo.”

Nagpadayon hi Jesus ha pagtutdo ha ira, nga maipapariho ha pagdumara hin pag-aram ha Biblia. Nagsiring hiya: “An Kasuratan nasiring nga an Kristo mag-aantos ngan babanhawon ha ikatulo ka adlaw, ngan pinaagi han iya ngaran, an mensahe mahitungod han pagbasol isasangyaw tikang ha Jerusalem ngadto ha ngatanan nga nasud, basi mapasaylo an mga sala. Kamo an magpapasamwak hini nga mga butang nga iyo nakita.”

Waray didto hi Tomas hiton importante nga katirok han Domingo nga gab-i. Salit han sumunod nga mga adlaw, malipayon nga ginsumatan hiya han iba: “Nakita namon an Ginoo!”

Pero riniwa hi Tomas: “Kon diri ko makita an ulat han mga raysang ha iya mga kamot ngan makaptan ito han akon tudlo ngan makaptan an iya kagiliran, diri gud ako matoo.”

Paglabay hin walo ka adlaw, nagkatirok na liwat an mga disipulo ha usa nga balay, ngan yana kaupod na nira hi Tomas. Bisan kon nakatrangka an mga purtahan, tinindog na liwat hi Jesus ha butnga nira ngan nagsiring: “Magmamurayawon unta kamo.” Katapos ginsidngan niya hi Tomas: “Ibutang didi an imo tudlo, ngan kitaa an akon mga kamot. Kapti an akon kagiliran, ngan ayaw na pagruhaduha.”

Nagsiring hi Tomas: “Ginoo ko ngan Dios ko!”

“Natoo ka ba kay nakita mo ako?” nagpakiana hi Jesus. “Malipayon an mga natoo bisan kon waray makakita.” Lucas 24:11, 13-48; Juan 20:19-29.

▪ Ano an iginpakiana han estranghero ha duha nga disipulo han nagbabaktas hira pakadto ha Emaus?

▪ Ano an ginsiring han estranghero nga nakabantad gud han kasingkasing han mga disipulo?

▪ Paonan-o nakilal-an han mga disipulo an estranghero?

▪ Pagbalik ni Cleopas ngan han iya kaupod ngadto ha Jerusalem, ano nga makalilipay nga sumat an ira nabatian?

▪ Ano an nahitabo ha ikalima nga pagpakita ni Jesus ha iya mga disipulo?

▪ Ano an nahitabo paglabay hin walo ka adlaw katapos han ikalima nga pagpakita ni Jesus? Paonan-o nakombinse hi Tomas nga buhi hi Jesus?