Kapitulo 123

“Kitaa! An Tawo!”

BUMILIB gud hi Pilato ha pagin kalmado ni Jesus ngan nasantop niya nga waray hiya sala, salit naghimo pa hiya hin paagi nga buhian hiya. “Kustomre liwat niyo,” siring niya ha mga tawo, “nga may buhian ako nga priso ha panahon han Paskua.”

Hito nga panahon, priso liwat hi Barabas nga bantogan nga parapamatay, salit nagpakiana hi Pilato: “Hin-o an karuyag niyo nga buhian ko, hi Barabas o hi Jesus nga tinatawag nga Kristo?”

Nakombinse na han punoan nga mga saserdote an mga tawo, salit naghangyo hira nga buhian hi Barabas pero patayon hi Jesus. Waray maruyag hi Pilato, salit nagpakiana utro hiya: “Hin-o ha duha an karuyag niyo nga buhian ko?”

Naggugliat hira: “Hi Barabas.”

“Ano man an akon bubuhaton kan Jesus nga tinatawag nga Kristo?” nababaraka nga nagpakiana hi Pilato.

Nakakabungol nga binaton hira: “Igraysang hiya ha kahoy!” “Igraysang hiya! Igraysang hiya ha kahoy!”

Maaram hi Pilato nga karuyag nira mamatay an waray sala nga tawo, salit nakimalooy hiya: “Kay ano? Ano nga maraot an ginbuhat hini nga tawo? Waray ako nakita ha iya nga angay hin kamatayon. Salit sisirotan ko hiya ngan bubuhian.”

Bisan pa han iya mga pangalimbasog, an nasisina nga mga tawo nga ginsulsolan han ira mga lider han relihiyon, padayon nga nagsinggit: “Igraysang hiya ha kahoy!” Tungod kay naaghat han mga saserdote, karuyag han mga tawo nga may patayon. Kon huhunahunaon, lima pa la ka adlaw an naglabay, an iba ha ira posible nga kaupod han mga tinapo kan Jesus ha Jerusalem sugad nga Hadi! Samtang nahitatabo ito, an mga disipulo ni Jesus, kon nakadto man, nagpadayon nga hilom ngan nangalimbasog nga diri makilal-an.

Han nakita ni Pilato nga waray hiya mahihimo kay nagtikasamok la lugod hira, kinuha hiya hin tubig ngan naghunaw ha atubangan han mga tawo ngan nagsiring: “Waray ako baratunon ha dugo hini nga tawo. Kamo na an bahala.” Dida hito, nagsiring hira: “Kami ngan an amon mga anak an may baratunon ha iya dugo.”

Salit, uyon ha ira gin-aaro—ngan basi ihatag an karuyag han mga tawo imbes nga buhaton an iya ginhuhunahuna nga husto—ginbuhian ni Pilato hi Barabas. Igintubyan niya hi Jesus, ginpahukasan han bado ngan iginpalatigo. Diri ito ordinaryo nga paglatigo.

An The Journal of the American Medical Association nasiring mahitungod hito: “An kasagaran nga ginagamit amo an halipot nga latigo (flagrum o flagellum) nga may pipira nga tinabas o sinalapid nga anit nga iba-iba an kahilaba, nga dida hito lurolat-ang nga iginhigot an gudtiay nga mga bolitas nga puthaw o magtais nga mga tul-an han karnero. . . . Samtang an likod han biktima pauroutro nga ginlalatigo hin makusog han Romano nga mga sundalo, an mga bolitas nga puthaw nakakabun-og hin grabe, ngan an tinabas nga mga anit ngan mga tul-an han karnero nakakasamad han panit ngan mga unod. Ngan samtang nagpapadayon an paglatigo, an mga samad nagtitikahilarom tubtob ha kaunoran hirani ha tul-an ngan nagriresulta ha pangurog han nagdidinugo nga mga unod.”

Katapos hiton duro nga pagpasakit, gindara hi Jesus ha palasyo han gobernador, ngan gintirok an bug-os nga grupo han kasundalohan. Didto ginpasakitan pa gud hiya han kasundalohan han naghimo hira hin korona nga mga tunok ngan iginduon ito ha iya ulo. Ginpakaptan ha iya too nga kamot an usa nga tangbo, ngan ginsul-otan hiya hin purpura nga panapton, pariho han iginsusul-ot han hadi. Ngan nakakainsulto nga nagsiring hira: “Kumusta ka na, Hadi han mga Judio!” Gintuprahan liwat hiya ngan gintampalo. Ginkuha nira an matig-a nga tangbo nga iya ginkakaptan ngan iginbalbag ito ha iya ulo, salit mas nahiduon pa ha iya anit an mga tunok han “korona” nga ginhimo sugad nga pakaalo ha iya.

Bumilib gud hi Pilato ha diri ordinaryo nga dignidad ngan karig-on ni Jesus bisan pa hito nga pagmaltrato, salit nagsari utro hiya nga buhian hi Jesus. “Kitaa! Ginpapagawas ko hiya nganhi ha iyo basi hibaroan niyo nga waray ako nakikita ha iya nga sayop,” siring niya ha mga tawo. Posible nga naghuhunahuna hiya nga kon makita nira an ginpasakitan nga hi Jesus, malolooy hira. Samtang natindog hi Jesus ha atubangan han waray kalooy nga mga tawo, ngan may korona nga mga tunok, nakasul-ot han purpura nga pantungbaw nga panapton, ngan nakikita ha iya nagdidinugo nga nawong an kasakit, nagsiring hi Pilato: “Kitaa! An tawo!”

Bisan kon ginkastigo ngan nagkasasamaran, natindog an pinakamaopay nga tawo ha bug-os nga kasaysayan, nga amo an pinakabantogan nga tawo nga nabuhi! Oo, an dignidad ngan pagin kalmado ni Jesus nagpapakita hin daku nga dungog nga ginkilala bisan ni Pilato, kay may pagtahod ngan kalooy an paagi han iya pagyakan. Juan 18:39–19:5; Mateo 27:15-17, 20-30; Marcos 15:6-19; Lucas 23:18-25.

▪ Ano an ginbuhat ni Pilato basi sarihan nga buhian hi Jesus?

▪ Ano an ginbuhat ni Pilato basi waray hiya magin baratunon?

▪ Ano an masisiring mahitungod han paglatigo?

▪ Paonan-o gintamay hi Jesus katapos latiguhon?

▪ Ano pa an ginbuhat ni Pilato basi sarihan nga buhian hi Jesus?