Kapitulo 20

Ikaduha nga Milagro ha Cana

INULI hi Jesus ha ira lugar katapos hin mauruiha nga pagsangyaw ha Judea, pero diri basi pumahuway. Lugod, mas daku pa nga buruhaton ha ministeryo an iya gintikangan ha Galilea, an lugar diin hiya nagdaku. Kondi an iya mga disipulo inuli ha ira mga pamilya ngan binalik ha ira mga trabaho, imbes nga umupod ha iya.

Ano an mensahe nga iginsangyaw ni Jesus? Amo ini: “Hirani na an Ginhadian han Dios. Magbasol kamo ngan tumoo ha maopay nga sumat.” Ano an reaksyon han mga taga-Galilea? Ginkarawat nira hi Jesus. Ginpasidunggan hiya han ngatanan. Pero diri ito tungod han iya mensahe, kondi tungod kay damu ha ira an nakakita han iya mga milagro ha Jerusalem durante han Paskua.

Posible nga ha Cana gintikangan ni Jesus an iya daku nga buruhaton ha ministeryo ha Galilea. Antes hini, bangin nahinunumdoman mo han ginhimo niya nga bino an tubig ha usa nga kasal didto han pagbalik niya tikang ha Judea. Hinin ikaduha nga higayon, nahituman nga grabe an sakit han anak han usa nga opisyal ni Hadi Herodes Antipas. Pakabati han opisyal nga adto hi Jesus ha Cana tikang ha Judea, nagbiyahe hiya tikang ha ira balay ha Capernaum basi makigkita kan Jesus. Masurub-on nga nakimalooy hiya: ‘Ginoo, alayon kadtoa dayon an akon anak antes hiya mamatay.’

Hi Jesus nagsiring: ‘Sige, uli na; nag-opay na an imo anak.’ Tinoo hito an opisyal ni Herodes ngan nagbiyahe hiya hin hirayo tipauli. Ha dalan, gintapo hiya han iya nagdadagmit nga mga surugoon basi isumat ha iya nga nag-opay na an iya anak! ‘Kakan-o nag-opay an bata?’ nagpakiana hiya.

“Kakulop han mga ala-una han kulop,” binaton hira.

Nasantop han opisyal nga nahitabo ito ha oras mismo han nagsiring hi Jesus, ‘Nag-opay na an imo anak!’ Tungod hito, hiya ngan an iya panimalay nagin mga disipulo han Kristo.

Salit an Cana nagpahimulos gud kay ikaduha na ini nga milagro ni Jesus didto han pagbalik niya tikang ha Judea. Syempre, diri la ito an milagro nga ginhimo ni Jesus, pero importante ito kay nagtitigaman ito han iya pagbalik ha Galilea.

Katapos inuli hi Jesus ha Nazaret. Ano an mahitatabo didto? Juan 4:43-54; Marcos 1:14, 15; Lucas 4:14, 15.

▪ Han inuli hi Jesus ha Galilea, ano an ginhimo han iya mga disipulo? Ano an reaksyon ha iya han mga tawo?

▪ Ano nga milagro an ginhimo ni Jesus, ngan ano an epekto hito?

▪ Kay ano nga nagpahimulos gud an Cana ha ginhimo ni Jesus?