Kapitulo 127

Iginlubong han Biernes—Waray na Sulod an Lubnganan han Domingo

BIERNES na nga kulop, ngan an Sabbath han Nisan 15 magtitikang ha katunod han adlaw. Hi Jesus nga nakabitay ha kahoy patay na, pero buhi pa an duha nga kawatan ha iya sapit. An Biernes nga kulop tinatawag nga Pangandam kay durante hito an mga tawo nag-aandam hin pagkaon ngan gintatapos nira an bisan ano nga importante nga trabahoon antes han Sabbath.

Diri ito regular la nga Sabbath (an ikapito nga adlaw han semana) lugod doble ito, o “espesyal” nga Sabbath. Sugad hito an tawag kay an Nisan 15, nga amo an siyahan nga adlaw han pito ka adlaw nga Piyesta han Tinapay nga Waray Libadura (pirme ito Sabbath, bisan pa kon ano ito nga adlaw), nahituman ha pariho nga adlaw han regular nga Sabbath.

Sumala ha Balaud han Dios, diri puydi pabuwasan an mga lawas ha pasakitan nga kahoy. Salit an mga Judio naghangyo kan Pilato nga dagmiton an pagpatay ha mga nasentensyahan pinaagi han pagbari han ira mga bitiis. Salit ginbari han mga sundalo an mga bitiis han duha nga kawatan. Pero tungod kay nakita nira nga patay na hi Jesus, waray nira baria an iya mga bitiis. Salit natuman an ginsiring han kasuratan: “Bisan usa nga tul-an niya diri mababari.”

Pero basi masiguro gud nga patay na hi Jesus, ginbuno an iya kagiliran han usa han mga sundalo. Naigo han bangkaw an dapit han iya kasingkasing, ngan inawas dayon an dugo ngan tubig. Hi apostol Juan, nga usa han nakakita, nagsumat nga natuman an usa pa nga ginsiring han kasuratan: “Pagkikinitaon nira Hiya nga ira ginbuno.”

Hi Jose nga tikang ha syudad han Arimatea, nga ginrirespeto nga membro han Sanhedrin, nakadto liwat han ginpatay hi Jesus. Waray hiya bumutos ha diri makatadunganon nga desisyon han korte suprema kontra kan Jesus. Ha pagkamatuod disipulo hiya ni Jesus, pero nahahadlok hiya nga magpakilala nga disipulo hiya. Kondi yana, maisugon nga kinadto hiya kan Pilato basi aroon an lawas ni Jesus. Iginpatawag ni Pilato an gintaporan nga opisyal han mga sundalo, ngan katapos kompirmahon han opisyal nga patay na hi Jesus, iginhatag ni Pilato an patay nga lawas.

Ginkuha ito ni Jose ngan ginputos hin limpyo ngan maopay nga klase hin tela nga lino sugad nga pangandam para ha lubong. Ginbuligan hiya ni Nicodemo, nga usa nga membro han Sanhedrin. Hi Nicodemo waray liwat magpahayag han iya pagtoo kan Jesus kay nahahadlok hiya nga mawad-an han iya katungdanan. Pero yana nagdara hiya hin 33 ka kilo nga mira ngan marahalon nga mga aloe. Ginputos an lawas ni Jesus hin mga bendahe lakip ini nga mga pahamot, uyon ha kustomre han mga Judio ha pag-andam para ha paglubong.

Katapos, iginlubong an lawas ha bag-o nga lubnganan ni Jose nga gin-ukad ha bato ha hirani nga hardin. Ngan ginpakaliding an daku nga bato ha ganggang han lubnganan. Basi mailubong an lawas antes han Sabbath, gindagmit an pag-andam hito. Salit, hira Maria Magdalena ngan Maria nga nanay han burobata nga Santiago, nga posible nagbinulig ha pag-andam, nagdagmit pag-uli basi mag-andam pa hin mga pahamot ngan maghamot nga lana. Katapos han Sabbath, nagplano hira nga dugangan hin pahamot an lawas ni Jesus basi mapreserbar ito hin maiha-iha.

Kinabuwasan, han Sabado (han Sabbath), an punoan nga mga saserdote ngan mga Pariseo kinadto kan Pilato ngan nagsiring: “Ginoo, nahinumdom kami nga han buhi pa ito nga impostor nagsiring hiya, ‘Paglabay hin tulo ka adlaw babanhawon ako.’ Salit pabantayi hin maopay an lubnganan tubtob ha ikatulo ka adlaw, basi diri makakadto an iya mga disipulo pagkawat ha iya ngan magsumat ha mga tawo, ‘Ginbanhaw na hiya!’ ngan ini nga limbong magigin mas maraot pa kay ha nauna.”

“Kuha kamo hin mga gwardya ngan pabantayi ito hin maopay,” siring ni Pilato. Salit kinadto hira ha lubnganan ngan ginsiguro nira nga ginsadhan ito hin maopay hin bato nga ginselyohan, ngan ginpabantayan ha Romano nga mga sundalo.

Temprano han Domingo nga aga, hira Maria Magdalena, Maria nga nanay ni Santiago, pati hi Salome, Juana ngan iba pa nga kababayin-an, nagdara hin mga pahamot basi ipahid ha lawas ni Jesus. Samtang tikadto ha lubnganan, nag-iristorya hira: “Hin-o an aton pakukuhaon han bato tikang ha ganggang han lubnganan?” Pero pag-abot nira, nahibaroan nira nga naglinog ngan an bato ha ganggang han lubnganan ginkuha han anghel ni Jehova. Waray na mga gwardya, ngan waray na sulod an lubnganan! Mateo 27:57–28:2; Marcos 15:42–16:4; Lucas 23:50–24:3, 10; Juan 19:14, Ju 19:31–20:1; Ju 12:42; Lebitiko 23:5-7; Deuteronomio 21:22, 23; Salmo 34:20; Sakarias 12:10.

▪ Kay ano nga an Biernes gintawag nga Pangandam? Ano an “espesyal” nga Sabbath?

▪ May kalabotan ha lawas ni Jesus, ano nga mga ginsiring ha kasuratan an natuman?

▪ Ano an ginbuhat nira Jose ngan Nicodemo para ha paglubong kan Jesus? Ano an ira relasyon kan Jesus?

▪ Ano an ginhangyo han mga saserdote kan Pilato, ngan ano an iya baton?

▪ Ano an nahitabo temprano han Domingo nga aga?