Kapitulo 116

Igin-andam an mga Apostol Para ha Iya Pagbaya

TAPOS na an panihapon ha memoryal, pero hi Jesus ngan an mga apostol aadto pa ha kwarto ha igbaw. Bisan kon hirani na hiya bumaya, damu pa an iya karuyag isiring. “Ayaw pabay-i nga masubo an iyo kasingkasing,” ginliaw niya hira. “Magpakita kamo hin pagtoo ha Dios.” Pero nagdugang pa hiya: “Magpakita liwat kamo hin pagtoo ha akon.”

“Ha balay han akon Amay damu an urukyan,” nagpadayon hi Jesus. “Tikadto ako ha pag-andam hin lugar para ha iyo . . . basi kon hain ako, aadto liwat kamo. Ngan ha akon kakadtoan maaram kamo han dalan.” Waray makasabot an mga apostol nga an ginhihisgotan ni Jesus amo an pagkadto ha langit, salit hi Tomas nagpakiana: “Ginoo, diri kami maaram kon makain ka. Paonan-o namon mahibabaroan an dalan?”

“Ako an dalan ngan an kamatuoran ngan an kinabuhi,” binaton hi Jesus. Oo, makakasulod la ha balay han Amay ha langit an bisan hin-o kon karawaton ngan subaron niya an pagkinabuhi ni Jesus, kay nagsiring hiya: “Waray nakakakadto ha Amay kon diri pinaagi ha akon.”

“Ginoo, ipakita ha amon an Amay,” naghangyo hi Felipe, “ngan kontento na kami hito.” Posible nga karuyag ni Felipe nga maghatag hi Jesus hin paagi nga makita an Dios, sugad han mga bisyon nga iginpakita hadto kanda Moises, Elias, ngan Isaias. Pero, ha pagkamatuod, labaw pa kay ha mga bisyon an nakikita han mga apostol, sugad han ginsiring ni Jesus: “Maiha na nga kaupod niyo ako, pero diri mo pa ako kilala, Felipe? An nakakita ha akon nakakita liwat ha Amay.”

Hingpit nga naipakita ni Jesus an personalidad han iya Amay salit ha pakig-upod ngan pag-obserbar ha iya, baga hin nakita na an Amay. Pero mas gamhanan an Amay kay ha Anak, sugad han ginsiring ni Jesus: “An akon ginsisiring ha iyo diri akon kalugaringon nga mga ideya.” Husto gud nga iginhahatag niya ha iya Amay ha langit an ngatanan nga kadayawan ha iya igintututdo.

Sigurado nga naparig-on gud an mga apostol hini nga iginsumat ha ira ni Jesus: “An nagpapakita hin pagtoo ha akon magbubuhat liwat han akon mga ginbubuhat, ngan labaw pa hini an iya bubuhaton”! Diri niya iginpapasabot nga an iya mga sumurunod magbubuhat hin mas urusahon nga mga milagro kay ha iya. Lugod, karuyag la niya sidngon nga ipapadayon nira an ministeryo ha mas maiha nga panahon, ha mas haluag nga lukop, ngan ha mas damu nga tawo.

Diri papabay-an ni Jesus an mga disipulo katapos niya bumaya. Nagsaad hiya: “Bisan ano nga aroon niyo ha akon ngaran, ihahatag ko ito.” Nagsiring pa hiya: “Maghahangyo ako ha Amay ngan tatagan niya kamo hin iba nga parabulig nga makakaupod niyo ha kadayonan, an espiritu han kamatuoran.” Ha urhi, pagsaka niya ha langit, ibubuhos niya ha mga disipulo an baraan nga espiritu, nga amo an iba nga parabulig.

Hirani na bumaya hi Jesus sugad han iya ginsiring: “Halipot na la nga panahon ngan diri na ako makikita han kalibotan.” Magigin espiritu hiya nga diri makikita han tawo. Kondi nagsaad utro hiya ha matinumanon nga mga apostol: “Makikita niyo ako kay magpapadayon ako nga buhi ngan mabubuhi liwat kamo.” Oo, diri la kay makikita nira hi Jesus ha dagway han tawo katapos hiya banhawon, kondi ha itinanda nga panahon babanhawon liwat niya hira ngadto ha langit sugad nga mga espiritu basi makaupod niya.

