Kapitulo 24

Kon Kay Ano nga Kinanhi ha Tuna hi Jesus

HAN nakadto ha Capernaum hi Jesus ngan an iya upat nga disipulo, nagin okupado gud hira hito nga adlaw. Pagkagab-i, gindara ha iya han mga tawo an ngatanan nga may sakit basi matambal. Salit waray hira magkaada panahon para ha kalugaringon.

Kinabuwasan han aga, masirom pa nga binuhat hi Jesus ngan ginawas nga nag-uusahan la. Kinadto hiya ha mamingaw nga lugar basi mag-ampo ha iya Amay. Pero waray la pag-iha an iya pag-usahan kay ginbiling hiya ni Pedro ngan han iba han nasantop nira nga waray hiya.

Han hinkit-an nira hi Jesus, nagsiring hi Pedro: “Ginbibiniling ka han ngatanan nga tawo.” Karuyag han mga tawo ha Capernaum nga diri bumaya ha ira hi Jesus. Naapresyar gud nira an iya ginbuhat para ha ira! Pero an prayoridad ba ni Jesus ha pagkanhi ha tuna amo an pagpanambal pinaagi hin milagro? Ano an iya ginsiring mahitungod hini?

Sumala ha usa nga asoy ha Biblia, binaton hi Jesus ha iya mga disipulo: “Kadto kita ha iba nga lugar, ha kahigrani nga bungto basi magsangyaw liwat ako didto, kay tungod hini kinanhi ako.” Bisan kon ginhahawiran hiya han mga tawo, nagsiring hiya ha ira: “Kinahanglan ipasamwak ko liwat an maopay nga sumat han Ginhadian han Dios ha iba nga mga syudad, kay ginsugo ako tungod hini.”

Oo, an prayoridad ni Jesus ha pagkanhi ha tuna amo an pagsangyaw han Ginhadian han Dios, nga magbabaraan han ngaran han iya Amay ngan permanente nga magwawara han ngatanan nga kasakitan han katawohan. Pero basi pamatud-an nga ginsugo hiya han Dios, nanambal hiya pinaagi hin milagro. Hadto naghimo liwat hi Moises hin mga milagro basi pamatud-an nga surugoon hiya han Dios.

Han binaya hi Jesus ha Capernaum basi magsangyaw ha iba nga syudad, inupod an iya upat nga disipulo—an magbugto nga hira Pedro ngan Andres, ngan an magbugto nga hira Juan ngan Santiago. Mahinunumdoman mo nga ha naglabay pa la nga semana, gin-imbitar hira ni Jesus nga magin siyahan nga kaupod niya ha buruhaton.

Malampuson gud an pagsangyaw ni Jesus ha bug-os nga Galilea upod an iya upat nga disipulo! Ha pagkamatuod, an iya mga ginbuhat nahibantog bisan ha bug-os nga Sirya. Damu nga tawo tikang ha Galilea, Judea, ngan ha tabok han Salog Jordan an nagsinunod kan Jesus ngan ha iya mga disipulo. Marcos 1:35-39; Lucas 4:42, 43; Mateo 4:23-25; Eksodo 4:1-9, 30, 31.

▪ Ano an nahitabo kinabuwasan katapos han okupado nga adlaw ni Jesus ha Capernaum?

▪ Kay ano nga ginpakanhi hi Jesus ha tuna? Kay ano nga naghimo hiya hin mga milagro?

▪ Hin-o an kaupod ni Jesus ha pagsangyaw ha bug-os nga Galilea? Ano an resulta han iya mga ginbuhat?