Kapitulo 124

Igintubyan Ngan Gindara

NABANTAD hi Pilato ha dignidad ngan pagin kalmado ni Jesus bisan kon ginpasakitan hiya, salit nangalimbasog na liwat hiya nga buhian hi Jesus, pero mas nasina an punoan nga mga saserdote. Determinado hira nga waray makaulang ha ira maraot gud nga katuyoan. Salit ginuliat na liwat hira: “Igraysang hiya! Igraysang hiya ha kahoy!”

“Dad-a niyo hiya ngan kamo an pagraysang ha iya ha kahoy,” siring ni Pilato. (Kabaliktaran han una nga ginsiring han mga Judio, bangin may awtoridad hira ha pagpatay ha mga kriminal tungod ha mga pagtalapas ha relihiyon kon mabug-at gud ito.) Katapos, ha ikalima nga higayon, iginpahayag ni Pilato nga waray sala hi Jesus: “Waray ako nakikita ha iya nga sayop.”

Han nakita han mga Judio nga pakyas an ira politikal nga mga akusasyon, gin-utro nira an ira akusasyon nga pagpasipara ha relihiyon nga ira iginbangon ha pagbista kan Jesus ha Sanhedrin pipira ka oras pa la an naglabay. “May balaud kami,” siring nira, “ngan sumala ha balaud kinahanglan mamatay hiya kay nasiring hiya nga anak hiya han Dios.”

Para kan Pilato, bag-o ito nga akusasyon, salit mas nahadlok hiya. Yana, nasantop niya nga diri ordinaryo nga tawo hi Jesus, sugad han inop han iya asawa ngan han talagsahon nga karig-on han personalidad ni Jesus. Pero ‘anak han Dios’? Maaram hi Pilato nga taga-Galilea hi Jesus. Pero posible ba nga nabuhi na hiya hadto? Ginpasulod utro ni Pilato hi Jesus ha palasyo, ngan ginpakianhan: “Diin ka nagtikang?”

Waray bumaton hi Jesus. Ginsumatan na niya hi Pilato nga hadi hiya pero an iya Ginhadian diri dinhi hini nga kalibotan. Diri na kinahanglan nga saysayan pa hi Pilato. Pero naalohan hiya han waray bumaton hi Jesus, salit nasisina nga nagsiring hiya: “Kay ano nga diri ka nakikiistorya ha akon? Diri ka ba maaram nga may awtoridad ako ha pagpagawas ha imo ngan ha pagraysang ha imo ha kahoy?”

“Waray ka gud unta awtoridad ha akon kon waray ito ighatag ha imo tikang ha kahitas-an,” matinalahuron nga nagsiring hi Jesus. Iginpapasabot niya nga gintutugotan han Dios nga magkaada hin awtoridad an magmarando nga mga tawo ha pagdumara han mga buruhaton ha tuna. Nagsiring pa hi Jesus: “Tungod hini, mas daku an sala han tawo nga nagtubyan ha akon nganhi ha imo.” Oo, mas daku an baratunon han hitaas nga saserdote nga hi Caifas, han iya mga kakunsabo ngan ni Judas Iscariote kay ha kan Pilato tungod han ira waray hustisya nga pagtratar kan Jesus.

Tungod kay mas bumilib hi Pilato, ngan nahadlok hiya nga bangin tikang ha Dios hi Jesus, nangalimbasog na liwat hiya nga buhian hi Jesus. Pero diniri an mga Judio. Gin-utro nira an ira politikal nga akusasyon, ngan tuso nga nagtarhog: “Kon buhian mo ini nga tawo, diri ka sangkay han Cesar. Bisan hin-o nga nasiring nga hadi hiya nakontra ha Cesar.”

Bisan pa hito nga panarhog, igin-gawas utro ni Pilato hi Jesus. “Kitaa! An iyo hadi!” nagsiring na liwat hiya.

“Pataya hiya! Pataya hiya! Igraysang hiya ha kahoy!”

“Igraraysang ko ba ha kahoy an iyo hadi?” nababaraka nga nagpakiana hi Pilato.

Nasisina an mga Judio nga sakop hira han mga Romano. Oo, nadiri gud hira ha pagmando han Roma ha ira! Pero may pagkahipokrito nga nagsiring an punoan nga mga saserdote: “Waray kami iba nga hadi kondi an Cesar.”

Tungod kay nahahadlok hi Pilato nga maapektohan an iya katungdanan ha politika ngan reputasyon, ha urhi sinugot na la hiya ha igin-iinsister han mga Judio. Iya igintubyan hi Jesus ha ira. Ginhukas han mga sundalo an iya purpura nga kapa ngan ginsul-otan han iya pantungbaw nga mga panapton. Samtang gindadara hi Jesus basi igraysang, iginpapas-an ha iya an iya pasakitan nga kahoy.

Yana posible nga tikaudto na han Biernes, Nisan 14. Hi Jesus waray pa katurog tikang han Huwebes nga aga, ngan nag-antos hiya hin sunod-sunod nga duro nga kasakitan. Tungod hito nawarayan hiya hin kusog ha pagpinas-an han mabug-at nga kahoy. Salit, han linabay hi Simon nga taga-Cirene ha Aprika ginpirit nira hiya nga sumaliwan pagpas-an hito. Samtang tikadto hira, damu nga tawo, upod na an kababayin-an, an nagsinunod ha iya nga nagpupukpok han ira dughan tungod han duro nga kasubo, ngan nagpipinanangis tungod kan Jesus.

Liningi hiya ha kababayin-an ngan nagsiring: “Mga anak nga babaye han Jerusalem, ayaw na kamo pagtinangis tungod ha akon. Lugod, pagtangis kamo tungod ha iyo kalugaringon ngan ha iyo mga anak kay maabot an panahon nga an mga tawo masiring, ‘Malipayon an baog nga kababayin-an, adton waray manganak ngan adton waray ginpasuso!’ . . . Kon ginbubuhat nira ini samtang buhi pa an kahoy, ano an mahitatabo kon mauga na ito?”

An gin-uunabi ni Jesus nga kahoy nagsisimbolo han Judio nga nasud, nga buhi pa tungod han presensya ni Jesus ngan han mga nanhibilin nga natoo ha iya. Pero kon kuhaon na hira tikang hini nga nasud, an mahibibilin na la amo iton kahoy nga patay ha espirituwal, oo, an nauga nga organisasyon han nasud. Duro gud nga panangis an mahitatabo kon an Judio nga nasud bungkagon na han Romano nga kasundalohan, nga gagamiton han Dios basi ipadapat an iya paghukom! Juan 19:6-17; 18:31; Lucas 23:24-31; Mateo 27:31, 32; Marcos 15:20, 21.

▪ Ano an igin-akusar kan Jesus han mga lider han relihiyon han napakyas an ira politikal nga mga akusasyon?

▪ Kay ano nga mas nahadlok hi Pilato?

▪ Hin-o an may mas daku nga baratunon ha nahitabo kan Jesus?

▪ Paonan-o hi Pilato nakombinse han mga saserdote nga itubyan hi Jesus basi patayon?

▪ Ano an ginsiring ni Jesus ha kababayin-an nga nagtitinangis tungod ha iya? Ano an iginpapasabot ni Jesus han gin-unabi niya nga an kahoy “buhi pa” ngan katapos ‘nauga’?