Iginhatag yana ni Jesus an simple nga surundon: “An nakarawat han akon mga sugo ngan nagtutuman hito, nahigugma ha akon. An nahigugma ha akon hihigugmaon liwat han akon Amay, ngan akon hiya hihigugmaon ngan ipapakilala ko ha iya an akon kalugaringon.”

Hini nga punto, hi apostol Judas nga gintatawag liwat nga Tadeo, nagpakiana: “Ginoo, kay ano nga karuyag mo ipakilala ha amon an imo kalugaringon pero diri ha kalibotan?”

Binaton hi Jesus: “An bisan hin-o nga nahigugma ha akon magtutuman han akon pulong, ngan hihigugmaon hiya han akon Amay. . . . An diri nahigugma ha akon diri nagtutuman han akon mga pulong.” Ginbabalewaray han kalibotan an mga katutdoan han Kristo, diri pariho ha iya masinugtanon nga mga sumurunod. Salit diri hiya nagpapakilala ha ira.

Durante han ministeryo ni Jesus dinhi ha tuna, damu an iya igintutdo ha mga apostol. Paonan-o nira hinunumdoman ito ngatanan, labi na nga bisan tubtob hito nga takna damu pa an diri nira nasasabtan? Malipayon nga nagsaad hiya: “An parabulig, an baraan nga espiritu, nga ipapadara han Amay ha akon ngaran, ito an magtututdo ha iyo han ngatanan nga butang ngan magpapahinumdom ha iyo han ngatanan nga akon iginsumat ha iyo.”

Ginliaw utro hira ni Jesus: “Igbibilin ko ha iyo an kamurayawan nga iginhatag ko ha iyo. . . . Ayaw pabay-i nga masubo o mahadlok an iyo kasingkasing.” Oo, mabaya na hiya, pero nagsiring hiya: “Kon hinigugma niyo ako, malilipay kamo nga makadto ako ha Amay, kay an Amay mas gamhanan kay ha akon.”

Halipot na la an panahon nga makakaupod hira ni Jesus. “Diri na ako magyayakan hin damu ha iyo,” siring niya, “kay tiabot an magmarando han kalibotan. Diri niya ako madadaog.” Hi Satanas nga Yawa amo an magmarando hini nga kalibotan nga nag-impluwensya kan Judas ngan nagkontrol ha iya. Pero waray kaluyahan hi Jesus nga magagamit ni Satanas basi italikod hiya ha pag-alagad ha Dios.

Pagpahimulos hin Duok nga Relasyon

Katapos han panihapon ha memoryal, ginparig-on ni Jesus an mga apostol pinaagi hin kalmado ngan kinasingkasing nga pakiistorya. Posible nga lahos na ha katutnga han gab-i. Salit nag-aghat hi Jesus: “Buhát kamo, pagkalakat na kita.” Pero antes hira lumakat, tungod han iya gugma ha ira, nagsaysay pa hiya hin makapaaghat nga ilustrasyon.

“Ako an totoo nga puno han ubas, ngan an akon Amay an parauma,” siring niya. An Harangdon nga Parauma, hi Jehova nga Dios, an nagtanom han simboliko nga puno han ubas han gindihogan niya hi Jesus han baraan nga espiritu han ginbawtismohan hiya ha katrakdag han 29 C.E. Pero iginpatin-aw ni Jesus nga diri la hiya an ginsisimbolohan han puno han ubas. Nagsiring hiya: “An tagsa ko nga sanga nga diri namumunga iya gin-uutod, ngan an tagsa nga sanga nga namumunga iya ginpapangutdan basi mamunga hin mas damu. . . . An sanga diri mamumunga kon diri ito magpabilin ha puno han ubas. Ha pariho nga paagi, diri kamo mamumunga kon diri kamo magpabilin nga kahiusa ko. Ako an puno han ubas, kamo an mga sanga.”

Han Pentekostes, paglabay hin 51 ka adlaw, nagin mga sanga han puno han ubas an mga apostol ngan an iba pa, han iginbuhos ha ira an baraan nga espiritu. Paglabay han panahon, 144,000 ka tawo an nagin mga sanga han simboliko nga ubas. Upod han pinakapuno, hi Jesu-Kristo, hira an nagkukompwesto han simboliko nga puno han ubas nga namumunga hin mga bunga han Ginhadian han Dios.

