Kapitulo 95

Leksyon ha Pagdiborsyo Ngan Paghigugma ha mga Anak

HI Jesus ngan an mga disipulo nagbibiyahe ngadto ha Jerusalem basi tumambong ha Paskua han 33 C.E. Tinabok hira ha Salog Jordan ngan inagi ha distrito han Perea. Pipira pa la ka semana an naglabay, nakadto hi Jesus ha Perea pero ginpakadto hiya ha Judea kay nagkasakit an iya sangkay nga hi Lasaro. Han nakadto hiya ha Perea, ginhisgotan niya ngan han mga Pariseo an mahitungod han diborsyo, ngan yana iginpakiana na liwat nira ito ha iya.

Iba-iba an opinyon han mga Pariseo mahitungod han diborsyo. Nagsiring hi Moises nga mahimo idiborsyo an usa nga babaye tungod han ‘nakita nga malaw-ay ha iya.’ (An Baraan nga Biblia) Naghuhunahuna an iba nga may kalabotan la ito ha pagkadiri-putli. Pero may nasiring liwat nga an “malaw-ay” nag-uupod hin diri seryoso nga mga sayop. Salit, basi sarihan hi Jesus, nagpakiana an mga Pariseo: “Igintutugot ba han balaud nga idiborsyo han usa nga lalaki an iya asawa tungod han bisan ano nga hinungdan?” Kombinsido hira nga anoman an sidngon ni Jesus magkakaproblema hiya ha mga Pariseo nga iba an opinyon.

Maopay gud an pagbaton ni Jesus hito nga pakiana. Waray hiya magbasar ha opinyon han bisan hin-o, lugod gin-unabi niya an orihinal nga kahikayan han pag-asawa. “Waray ba niyo mabasa,” nagpakiana hiya, “nga hiya nga naghimo ha ira ha tinikangan ginhimo hira nga lalaki ngan babaye ngan nagsiring: ‘Tungod hini, babayaan han lalaki an iya tatay ngan an iya nanay ngan magpapadayon nga kaupod han iya asawa, ngan hira nga duha magigin usa nga unod’? Salit diri na hira duha kondi usa na la nga unod. Kon sugad, an gintampo han Dios diri pagbulagon han tawo.”

Iginpapakita niya nga orihinal nga katuyoan han Dios nga an mag-asawa padayon nga mag-upod ngan diri magdiborsyo. Salit, nagsiring an mga Pariseo, “kay ano man nga nagsugo hi Moises nga an bana sadang maghatag hin kasuratan ha pagdiborsyo basi bulagan an iya asawa?”

Binaton hi Jesus: “Tungod ha katig-a han iyo kasingkasing gintugotan kamo ni Moises nga idiborsyo an iyo asawa, kondi diri sugad hito ha tinikangan.” Oo, han gintikangan han Dios ha hardin han Eden an totoo nga kahikayan ha pag-asawa, diri kaupod hito an pagdiborsyo.

Ginsidngan ni Jesus an mga Pariseo: “Susumatan ko kamo nga an bisan hin-o nga makigdiborsyo ha iya asawa ngan mag-asawa hin iba nag-aadulteryo, labot la kon an iya asawa nagbuhat hin imoralidad [ha Griego, por·neiʹa].” Iginpatin-aw niya nga an por·neiʹa, nga nagpapasabot hin seryoso nga seksuwal nga imoralidad, amo la an igintutugot han Dios nga rason ha pagdiborsyo.

Nasantop han mga disipulo nga an pag-asawa sadang magpadayon gawas la hito nga rason, salit nagsiring hira: “Kon sugad hito an pag-asawa, mas maopay nga diri na la mag-asawa.” Sigurado nga seryoso nga huhunahunaon han usa nga nagpaplano ha pag-asawa an pagkapermanente han bugkos han pag-asawa!

Katapos, ginhisgotan ni Jesus an pagin solo. Nagsiring hiya nga may mga lalaki nga yunuko tikang pa han katawo, kay waray hira kapas mag-asawa tungod han diperensya ha sekso. May mga yunuko liwat nga ginhimo nga yunuko han mga tawo, kay waray kalooy nga ginkapon hira. Pero an iba nagpupugong han hingyap nga mag-asawa ngan magkaada seksuwal nga relasyon basi mas daku an ira panahon para ha Ginhadian ha langit. “Kon mahihimo han usa nga magin [solo], maopay ito,” siring ni Jesus.

Yana gindara han mga tawo kan Jesus an kabataan. Kondi gin-isgan han mga disipulo an kabataan ngan ginpaiwas hira, kay bangin karuyag nira nga diri madisturbo hi Jesus. Pero nagsiring hiya: “Pabay-i an kabataan nga kumadi ha akon; ayaw hira pagdid-i, kay an Ginhadian han Dios para ha mga sugad ha ira. Ha pagkamatuod susumatan ko kamo: Bisan hin-o nga diri kumarawat han Ginhadian han Dios sugad han pagkarawat han usa nga bata, diri gud makakasulod hito.”

Maopay gud nga mga leksyon an igintutdo ni Jesus! Basi makasulod ha Ginhadian han Dios, kinahanglan subaron naton an pagin mapainubsanon ngan pagin masayon matutdoan han kabataan. Pero iginpakita liwat han susbaranan ni Jesus nga importante gud, labi na ha mga kag-anak, nga maghatag hin panahon ha mga anak. Katapos, ginkugos ngan ginbendisyonan niya an kabataan basi ipakita an iya gugma ha ira. Mateo 19:1-15; Deuteronomio 24:1; Lucas 16:18; Marcos 10:1-16; Lucas 18:15-17.

▪ Ano an iba-iba nga opinyon han mga Pariseo mahitungod han diborsyo? Paonan-o nira ginsarihan hi Jesus?

▪ Ano an ginbuhat ni Jesus han ginsarihan hiya han mga Pariseo? Ano la nga rason ha pagdiborsyo an iya iginhatag?

▪ Kay ano nga nagsiring an mga disipulo nga maopay nga diri na la mag-asawa? Ano an iginsagdon ni Jesus?

▪ Ano an mahibabaroan naton ha pagtratar ni Jesus ha kabataan?