Kapitulo 76

Kinaon Upod han Pariseo

KATAPOS ni Jesus batunon an mga kritiko nga nagpakiana kon diin tikang an iya gahum ha pagtambal ha tawo nga nangula, may Pariseo nga nag-imbitar ha iya ha pangaon. Kon nangangaon, an mga Pariseo naghuhunaw tubtob ha siko sugad nga pagtuman han ira tradisyon. Ginbubuhat nira ito antes ngan katapos han pangaon ngan bisan durante hito. Diri ito supak ha nakasurat nga balaud han Dios, pero sobra ito ha Iya iginpapatuman mahitungod ha paglimpyo uyon ha kustomre.

Han waray buhata ni Jesus an tradisyon, nahipausa an nag-imbitar ha iya. Bisan kon waray ginyakan an Pariseo, naobserbaran ito ni Jesus, ngan nagsiring: “Kamo nga mga Pariseo, ginhuhugasan niyo an gawas han tasa ngan yahong, pero an iyo kasingkasing puno hin kahakog ngan karaotan. Diri kamo makatadunganon! An naghimo han gawas amo liwat an naghimo han sulod, diri ba?”

Ito an iginbuhayhag ni Jesus tungod han pagkahipokrito han mga Pariseo nga naghuhunaw uyon ha kustomre kondi diri ginlilimpyohan an ira kasingkasing han karaotan. Nagsagdon hiya: “Ighatag sugad nga mga hatag tungod ha kalooy an mga butang nga aada ha sulod han iyo kasingkasing, ngan magigin limpyo an ngatanan nga butang mahitungod ha iyo.” Gugma an sadang magpagios ha ira ha paghatag, diri an hingyap nga dayawon han iba tungod han ira pakunokuno nga pagin matadong.

“Kairo niyo nga mga Pariseo,” siring niya, “kay iginhahatag niyo an ikanapulo nga bahin han herbabuena ngan ruda ngan han iba pa nga klase hin utanon, pero ginbabalewaray niyo an hustisya ngan gugma han Dios! Obligado kamo nga buhaton ini, pero diri niyo sadang igbalewaray an iba nga butang.” An Balaud han Dios nagsusugo ha Israel nga maghatag han ikanapulo nga bahin han ira produkto ha uma. An herbabuena ngan ruda gudtiay nga tanom nga iginpapanakot ha pagkaon. Diri gud ginkakalimtan han mga Pariseo an paghatag han ikanapulo bisan hinin gudtiay nga tanom, pero ginkondenar hira ni Jesus tungod han ira pagbalewaray han mas importante nga sugo nga magpakita hin gugma, magin buotan, ngan mapainubsanon.

Nagpadayon hi Jesus ha pagkondenar ha ira: “Kairo niyo nga mga Pariseo, kay karuyag niyo lumingkod ha prente nga mga lingkoran ha sinagoga ngan hatagan hin katalahoran han mga tawo ha mga merkado! Kairo niyo, kay pariho kamo han mga lubnganan nga diri nakikita, salit natatamakan ito han mga tawo pero diri hira maaram!” Diri nakikita an kahugaw han mga Pariseo. An ira relihiyon maopay pagkit-on pero waray totoo nga kapulsanan! Iginbasar ito ha pagkahipokrito.

Samtang namamati hito, may abogado nga eksperto ha Balaud han Dios nga nagreklamo: “Magturutdo, tungod hini nga imo ginsiring, gin-iinsulto mo liwat kami.”

Para kan Jesus, ini nga mga eksperto ha Balaud may baratunon liwat. Nagsiring hiya: “Kairo liwat niyo nga mga eksperto ha Balaud, kay ginpapapas-an niyo an mga tawo hin paras-anon nga makuri dad-on, pero kamo mismo diri naruruyag bisan pagbantad hito han iyo tudlo! Kairo niyo, kay naghihimo kamo hin mga lubnganan han mga propeta, pero an iyo kaapoy-apoyan an nagpatay ha ira!”

An mga pinas-an nga gin-unabi ni Jesus amo an yinakan nga mga tradisyon, pero ini nga mga abogado diri ngani nag-iiban hin bisan usa nga gutiay nga surundon basi magin mas magaan para ha mga tawo. Iginbuhayhag niya nga ginkonsinter pa ngani nira an pagpatay ha mga propeta, salit nagpahamangno hiya: “‘Ini nga henerasyon an may baratunon han ginpaagay nga dugo han ngatanan nga propeta tikang pa ha tinikangan han kalibotan, tikang ha dugo ni Abel tubtob ha dugo ni Sakarias, nga ginpatay ha butnga han halaran ngan han balay.’ Oo, susumatan ko kamo: May baratunon ini nga henerasyon.”

An katawohan nga mahimo matubos nagtikang han manganak hira Adan ngan Eva; kon sugad, hi Abel nabuhi “ha tinikangan han kalibotan.” Katapos han makangingirhat nga pagpatay kan Sakarias, ginbungkag han kasundalohan han Sirya an Juda. Pero nagtagna hi Jesus hin mas grabe nga kabungkagan han iya mismo henerasyon tungod han mas duro nga karaotan hito. Ini nga kabungkagan nahitabo paglabay hin 38 ka tuig, han 70 C.E.

Nagpadayon hi Jesus ha pagkondenar ha ira: “Kairo niyo nga mga eksperto ha Balaud, kay ginkuha niyo an yawi han kahibaro; kamo mismo diri nasulod, ngan an mga nasulod iyo ginpupugngan!” Obligasyon han mga eksperto ha Balaud nga isaysay ha mga tawo an Pulong han Dios, ngan ipatin-aw an kahulogan hito. Pero waray nira ito buhata ngan ginpugngan pa ngani nira an mga tawo nga makasabot.

An mga Pariseo ngan an mga eksperto ha balaud nasina gud kan Jesus kay iginbuhayhag hira. Paggawas niya ha balay, ginkontra gud nira hiya ngan ginpauranan hin pakiana. Nagbinantay hira nga may maiyakan hiya nga magagamit nira ha pag-aresto ha iya. Lucas 11:37-54; Deuteronomio 14:22; Mika 6:8; 2 Kronikas 24:20-25.

▪ Kay ano nga ginkondenar ni Jesus an mga Pariseo ngan an mga eksperto ha Balaud?

▪ Ano nga mga pinas-an an iginpapapas-an han mga abogado ha mga tawo?

▪ Kakan-o an “tinikangan han kalibotan”?