Iginsaysay ni Jesus an ginkikinahanglan basi mamunga: “An nagpapabilin nga kahiusa ko, ngan ako kahiusa niya, nagbubunga hin damu; kay waray kamo mahihimo kon bulag kamo ha akon.” Pero an tawo nga diri namumunga, “iginlalabog sugad hin sanga ngan nauuga,” siring niya. “Gintitirok han mga tawo ito nga mga sanga, iginlalabog ha kalayo ngan nasusunog.” Ha luyo nga bahin, nagsaad hiya: “Kon magpabilin kamo nga kahiusa ko ngan kon tipigan niyo an akon mga pulong, aroa an anoman nga karuyag niyo ngan ihahatag ito ha iyo.”

Nagsiring liwat hiya ha mga apostol: “An akon Amay napapasidunggan kon padayon nga namumunga kamo hin damu ngan ipinapakita niyo nga akon kamo mga disipulo.” An bunga nga ginlalaoman han Dios ha mga sanga amo an ira pagpakita hin mga kalidad nga pariho han Kristo, labi na an gugma. Dugang pa, tungod kay an Kristo parasamwak han Ginhadian han Dios, an bunga nga ginlalaoman nag-uupod liwat han ira pagbulig ha iba nga magin mga disipulo pariho han ginbuhat han Kristo.

“Magpabilin kamo ha akon gugma,” nag-aghat hi Jesus. Pero paonan-o ito bubuhaton han mga apostol? “Kon gintutuman niyo an akon mga sugo,” siring niya, “magpapabilin kamo ha akon gugma.” Katapos nagsaysay hiya: “Ini an akon sugo, nga maghigugmaay kamo sugad han paghigugma ko ha iyo. Waray na malabaw ha gugma han usa nga naghahatag han iya kalag para ha iya kasangkayan.”

Pipira ka oras na la, ipapakita na ni Jesus inin diri matupngan nga gugma pinaagi ha paghatag han iya kinabuhi para ha mga apostol, ngan ha ngatanan nga matoo ha iya. An iya susbaranan sadang magpagios ha iya mga sumurunod nga magpakita liwat hin gugma nga may pagsakripisyo. Ito an magigin pangirilal-an nira, sugad han ginsiring na ni Jesus: “Tungod hini an ngatanan mahibabaro nga mga disipulo ko kamo, kon naghihigugmaay kamo.”

Basi ipakilala an iya kasangkayan, nagsiring hiya: “Kasangkayan ko kamo kon ginbubuhat niyo an iginsusugo ko ha iyo. Diri ko na kamo gintatawag nga mga uripon, kay an uripon diri maaram han ginbubuhat han iya agaron. Kondi gintatawag ko kamo nga kasangkayan, kay an ngatanan nga hinbatian ko ha akon Amay iginpapahibaro ko ha iyo.”

Presyoso gud nga relasyon an pagin duok nga kasangkayan ni Jesus! Pero basi magpadayon ito, kinahanglan “padayon nga mamunga hin mga bunga” an iya mga sumurunod. Kon buhaton nira ito, siring niya nga “bisan ano an iyo aroon ha Amay ha akon ngaran, ihahatag niya ito ha iyo.” Daku gud ito nga balos tungod ha pamunga hin bunga han Ginhadian! Katapos aghaton utro an mga apostol nga “maghigugmaay,” nagsiring hi Jesus nga masisina ha ira an kalibotan. Pero iya ginliaw hira: “Kon nasisina ha iyo an kalibotan, maaram kamo nga nasina ito ha akon antes masina ha iyo.” Sunod, iginsumat niya kon kay ano nga an kalibotan nasisina ha iya mga sumurunod: “Tungod kay ginpili ko kamo tikang ha kalibotan, diri na kamo kanan kalibotan, salit nasisina ito ha iyo.”

