Kapitulo 62

Leksyon ha Pagpaubos

KATAPOS tambalon an bata nga ginsaniban hin demonyo ha lugar hirani ha Cesarea Filipos, karuyag ni Jesus umuli ha Capernaum. Pero karuyag niya nga an mga disipulo la an iya kaupod ha pagbiyahe basi maiandam pa hira ha iya kamatayon ngan ha ira magigin mga responsabilidad. “An Anak han tawo itutubyan ha iya mga kaaway,” nagsiring hiya, “ngan ira papatayon hiya, pero bisan kon mamatay hiya, babanhawon hiya paglabay hin tulo ka adlaw.”

Bisan kon gin-unabi na ito ni Jesus, ngan nakita mismo han tulo nga apostol an pagbag-o han iya hitsura diin ginhisgotan an iya “pagbaya,” waray la gihapon ito masabti han iya mga sumurunod. Bisan kon waray hira rumiwa nga papatayon hiya, sugad han ginbuhat ni Pedro, nahahadlok hira nga magpakiana pa mahitungod hito.

Nakaabot na hira ha Capernaum, nga gin-uulian ni Jesus durante han iya ministeryo. Taga-didto liwat hi Pedro ngan an iba nga apostol. Didto, gindaop hi Pedro han mga parasukot hin buhis para ha templo. Posible nga karuyag nira nga maakusaran liwat hi Jesus nga diri nasunod ha kustomre, salit nagpakiana hira: “Nagbabayad ba hin duha ka drakma nga buhis [para ha templo] an iyo magturutdo?”

Hi Pedro binaton: “Oo.”

Hi Jesus, nga posible inabot pa la ha balay, maaram han nahitabo. Salit antes pa makagsumat hi Pedro mahitungod hito, nagpakiana hi Jesus: “Ha imo paghunahuna Simon, tikang kan kanay nakarawat hin magkalain-lain nga buhis an mga hadi ha tuna? Tikang ha ira mga anak o ha mga estranghero?”

“Tikang ha mga estranghero,” binaton hi Pedro.

“Kon sugad, an mga anak libre gud ha buhis,” siring ni Jesus. Tungod kay an Amay ni Jesus amo an Hadi ha uniberso, an Dios nga ginsisingba ha templo, diri obligado an Iya Anak nga magbayad hin buhis para ha templo. “Pero basi diri hira masina,” siring ni Jesus, “kadto ha dagat ngan pangawil. Ha baba han siyahan nga isda nga imo makakawil makakaagi ka hin usa nga sinselyo [upat ka drakma an kantidad]. Kuhaa ito ngan ihatag ha ira sugad nga buhis naton nga duha.”

Han nagkaurupod an mga disipulo katapos han ira pag-uli ha Capernaum, posible nga ha balay ni Pedro, nagpakiana hira: “Hin-o gud an may gidadakui nga awtoridad ha Ginhadian han langit?” Maaram hi Jesus kon kay ano nga nagpakiana hira, kay maaram hiya han nahitabo han nasunod hira ha iya han nagbabaktas hira tipabalik tikang ha Cesarea Filipos. Salit nagpakiana hiya: “Ano an iyo gindidiskusyonan ha dalan?” Naawod an mga disipulo, salit waray hira bumaton kay gindiskusyonan nira kon hin-o ha ira an gilalabawi.

Tungod kay haros tulo ka tuig na nga nanunutdo hi Jesus, diri ba baga hin diri katoohan nga gindidiskusyonan ito han mga disipulo? Iginpapakita la hito an makusog nga impluwensya han pagin diri perpekto han tawo ngan han relihiyon nga ira gintikangan. Ha relihiyon han mga Judio nga gindak-an han mga apostol, ginpapabug-atan pirme an posisyon o katungdanan. Dugang pa, posible nga inabat ni Pedro nga labaw hiya kay nagsaad hi Jesus nga makarawat hiya han “mga yawi” ha Ginhadian. Bangin ito liwat an inabat nira Santiago ngan Juan kay nakapribilehiyo hira nga makita an pagbag-o han hitsura ni Jesus.

Anoman an hinungdan, gintadong ni Jesus an ira disposisyon pinaagi hin makapabantad nga ilustrasyon. Nagtawag hiya hin bata, ginpatindog ito, gin-agbayan, ngan nagsiring: “Diri kamo makakasulod ha Ginhadian han langit kon diri kamo magbag-o ngan magin pariho han kabataan. Salit an bisan hin-o nga magpaubos pariho hini nga bata amo an may gidadakui nga awtoridad ha Ginhadian han langit. Ngan an bisan hin-o nga nakarawat ha usa nga bata nga pariho hini tungod ha akon ngaran, nakarawat liwat ha akon.”

Maopay gud ito nga paagi ha pagtadong ha mga disipulo! Waray hiya masina ha ira ngan waray hira tawaga nga mapahitas-on, hakog, o ambisyoso. Pero naggamit hiya hin ilustrasyon basi tadungon hira pinaagi han susbaranan han kabataan, nga kasagaran na nga mapainubsanon, diri ambisyoso, ngan diri naghuhunahuna kon hin-o an labaw ha ira. Salit iginpakita ni Jesus nga kinahanglan kultibaron han iya mga disipulo ini nga mga kalidad nga normal ha mapainubsanon nga kabataan. Sugad nga konklusyon, nagsiring hiya: “An nagawi sugad nga ubos ha iyo ngatanan amo an may daku nga awtoridad.” Mateo 17:22-27; 18:1-5; Marcos 9:30-37; Lucas 9:43-48.

▪ Pag-uli ha Capernaum, ano an igintutdo utro ni Jesus, ngan ano an reaksyon mahitungod hito?

▪ Kay ano nga diri obligado hi Jesus nga magbayad hin buhis para ha templo, pero kay ano nga nagbayad hiya?

▪ Ano an posible nga hinungdan han pagdiskusyon han mga disipulo? Paonan-o hira gintadong ni Jesus?