Kapitulo 107

Ilustrasyon Mahitungod han Panagtawo ha Kasal

PINAAGI han duha nga ilustrasyon, iginbuhayhag ni Jesus an mga eskriba ngan an punoan nga mga saserdote, salit karuyag nira nga patayon hiya. Pero may ig-iistorya pa hiya. Naghatag hiya hin usa pa nga ilustrasyon:

“An Ginhadian han langit iginpariho ha panagtawo ha kasal nga gin-andam han hadi para ha iya anak nga lalaki. Ngan ginsugo niya an iya mga uripon nga dapiton an mga gin-imbitar ha kasal, pero waray maruyag pagkadto an mga gin-imbitar.”

Hi Jehova nga Dios amo an Hadi nga nag-andam hin panagtawo ha kasal para ha iya Anak nga hi Jesu-Kristo. Ha itinanda nga panahon, makakaupod ni Jesus ha langit an karaslon nga babaye nga amo an 144,000 nga dinihogan nga mga sumurunod. An mga sakop han Hadi amo an katawohan han Israel nga gintagan hin oportunidad nga magin ‘ginhadian han mga saserdote’ pinaagi han Balaud nga kasabotan nga ginhimo han 1513 B.C.E. Salit hito nga higayon, hira an orihinal nga gin-imbitar ha panagtawo ha kasal.

Kondi, an siyahan nga pagdapit ha mga gin-imbitar nagtikang la han katrakdag han 29 C.E., han hi Jesus ngan an mga disipulo (an mga uripon han hadi) nagtikang magsangyaw han Ginhadian. Pero an literal nga mga Israelita nga gindapit han mga uripon tikang han 29 C.E. tubtob han 33 C.E. waray maruyag pagkadto. Salit gintagan han Dios hin usa pa nga higayon ito nga nasud nga gin-imbitar.

Nagsaysay hi Jesus: “Nagsugo utro hiya hin iba nga mga uripon, ngan ginsidngan, ‘Sumati an mga gin-imbitar: “Nag-andam ako hin panagtawo, nag-ihaw ako hin mga baka ngan pinatambok nga mga hayop, ngan andam na an ngatanan. Kadi kamo ha panagtawo ha kasal.”’” Ito nga ikaduha ngan ultimo nga pagdapit ha mga gin-imbitar nagtikang han Pentekostes 33 C.E., han iginbuhos an baraan nga espiritu ha mga sumurunod ni Jesus. Nagpadayon ito nga pagdapit tubtob han 36 C.E.

Pero ginbalewaray liwat ito han kadam-an nga mga Israelita. Nagsiring hi Jesus: “Ginbalewaray ito han mga gin-imbitar, lugod linakat hira, an usa kinadto ha iya uma, ngan an usa kinadto ha iya negosyo. Pero gindakop han iba an iya mga uripon, ginmaltrato ngan ginpatay hira. Salit nangalas an hadi ngan ginsugo an iya mga sundalo nga patayon ito nga mga kriminal ngan sunugon an ira syudad.” Nahitabo ito han 70 C.E., han ginbungkag han mga Romano an Jerusalem, ngan ginpamatay ito nga mga kriminal.

Nagsaysay pa hi Jesus: “Katapos, nagsiring [an hadi] ha mga uripon, ‘Andam na an panagtawo ha kasal, kondi diri takos an mga imbitado. Salit kadto kamo ha mga dalan tipagawas ha syudad, ngan bisan hin-o nga iyo igkita imbitara ha panagtawo ha kasal.’” Gintuman ito han mga uripon, ngan “an lugar han seremonya ha kasal napuno hin mga bisita.”

Ito nga pagdapit ha mga bisita ha mga dalan ha gawas han syudad nagtikang han 36 C.E. An Romano nga opisyal han kasundalohan nga hi Cornelio ngan an iya pamilya amo an siyahan nga gindapit ha diri turi nga mga diri-Judio. Nagpapadayon tubtob ha aton panahon ini nga pagdapit ha mga diri-Judio, nga kasaliwan han orihinal nga mga gin-imbitar nga nagbalewaray.

Durante ha aton panahon napuno an lugar han seremonya ha kasal. Iginsaysay ni Jesus an sunod nga nahitabo: “Han sinulod an hadi basi usisahon an mga bisita, nakita niya an usa nga tawo nga an bado diri naangay ha okasyon ha kasal. Salit an hadi nagpakiana ha iya, ‘Sangkay, kay ano nga nakasulod ka dinhi nga an imo bado diri man naangay ha okasyon ha kasal?’ Waray makabaton ito nga tawo. Katapos, ginsugo han hadi an iya mga surugoon, ‘Gaposa an iya mga kamot ngan mga tiil ngan ilabog hiya ha kasisidman ha gawas. Didto hiya magtatangis ngan mangingigot an iya mga ngipon.’”

An tawo nga an bado diri naangay ha okasyon ha kasal nagrirepresentar ha diri totoo nga mga Kristiano han Kakristianohan. Waray gud hira kilalaha han Dios sugad nga may husto nga pangirilal-an han pagin espirituwal nga mga Israelita. Waray gud hira dihugi han Dios han baraan nga espiritu sugad nga mga manurunod han Ginhadian. Salit iginlabog hira ha kasisidman ha gawas diin bubungkagon hira.

Sugad nga konklusyon, hi Jesus nagsiring: “Damu an gin-imbitar, kondi gutiay la an ginpili.” Oo, damu an gin-imbitar ha nasud han Israel basi magin membro han maarasawa han Kristo, pero gutiay la nga literal nga mga Israelita an napili. Diri Israelita an kadam-an han 144,000 nga bisita nga nakakarawat han balos nga mahingadto ha langit. Mateo 22:1-14; Eksodo 19:1-6; Pahayag 14:1-3.

▪ Hin-o an orihinal nga mga gin-imbitar ha panagtawo ha kasal, ngan kakan-o ito nahitabo?

▪ Kakan-o an siyahan nga pagdapit ha mga gin-imbitar? Hin-o an mga uripon nga ginsugo ha pagdapit?

▪ Kakan-o an ikaduha nga pagdapit? Hin-o an mga gindapit katapos hito?

▪ Hin-o an ginrirepresentaran han tawo nga an bado diri naangay ha okasyon ha kasal?

▪ Hin-o an damu nga gindapit, ngan an gutiay nga napili?