Nagpadayon hiya ha pagsaysay kon kay ano nga nasisina an kalibotan: “Bubuhaton nira ha iyo ini ngatanan tungod han akon ngaran, kay diri hira nakilala ha nagsugo ha akon [hi Jehova nga Dios].” Tungod han ginbuhat ni Jesus nga mga milagro napamatud-an nga salaan an mga nasisina ha iya, sugad han iya ginsiring: “Kon waray ko buhata an mga milagro nga waray gud iba nga nakahimo, waray unta hira sala; pero yana nga nakita nira an akon mga milagro, nangangalas hira ha akon ngan ha akon Amay.” Salit, sugad han iya ginsiring, natuman an tagna: “Nangalas hira ha akon nga waray hinungdan.”

Pariho han ginbuhat na ni Jesus, ginliaw utro niya hira pinaagi ha pagsaad nga magpapadara hiya hin parabulig, an baraan nga espiritu, nga amo an gamhanan nga aktibo nga pwersa han Dios. “Magpapamatuod [ito] mahitungod ha akon, ngan magpapamatuod liwat kamo.”

Dugang nga Sagdon Antes Bumaya

Hi Jesus ngan an mga apostol tibaya na ha kwarto ha igbaw. “Ginyayakan ko ini ha iyo basi diri kamo mahipakdol,” siring niya. Katapos nagpahamangno hiya: “Paiiwason kamo han mga tawo tikang ha sinagoga. Ha pagkamatuod, maabot an oras nga an nagpapatay ha iyo maghuhunahuna nga nagbubuhat hiya hin sagrado nga pag-alagad ha Dios.”

Sigurado nga nabaraka hito an mga apostol. Bisan kon nagsiring na hi Jesus nga masisina ha ira an kalibotan, waray niya sumati hira nga papatayon hira. “Hadto waray ko ini isumat ha iyo,” nagsaysay hiya, “tungod kay kaupod pa ako niyo.” Pero maopay gud nga ginpahamangnoan niya hira antes hiya bumaya!

“Yana tikadto ako ha nagsugo ha akon,” siring ni Jesus, “pero waray ha iyo napakiana ha akon, ‘Makain ka?’” Temprano hito nga gab-i, nagpakiana hira kon makain hiya, pero yana tungod ha kahadlok ha iya iginsumat, waray na hira makagpakiana mahitungod hito. Sugad han siring ni Jesus: “Tungod kay iginsumat ko ini ha iyo, napuno hin kasubo an iyo kasingkasing.” Nasubo gud an mga apostol, diri la tungod kay nahibaroan nira nga mag-aantos hira hin duro nga pagtimaraot ngan papatayon, kondi kay babayaan na hira han ira Agaron.

Salit nagsaysay hi Jesus: “Para ha iyo kaopayan an akon pagbaya. Kay kon diri ako bumaya, diri gud makanhi ha iyo an parabulig; kondi kon bumaya ako, pakakanhion ko ito ha iyo.” Sugad nga tawo, usa la nga lugar an puydi niya kadtoan ha kada panahon, pero kon aadto na hiya ha langit, mahimo niya ipadara an baraan nga espiritu han Dios, an parabulig, ngadto ha iya mga sumurunod bisan hain hira. Salit may maopay nga resulta an iya pagbaya.

Nagsiring hi Jesus nga “ipapakita [han baraan nga espiritu] ha kalibotan kon ano an sala, kon ano an matadong, ngan kon ano an paghukom.” Mabubuhayhag an sala han kalibotan, an kawaray hito pagtoo ha Anak han Dios. Dugang pa, an makakombinse nga ebidensya han pagkamatadong ni Jesus makikita pinaagi han iya pagsaka ngadto ha Amay. Ngan tungod kay waray mabungkag ni Satanas ngan han iya maraot nga kalibotan an integridad ni Jesus, marig-on gud ito nga ebidensya nga ginhukman na hin sirot an magmarando han kalibotan.

“Damu pa an akon igsisiring ha iyo,” nagpadayon hi Jesus, “pero diri kamo makakasabot hito yana.” Salit nagsaad hiya nga kon ibuhos na niya an baraan nga espiritu, an aktibo nga pwersa han Dios, gigiyahan hira hito basi masabtan an mga butang uyon ha ira abilidad ha pagsabot.

Waray masabti han mga apostol nga mamamatay hiya ngan magpapakita ha ira katapos hiya banhawon. Salit nagpakianahay hira: “Ano an karuyag sidngon han iya ginsiring, ‘Diri mag-iiha diri na ako niyo makikita, ngan diri liwat mag-iiha makikita ako niyo,’ ngan ‘tungod kay tikadto ako ha Amay’?”

