Kapitulo 60

Iginpakita an Himaya han Ginhadian han Kristo

HI Jesus kinadto ha mga lugar han Cesarea Filipos, ngan nagtutdo hiya ha mga tawo pati ha iya mga apostol. Iginpahibaro niya ha ira inin makapainteres nga sumat: “Ha pagkamatuod, susumatan ko kamo nga an iba nga naninindog dinhi diri mamamatay tubtob nga makita anay nira an Anak han tawo nga naabot ha iya Ginhadian.”

‘Ano an karuyag sidngon ni Jesus?’ bangin naghunahuna an mga disipulo. Paglabay hin mga usa ka semana, igin-upod ni Jesus hira Pedro, Santiago, ngan Juan, ngan sinagka hira ha hitaas nga bukid. Posible nga gab-i adto, kay nahingangaturog an mga disipulo. Samtang nag-aampo hi Jesus, nabag-o an iya hitsura. An iya nawong nagsilaw sugad han adlaw, ngan an iya mga panapton naglamrag sugad hin sugâ.

Katapos, may nakita hira nga duha nga indibiduwal, hira “Moises ngan Elias,” ngan nakiistorya kan Jesus mahitungod han iya ‘pagbaya nga matutuman ha Jerusalem.’ An pagbaya nagpapasabot han kamatayon ni Jesus ngan han iya pagkabanhaw. Salit, ini nga pag-iristorya nagpapakita nga an iya makaarawod nga kamatayon diri sadang likyan, sugad han karuyag ni Pedro.

Nawara an kahingaturugon han mga disipulo, salit nahipapausa nga nagkinita ngan nagpinamati hira. Bisan kon bisyon la ito, baga gud ito hin tinuod salit sinagbang hi Pedro: “Ginoo, maopay kay nakaupod kami nganhi. Kon karuyag mo, magtitindog ako dinhi hin tulo nga tolda, usa para ha imo, usa para kan Moises ngan usa para kan Elias.”

Han nagyayakan pa hi Pedro, nalandongan hira hin malamrag nga dampog, ngan may tingog tikang hito nga nagsiring: “Ini an akon Anak nga hinigugma, nga akon nalilipayan. Pamati kamo ha iya.” Pakabati hito han mga disipulo, nanyukbo hira. Pero hi Jesus nagsiring: “Buhát kamo, ngan ayaw kahadlok.” Pagbuhát nira, waray na hira iba nga nakita kondi hi Jesus na la.

Paglusad nira ha bukid, gintugon hira ni Jesus: “Ayaw niyo isumat ha bisan hin-o adto nga bisyon tubtob nga banhawon an Anak han tawo.” Tungod kay nakita han mga disipulo hi Elias ha bisyon, nagpakiana hira: “Kay ano nga nasiring an mga eskriba nga kinahanglan mahiuna pagkanhi hi Elias?”

“Kinanhi na hi Elias,” siring ni Jesus, “pero waray nira kilalaha hiya.” An gin-uunabi ni Jesus hi Juan nga Parabaptis, nga nagtuman han papel nga pariho han kan Elias. Gin-andam ni Juan an dalan para han Kristo, sugad han ginhimo ni Elias para kan Eliseo.

Naparig-on gud hi Jesus hito nga bisyon ngan an mga disipulo! Ito nga bisyon sugad hin patiuna nga pagpakita han himaya han ginhadian han Kristo. Sugad hin nakita han mga disipulo “an Anak han tawo nga naabot ha iya Ginhadian,” sumala ha iginsaad ni Jesus usa ka semana pa la an naglabay. Han namatay hi Jesus, nagsurat hi Pedro mahitungod han ira pagin ‘mga testigo nga nakakita han pagkaharangdon han Kristo samtang kaupod hira niya ha baraan nga bukid.’

An mga Pariseo nangaro kan Jesus hin tigaman nga nagpapamatuod nga hiya an iginsaad ha Kasuratan nga Hadi nga ginpili han Dios. Pero waray hira tagi hito. Ha luyo nga bahin, iginpakita ha duok nga mga disipulo ni Jesus an pagbag-o han iya hitsura sugad nga pamatuod han mga tagna mahitungod han Ginhadian. Salit, ha urhi nagsurat hi Pedro: “Nagin mas marig-on an amon pagsarig ha tagna.” Mateo 16:13, Mt 16:28–17:13; Marcos 9:1-13; Lucas 9:27-37; 2 Pedro 1:16-19.

▪ Antes mamatay, paonan-o nakita han pipira an Kristo nga naabot ha iya Ginhadian?

▪ Ha bisyon, ano an gin-istoryahan nira Moises, Elias, ngan Jesus?

▪ Kay ano nga naparig-on gud hito nga bisyon an mga disipulo?