Kapitulo 103

Kinadto Utro ha Templo

TULO ka gab-i na nga nahuron ha Betania hi Jesus ngan an mga disipulo han inabot hira tikang ha Jerico. Yana, temprano pa han Lunes nga aga, Nisan 10, nagbabaktas na hira pakadto ha Jerusalem. Gin-gutom hi Jesus salit han nakita niya an kahoy nga igera nga may mga dahon, gindaop niya ito basi kitaon kon may mga bunga.

Diri pa panahon ha panaringsing han kahoy nga igera kay ikatarapos pa la han Marso; ha Hunyo pa an pamunga hito. Pero tungod kay temprano ito nagkaada hin mga dahon, naghunahuna hi Jesus nga may mga bunga liwat ito. Kondi napakyas hiya. Malimbong ito pagkit-on tungod han mga dahon. Salit iginsumpa niya an kahoy: “Tikang yana waray na gud makakakaon han imo bunga.” Kinabuwasan nahibaroan an epekto ngan an kahulogan hito.

Hi Jesus ngan an mga disipulo inabot na ha Jerusalem. Kinadto hiya ha templo, nga iya gin-usisa han naglabay nga kulop. Pero yana, may ginbuhat hiya, sugad han iya ginbuhat tulo ka tuig na an naglabay han Paskua han 30 C.E. Ginpaiwas niya an mga namamaligya ngan namamalit ha templo ngan ginbalintong an mga lamesa han mga parabalyo hin kwarta ngan an mga lingkoran han mga parabaligya hin sarapati. Gindid-an pa ngani niya pag-agi ha templo an bisan hin-o nga may dara nga butang.

Ginkondenar ni Jesus an mga parabalyo hin kwarta ngan namamaligya hin mga hayop. “Diri ba ini an iginsurat: ‘An akon balay tatawagon nga balay nga arampoan han ngatanan nga nasud’? Pero ginhimo niyo ini nga lungib han mga kawatan,” siring niya. Mga kawatan hira kay duro kamahal an ira pagbaligya ha mamaralit nga waray mahihimo kondi pumalit ha ira hin mga hayop nga ighahalad. Salit iya gintagad ito nga mga negosyo sugad nga panikas o pangawat.

Han hinbatian han punoan nga mga saserdote, mga eskriba, ngan mga lider han katawohan an ginbuhat ni Jesus, namiling na liwat hira hin paagi ha pagpatay ha iya. Iginpapakita hito nga diri na gud hira magbabag-o. Pero diri hira maaram kon paonan-o hiya papatayon, kay nagsisinunod ha iya an damu nga tawo basi mamati ha iya.

Labot han literal nga mga Judio, tinambong liwat ha Paskua an mga Hentil. Mga proselita hira, karuyag sidngon, mga nakombirte ha relihiyon han mga Judio. May dinaop kan Felipe nga mga Griego, posible nga mga proselita, ngan naghangyo hira nga makigkita kan Jesus. Salit kinadto hi Felipe kan Andres, bangin basi magpakiana kon angayan ba ito. Posible nga nakadto pa hi Jesus ha templo, diin mahimo hiya makita han mga Griego.

Maaram hiya nga pipira ka adlaw na la an nabibilin ha iya, salit naghatag hiya hin maopay nga ilustrasyon mahitungod han iya kahimtang: “Inabot na an oras basi himayaon an Anak han tawo. Ha pagkamatuod susumatan ko kamo, Kon an usa nga liso han trigo diri mahulog ha tuna ngan diri mamatay, magpapabilin ito nga usa la nga liso; pero kon mamatay ito, mamumunga ito hin damu.”

Gutiay la an kapulsanan han usa nga liso o lugas han trigo. Pero ano an mahitatabo kon itanom ito ha tuna ngan “mamatay,” o matapos an pagin lugas hito? Matubo ito ngan paglabay han panahon mangunguhay nga may damu nga lugas. Ha pariho nga paagi, hi Jesus usa la nga perpekto nga tawo. Pero kon mamatay hiya nga matinumanon ha Dios, hiya an magigin paagi basi makakarawat hin kinabuhi nga waray kataposan an mga matinumanon nga may espiritu hin pagsakripisyo pariho ha iya. Salit nagsiring hiya: “An nahigugma ha iya kalag mawawad-an hito, pero an nasisina ha iya kalag dinhi hini nga kalibotan magpapanalipod hito para ha kinabuhi nga waray kataposan.”

Matin-aw nga an ginhuhunahuna ni Jesus diri la an iya kalugaringon, kay nagsiring hiya: “An bisan hin-o nga naruruyag mag-alagad ha akon, sadang hiya sumunod ha akon, ngan bisan diin ako kumadto, aadto liwat an akon surugoon. An bisan hin-o nga naruruyag mag-alagad ha akon, bibendisyonan hiya han Amay.” Makalilipay gud ito nga balos ha pagsunod kan Jesus ngan pag-alagad ha iya! Ito an balos sugad nga binendisyonan han Amay, an pagin kaupod han Kristo ha Ginhadian.

Han ginhuhunahuna ni Jesus an duro nga pag-antos ngan masakit nga kamatayon nga iya maieksperyensyahan, nagsiring hiya: “An akon kalag nasusubo gud yana, ngan ano an akon masisiring? Amay, talwasa ako ha mahitatabo hini nga oras.” Kon malilikyan la unta niya ito! Pero, diri, kay hiya nagsiring: “Ini nga oras kinahanglan umabot ha akon, amo nga aanhi ako.” Nauyon hi Jesus ha bug-os nga kahikayan han Dios, upod na an paghalad mismo han iya kinabuhi. Mateo 21:12, 13, 18, 19; Marcos 11:12-18; Lucas 19:45-48; Juan 12:20-27.

▪ Kay ano nga naghunahuna hi Jesus nga may bunga an kahoy nga igera bisan kon diri pa panahon han pamunga hito?

▪ Kay ano nga gintawag ni Jesus nga “mga kawatan” an namamaligya ha templo?

▪ Ha ano nga paagi hi Jesus pariho hin lugas han trigo nga namatay?

▪ Ano an gin-abat ni Jesus mahitungod han pag-antos ngan kamatayon nga iya maieksperyensyahan?