Nasantop ni Jesus nga karuyag nira magpakiana, salit nagsaysay hiya: “Ha pagkamatuod susumatan ko kamo, Magtatangis kamo ngan magngunguyngoy, pero an kalibotan magrarayhak; masusubo gud kamo, pero an iyo kasubo magigin kalipay.” Han kulop hito nga adlaw, han ginpatay hi Jesus, nagrayhak an mga lider han relihiyon ha kalibotan, pero nasubo an mga disipulo. Kondi an ira kasubo nagin kalipay han ginbanhaw hi Jesus! Ngan padayon nga nalipay hira han gintagan hira hin gahum han Pentekostes basi magin mga saksi niya pinaagi han pagbuhos ha ira han baraan nga espiritu han Dios!

Igintanding ni Jesus an kahimtang han mga apostol ha kasakit han nanganganak nga babaye: “Kon nanganganak an babaye, naabat hiya hin kaul-ol.” Pero naobserbaran ni Jesus nga kon matawo na an anak han babaye, diri na hiya nahinunumdom han kasakit; katapos iya ginparig-on an mga apostol: “Salit nasusubo liwat kamo yana, pero makikigkita utro ako ha iyo [kon banhawon na ako] ngan magrarayhak kamo, ngan waray makakakuha han iyo kalipay.”

Tubtob hito nga panahon, waray pa ginhangyo an mga apostol ha ngaran ni Jesus. Pero yana nagsiring hiya: “Kon mangaro kamo ha Amay hin bisan ano, ihahatag niya ito ha iyo ha akon ngaran. . . . Kay pinalangga kamo han Amay, tungod kay pinalangga niyo ako ngan natoo kamo nga kinanhi ako sugad nga representante han Amay. Tikang ako ha Amay ngan kinanhi ako ha kalibotan. Yana mabaya ako ha kalibotan ngan mabalik ako ha Amay.”

Naparig-on gud an mga apostol hito nga ginsiring ni Jesus. “Tungod hini, natoo kami nga tikang ka ha Dios,” siring nira. “Natoo na ba kamo yana?” nagpakiana hiya. “Kitaa! Hirani na gud umabot an oras nga magbuburublag kamo kay an tagsa ha iyo mauli ha iyo kalugaringon nga balay ngan babayaan niyo ako nga nag-uusahan.” Baga hin diri gud ito katoohan, pero nahitabo ito hito mismo nga gab-i!

“Iginsusumat ko ini ha iyo basi pinaagi ha akon magkaada kamo kamurayawan.” Sugad nga konklusyon, nagsiring hi Jesus: “Ha kalibotan may kasakitan kamo, pero magmaisugon kamo! Gindaog ko an kalibotan.” Gindaog niya an kalibotan pinaagi han maunungon nga pagtuman han kaburut-on han Dios bisan pa han ngatanan nga ginbuhat ni Satanas ngan han iya kalibotan basi bungkagon an integridad ni Jesus.

Kataposan nga Pag-ampo ha Kwarto ha Igbaw

Tungod han hilarom nga gugma ni Jesus ha mga apostol, gin-inandam niya hira para ha iya hirani na nga pagbaya. Yana, katapos niya sagdonan ngan liawon hira, hinangad hiya ha langit ngan nangamuyo ha iya Amay: “Himayaa an imo anak, basi himayaon ka han imo anak, kay sugad la nga gintagan mo hiya hin awtoridad ha ngatanan nga tawo, mahatagan unta niya hin kinabuhi nga waray kataposan hira ngatanan nga imo iginhatag ha iya.”

Makalilipay gud ito nga ginsiring ni Jesus—kinabuhi nga waray kataposan! Tungod kay gintagan hiya hin “awtoridad ha ngatanan nga tawo,” maihahatag niya ha ngatanan nga tikamatay nga katawohan an kapulsanan han iya pagtubos. Pero an gin-uuyonan la han Amay an gintatagan niya hin “kinabuhi nga waray kataposan.”

Nagpadayon hiya ha pag-ampo mahitungod han kinabuhi nga waray kataposan: “Nangangahulogan ini hin kinabuhi nga waray kataposan, an ira pagkilala ha imo, an amo la nga totoo nga Dios, ngan ha imo ginsugo, hi Jesu-Kristo.” Oo, an aton katalwasan nadepende ha aton pagkilala ha Dios ngan ha iya Anak. Pero diri la ito an ginkikinahanglan.

