Kapitulo 40

Leksyon ha Kalooy

POSIBLE nga aadto pa hi Jesus ha Nain, diin ginbanhaw pa la niya an anak han balo, o bangin aadto hiya ha kahirani nga syudad. Karuyag han Pariseo nga hi Simon nga mas makilala an naghihimo hito nga mga milagro. Salit gin-imbitar niya hi Jesus nga kumaon ha ira.

Ginhunahuna ni Jesus nga higayon ito nga makasangyaw ha mga bisita, salit ginkarawat niya an imbitasyon, pariho han gin-imbitar hiya nga kumaon upod han mga parasukot hin buhis ngan magpakasasala. Pero han pagsulod niya ha balay ni Simon, waray hiya abiabiha hin maopay sugad han kasagaran nga ginhihimo ha mga bisita.

Kon nagbabaktas ha matapotapo nga dalan, an mga tiil nga nakasandalyas napapasoan ngan nahuhugawan, salit kustomre an paghimsaw ha mga bisita basi ipakita an pagkamaabiabihon. Pero han pag-abot ni Jesus waray hiya himsawi. Waray liwat hiya haruki sugad nga pagkarawat ha iya, nga bahin han maopay nga pamatasan. Pati an kustomre nga pagpahid hin lana ha ulo waray himoa ha iya.

Han nangangaon an nangangalingkod nga mga bisita ha may lamesa, mamingaw nga sinulod an usa nga babaye nga diri imbitado. Hito nga syudad, kilala hiya nga imoral. Posible nga nakabati na hiya han katutdoan ni Jesus, pati han pag-aghat ha ‘ngatanan nga binubug-atan nga kumadto ha iya kay papapahuwayon hira.’ Tungod han iya nakita ngan nabatian, ginbiling gud niya hi Jesus.

Kinadto hiya ha may tiil ni Jesus ngan linuhod. Samtang naturo an iya luha ha mga tiil ni Jesus, iya ito gintatrapohan han iya buhok. Kumuha liwat hiya hin mahamot nga lana ha surudlan, ngan samtang mahigugmaon nga ginhaharokan an mga tiil ni Jesus, iya ito ginpapahiran han lana. Pero waray maruyag hi Simon ha iya nakita. Naghunahuna hiya: “Kon propeta ini nga tawo, maaram unta hiya kon hin-o ngan kon ano nga klase hin babaye ito nga nakapot ha iya, nga makasasala hiya.”

Maaram hi Jesus han ginhuhunahuna ni Simon, salit nagsiring hiya: “Simon, may ig-iistorya ako ha imo.”

Binaton hiya: “Magturutdo, ano ito?”

“Duha nga lalaki an may utang ha parapautang,” nagsiring hi Jesus. “An usa 500 nga denaryo an utang, pero an usa 50. Han waray hira pakakabayad ha iya, kinasingkasing nga iya ginpasaylo hira nga duha. Salit, hin-o ha ira an mas maghihigugma ha iya?”

“Para ha akon, an nakautang hin mas daku nga kinasingkasing nga ginpasaylo niya,” siring ni Simon, nga bangin diri interesado kay waray koneksyon an pakiana.

“Husto an imo baton,” siring ni Jesus. Katapos liningi hiya ha babaye ngan nagsiring kan Simon: “Nakikita mo ba ini nga babaye? Pagsulod ko ha imo balay, waray mo ako hatagi hin tubig nga ihirimsaw. Pero an akon mga tiil ginhulos hini nga babaye han iya mga luha ngan gintrapohan ito han iya buhok. Waray mo ako haruki, pero mahigugmaon nga ginhinarokan hini nga babaye an akon mga tiil tikang nga sinulod ako. Waray mo pahiri hin lana an akon ulo, pero ginpahiran hini nga babaye hin mahamot nga lana an akon mga tiil.”

An babaye nagpakita gud hin kinasingkasing nga pagbasol han iya pagin imoral hadto. Salit hi Jesus nagsiring: “Tungod hini, susumatan ko ikaw nga bisan kon damu an iya mga sala, ginpasaylo na ito kay nagpakita hiya hin daku nga gugma, kondi an ginpasaylo hin gutiay, nagpapakita hin gutiay nga gugma.”

Diri ginkukonsinter ni Jesus an imoralidad. Pero ito nga hitabo nagpapakita nga nasasabtan niya an mga tawo nga nagsayop kondi nagbabasol gud ngan nadaop ha iya basi maliaw. Basi abaton han babaye an totoo nga kapahuwayan, hi Jesus nagsiring: “Ginpasaylo na an imo mga sala. . . . An imo pagtoo an nagtalwas ha imo. Lakat nga mamurayawon.” Lucas 7:36-50; Mateo 11:28-30.

▪ Paonan-o gin-abiabi hi Jesus han nag-imbitar ha iya nga hi Simon?

▪ Hin-o an namiling kan Jesus, ngan kay ano?

▪ Ano nga ilustrasyon an iginsaysay ni Jesus, ngan ano an aplikasyon hito?