Kapitulo 64

Leksyon ha Pagpasaylo

HI Jesus posible nga aadto pa ha balay ha Capernaum kaupod an mga disipulo. Iginsasaysay niya ha ira kon paonan-o susulbaron an diri pagsinabtanay han kabugtoan, salit hi Pedro nagpakiana: “Ginoo, makapira ko papasayloon an akon bugto nga nakasala ha akon?” Tungod kay an Judio nga mga magturutdo ha relihiyon nasiring nga magpasaylo hin tulo ka beses, bangin nahunahuna ni Pedro nga mas makonsiderasyon an pagsuhestyon hin “pito ka beses.”

Pero sayop nga ihapon an nabubuhat nga sala. Salit gintadong ni Jesus hi Pedro: “Susumatan ko ikaw, diri la tubtob ha pito ka beses, kondi tubtob ha 77 ka beses.” Iginpapakita niya nga kinahanglan waray tubtoban an pagpasaylo ni Pedro ha iya bugto.

Basi pabug-atan nga kinahanglan magin mapinasayloon an mga disipulo, naghatag hi Jesus hin ilustrasyon. Mahitungod ito han hadi nga karuyag makigtuhay ha mga uripon nga may utang ha iya. Gindara ha iya an uripon nga may utang nga 60,000,000 ka denaryo. Imposible gud mabaydan iton daku nga utang. Sugad han iginsaysay ni Jesus, nagsugo an hadi nga ibaligya hiya, an iya asawa, ngan mga anak basi makabayad.

Linuhod an uripon ha tiil han hadi, ngan nakimalooy: “Angan-angana ako, Agaron ko, babayaran ko ikaw han ngatanan ko nga utang.”

Tungod ha kalooy, waray pabaydi han hadi an daku nga utang han uripon. Kondi paggawas hito nga uripon, nakita niya an iya igkasi-uripon nga nakautang ha iya hin 100 ka denaryo la. Iya dayon hiya ginrabot ngan gintilo, ngan nagsiring: “Bayari ako han imo utang.”

Pero waray ibarayad an igkasi-uripon. Salit linuhod hiya ha tiil han iya gin-utangan ngan nakimalooy: “Angan-angana ako, bugto ko, babayaran ko gad ikaw.” Diri pariho han hadi, an uripon diri maloloy-on, ngan iginpapriso an igkasi-uripon.

Han nakita han iba nga uripon an nahitabo, kinadto hira ha hadi. Nasisina nga iginpatawag niya an uripon. “Maraot nga uripon,” siring niya, “waray ko ikaw pabayara han imo utang han nakimalooy ka ha akon. Diri ba sadang ka liwat malooy ha imo igkasi-uripon, sugad la nga ginkaloy-an ko ikaw?” Tungod ha kangalas, iginpapriso niya an waray kalooy nga uripon tubtob nga mabaydan an ngatanan nga iya utang.

Katapos hi Jesus nagsiring: “Sugad liwat hito an bubuhaton ha iyo han akon Amay ha langit kon diri niyo kinasingkasing nga pasayloon an iyo bugto.”

Maopay gud ito nga leksyon ha pagpasaylo! Kon itanding ha aton daku nga utang o sala nga ginpasaylo han Dios, gutiay gud la an anoman nga pakasala ha aton han igkasi-Kristiano. Dugang pa, yinukot ka beses nga ginpasaylo kita ni Jehova nga Dios. Agsob nga diri ngani kita maaram nga nakakasala kita ha iya. Salit diri ba naton mapapasaylo hin pipira ka beses an aton bugto, bisan kon may husto kita nga hinungdan ha pagreklamo? Hinumdumi, sugad han igintutdo ni Jesus ha Sermon ha Bukid, papasayloon kita han Dios han aton mga sala, kon ginpapasaylo naton an nakasala ha aton. Mateo 18:21-35; 6:12; Colosas 3:13.

▪ Kay ano nga nakagpakiana hi Pedro mahitungod han pagpasaylo ha usa nga bugto? Kay ano nga bangin nahunahuna niya nga mas makonsiderasyon an iya suhestyon nga magpasaylo hin pito ka beses?

▪ Ano an kaibahan han reaksyon han hadi ha pakimalooy han iya uripon ngan han reaksyon han uripon ha pakimalooy han iya igkasi-uripon?

▪ Ano an aton mahibabaroan ha ilustrasyon ni Jesus?