Kinahanglan makilala naton hira hin maopay, masabtan an ira personalidad ngan magin sangkay nira. An aton panhunahuna kinahanglan magin pariho ha ira ngan kitaon naton an mga butang uyon ha ira pagkita. Ngan labaw ha ngatanan, kinahanglan naton subaron an ira waray katupong nga mga kalidad ha pagtratar ha iba.

Sunod, igin-ampo niya: “Ginhimaya ko ikaw ha tuna ngan gintapos ko an buruhaton nga imo iginsugo ha akon.” Tungod kay natuman niya an toka ha iya tubtob hito nga takna ngan nasarig nga maglalampos hiya, nangamuyo hiya: “Amay, himayaa ako kaupod mo sugad han paghimaya mo ha akon han kaupod mo pa ako antes magtikang an kalibotan.” Oo, naghangyo hiya nga makabalik ha iya himaya ha langit pinaagi han pagkabanhaw.

Ginsumaryo ni Jesus an iya importante nga buruhaton ha tuna: “Iginpahayag ko an imo ngaran ha mga tawo nga iginhatag mo ha akon tikang ha kalibotan. Imo hira, ngan iginhatag mo hira ha akon, ngan gintutuman nira an imo pulong.” Gin-gamit niya an ngaran han Dios, nga Jehova, ha iya ministeryo ngan igintutdo an husto nga pagluwas hito, pero labaw pa hito an iya ginbuhat basi ipahayag an ngaran han Dios ha mga apostol. Iya liwat hira ginbuligan nga mas makilala ngan mas maapresyar hi Jehova, an iya personalidad, ngan an iya mga katuyoan.

Ginpasidunggan niya hi Jehova sugad nga mas gamhanan ha iya, ngan Dios nga iya ginsisingba. Mapainubsanon nga nagsiring hiya: “Iginsumat ko ha ira an imo iginsumat ha akon. Ginkarawat nira ito ngan nahibaro gud hira nga kinanhi ako sugad nga imo representante. Tinoo hira nga ginsugo mo ako.”

Basi ipakita an kaibahan han iya mga sumurunod ha iba nga katawohan, nag-ampo pa hiya: “Naghahangyo ako, diri para ha kalibotan, kondi para ha ira nga iginhatag mo ha akon . . . Han kaupod ko hira, akon hira ginpanalipdan. . . . Ginhirotan ko hira, ngan waray bisan usa ha ira nga nawara labot la han anak han kabungkagan,” hi Judas Iscariote. Hito nga takna, ginbubuhat na ni Judas an iya maraot gud nga misyon nga magtraydor kan Jesus. Salit waray sarabotan hi Judas nga gintutuman na niya an ginsiring ha Kasuratan.

“Nasisina ha ira an kalibotan,” nagpadayon ha pag-ampo hi Jesus. “Naghahangyo ako nga diri mo hira kuhaon ha kalibotan, kondi nga panalipdan mo hira tikang ha usa nga maraot. Diri hira kanan kalibotan, sugad la nga ako diri kanan kalibotan.” An mga sumurunod ni Jesus aada ha kalibotan, an organisado nga sosiedad han tawo nga ginmamandoan ni Satanas, pero bulag hira tikang hito ngan kinahanglan padayon nga magin bulag pati ha karaotan hito.

“Baraana hira pinaagi han kamatuoran,” nagpadayon hi Jesus, “an imo pulong kamatuoran.” Gintawag niya nga “kamatuoran” an giniyahan nga Hebreo nga Kasuratan nga agsob niya kotaron. Pero “kamatuoran” liwat an iya igintutdo ha mga disipulo ngan an Kristiano Griego nga Kasuratan nga ira ginsurat ha urhi pinaagi han giya han Dios. Ini nga kamatuoran makakabaraan ha usa nga tawo, makakabag-o han iya kinabuhi, ngan makakabulig ha iya nga magin bulag ha kalibotan.

