Kapitulo 94

Kinahanglan Mag-ampo Ngan Magpaubos

DIRI pa la maiha, han nakadto hi Jesus ha Judea, naghatag hiya hin ilustrasyon mahitungod han pagkaimportante han padayon nga pag-ampo. Yana, ha iya ultimo nga pagbiyahe ngadto ha Jerusalem, ginpabug-atan na liwat niya nga kinahanglan diri umundang ha pag-ampo. Posible nga nakadto pa hiya ha Samaria o ha Galilea han iginsaysay niya ha mga disipulo inin dugang nga ilustrasyon:

“Ha usa nga syudad may huwes nga waray kahadlok ha Dios ngan waray respeto ha tawo. May balo nga babaye liwat didto nga nagbinalikbalik ha iya ngan nagsiniring, ‘Alayon siguroha nga makarawat ko an hustisya ha akon kaso.’ Waray anay hiya maruyag pagbulig ha balo. Pero ha urhi nagsiring hiya ha kalugaringon, ‘Bisan kon diri ako nahahadlok ha Dios o narespeto ha tawo, tungod kay gindidinisturbo ako hini nga balo, sisiguruhon ko nga makarawat niya an hustisya basi diri na hiya magbinalikbalik ngan magpinirit ha akon tubtob nga diri na ako makailob.’”

Katapos, iginsaysay ni Jesus an aplikasyon hito: “Hinbatian ba niyo an ginsiring han huwes, bisan kon diri hiya matadong? Kon sugad, diri ba sisiguruhon han Dios nga mahatagan hin hustisya an iya mga pinili nga nangangamuyo ha iya ha adlaw ngan gab-i, samtang nagpapakita hiya hin hilawig nga pagpailob ha ira?”

Diri niya iginpapasabot nga hi Jehova nga Dios pariho hiton diri matadong nga huwes. Kon an diri matadong nga huwes magios tungod ha padayon nga pakimalooy, labi na gud nga mabaton an Dios nga matadong ngan maopay kon diri umundang ha pag-ampo an iya katawohan. Salit nagpadayon hi Jesus: ‘Susumatan ko kamo, sigurado nga tatagan dayon hira han Dios hin hustisya.’

Kasagaran nga diri gintatagan hin hustisya an mga ubos ngan pobre, pero ginpapaboran an mga maimpluwensya ngan riko. Kondi sisiguruhon han Dios nga maipadapat an makatadunganon nga sirot ha magraot, ngan matratar hin matadong an iya mga surugoon pinaagi ha paghatag ha ira hin kinabuhi nga waray kataposan. Pero mationan-o kadamu an natoo gud nga ipapadapat dayon han Dios an hustisya?

Nagpakiana hi Jesus basi pabug-atan an pagtoo may kalabotan ha gahum han pag-ampo: “Kon umabot na an Anak han tawo, makakakita gud ba hiya ha tuna hin sugad hini nga pagtoo?” Bisan kon waray ito batona, mahimo ito magpasabot nga diri damu an may sugad hito nga pagtoo kon umabot na an Kristo basi magmando ha Ginhadian.

An iba han mga namamati kan Jesus kompyansa na gud ha ira pagtoo. Kombinsido hira nga matadong hira, ngan ginmiminos an iba. Bangin ngani may mga disipulo hi Jesus nga sugad hito an panhunahuna. Salit naghatag hiya hin ilustrasyon:

“May duha ka tawo nga kinadto ha templo basi mag-ampo, an usa Pariseo ngan an usa parasukot hin buhis. An Pariseo tinindog ngan nag-ampo hin hilom, ‘O Dios, nagpapasalamat ako ha imo kay diri ako pariho hini nga parasukot hin buhis o ha iba—mga kawatan, diri matadong, nag-aadulteryo. Kada semana duha ka beses ako nga nagpupuasa; iginhahatag ko an ikanapulo ka bahin han ngatanan nga akon katigayonan.’”

Kilala an mga Pariseo ha ira dayag nga pagpakamatadong basi dayawon han iba. Kasagaran nga Lunes ngan Huwebes an ira kinalugaringon nga pagpuasa, ngan istrikto nga gintutuman nira an paghatag hin ikanapulo bisan han gudtiay nga mga tanom. Pipira ka bulan pa la an naglabay, nakita gud an ira pagminos ha ordinaryo nga mga tawo durante han Piyesta han mga Tabernakulo han nagsiring hira: “Ini nga mga tawo nga diri nasabot han Balaud [an interpretasyon hito han mga Pariseo] mga ginpanhimaraot.”

Ha pagpadayon han ilustrasyon, hi Jesus nagsaysay mahitungod han “ginpanhimaraot” nga tawo: “Kondi an parasukot hin buhis nga natindog ha hirayo diri ngani naruruyag paghangad ha langit, pero padayon nga ginpupukpok an iya dughan ngan nasiring, ‘O Dios, kalooyi ako nga usa nga makasasala.’” Tungod kay mapainubsanon nga ginkarawat han parasukot hin buhis an iya mga sala, nagsiring hi Jesus: “Susumatan ko kamo: Pag-uli niya, mas matadong hiya kay han Pariseo, kay an nagpapahitaas pauubson, kondi an nagpapaubos pahihitas-on.”

Salit ginpabug-atan na liwat ni Jesus nga kinahanglan magpaubos. Tungod kay nagtubo ha komunidad nga makusog an impluwensya han nagpapakamatadong nga mga Pariseo ngan pirme ginpapabug-atan an katungdanan ngan ranggo, diri urusahon nga naimpluwensyahan bisan an mga disipulo ni Jesus. Pero maopay gud nga mga leksyon ha pagpaubos an iya igintutdo! Lucas 18:1-14; Juan 7:49.

▪ Kay ano nga iginhatag han diri matadong nga huwes an hangyo han balo? Ano nga leksyon ha ilustrasyon an igintutdo ni Jesus?

▪ Ano nga klase hin pagtoo an kikitaon ni Jesus ha iya pag-abot?

▪ Para kan kanay an ilustrasyon ni Jesus mahitungod han Pariseo ngan han parasukot hin buhis?

▪ Ano nga batasan han mga Pariseo an sadang likyan?