Nag-ampo hi Jesus “diri la para ha ira, kondi para liwat ha mga natoo ha [iya] pinaagi han ira pulong.” Salit igin-ampo niya an magigin dinihogan nga mga sumurunod niya ngan an iba pa nga magigin mga disipulo nga titirukon pa la sugad nga “usa nga panon.” Ano an iya ginhangyo para ha ira ngatanan?

“Basi hira ngatanan magin usa, sugad nga ikaw, Amay, kahiusa ko ngan ako kahiusa mo, . . . basi magin usa hira sugad nga kita uusa.” Hi Jesus ngan an iya Amay diri literal nga usa la nga persona, lugod nagkakauyon hira ha ngatanan nga butang. Igin-ampo ni Jesus nga an iya mga sumurunod magkahiusa liwat pariho ha ira basi “mahibaro an kalibotan,” siring niya, “nga ginsugo mo ako ngan hinigugma mo hira sugad la nga hinigugma mo ako.”

Para ha magigin dinihogan nga mga sumurunod ni Jesus, naghangyo hiya ha iya Amay ha langit: “Karuyag ko nga kon hain ako, kaupod ko liwat hira nga iginhatag mo ha akon, basi makita nira an himaya nga iginhatag mo ha akon tungod kay hinigugma mo ako antes pa han tinikangan han kalibotan,” karuyag sidngon, antes nagkaada hin mga anak hira Adan ngan Eva. Antes hito, maiha na nga hinigugma gud han Dios an iya bugtong nga Anak, nga nagin hi Jesu-Kristo.

Ha kataposan han pag-ampo ni Jesus ginpabug-atan utro niya: “Iginpakilala ko ha ira an imo ngaran ngan padayon nga igpapakilala ko ito, basi magpakita hira hin gugma sugad han paghigugma mo ha akon ngan basi magin kahiusa ako nira.” Para ha mga apostol, an paghibaro ha ngaran han Dios nag-uupod han personal nga paghibaro han gugma han Dios. Juan 14:1–17:26; 13:27, 35, 36; 10:16; Lucas 22:3, 4; Eksodo 24:10; 1 Hadi 19:9-13; Isaias 6:1-5; Galacia 6:16; Salmo 35:19; 69:4; Proberbios 8:22, 30.

▪ Makain hi Jesus, ngan ano an iginbaton kan Tomas mahitungod han dalan tipakadto hito?

▪ Ha hangyo ni Felipe, ano an posible nga gin-aaro niya kan Jesus?

▪ Kay ano nga an nakakita kan Jesus nakakita liwat ha Amay?

▪ Kay ano nga labaw pa ha ginbuhat ni Jesus an bubuhaton han iya mga sumurunod?

▪ Kay ano nga diri madadaog ni Satanas hi Jesus?

▪ Kakan-o igintanom ni Jehova an simboliko nga puno han ubas? Kakan-o ngan paonan-o nagin bahin hito an iba?

▪ Paglabay han panahon, pira an nagin mga sanga han simboliko nga puno han ubas?

▪ Ano nga bunga an ginlalaoman han Dios ha mga sanga?

▪ Paonan-o kita magigin sangkay ni Jesus?

▪ Kay ano nga nasisina an kalibotan ha mga sumurunod ni Jesus?

▪ Ano nga pahamangno ni Jesus an nakapabaraka ha mga apostol?

▪ Kay ano nga waray na makagpakiana kan Jesus an mga apostol kon makain hiya?

▪ Ano an waray masabti han mga apostol?

▪ Paonan-o gin-ilustrar ni Jesus nga an kahimtang han mga apostol mababag-o tikang ha kasubo ngadto ha kalipay?

▪ Ano an ginsiring ni Jesus nga hirani na buhaton han mga apostol?

▪ Paonan-o gindaog ni Jesus an kalibotan?

▪ Ano an kahulogan han paghatagi kan Jesus hin “awtoridad ha ngatanan nga tawo”?

▪ Ano an kahulogan han pagkilala ha Dios ngan ha iya Anak?

▪ Paonan-o iginpahayag ni Jesus an ngaran han Dios?

▪ Ano an “kamatuoran,” ngan paonan-o hito ‘ginbabaraan’ an usa nga Kristiano?

▪ Paonan-o nagkakahiusa an Dios, an iya Anak, ngan an ngatanan nga totoo nga magsiringba?

▪ Kakan-o an “tinikangan han kalibotan”?