Kapitulo 73

Mabinuligon nga Samaritano

HI Jesus posible nga nakadto hirani ha Betania, usa nga baryo nga mga tulo ka kilometro tikang ha Jerusalem. May dinaop ha iya nga lalaki nga eksperto ha Balaud ni Moises ngan nagpakiana: “Magturutdo, ano an kinahanglan ko buhaton basi mapanunod an kinabuhi nga waray kataposan?”

Inabat ni Jesus nga ito nga lalaki, nga usa nga abogado, diri la kay nangangaro hin impormasyon kondi karuyag liwat nga sarihan hiya. Bangin intensyon han abogado nga masina an mga Judio ha ibabaton ni Jesus. Salit basi hibaroan an opinyon han abogado, nagpakiana hi Jesus: “Ano an nahisurat ha Balaud? Ano an imo pagsabot ha imo nabasa?”

Makikita ha baton han abogado an hilarom nga pagsabot han ginkotar niya an mga balaud han Dios ha Deuteronomio 6:5 ngan Lebitiko 19:18. Nagsiring hiya: “‘Higugmaa hi Jehova nga imo Dios ha bug-os mo nga kasingkasing, ha bug-os mo nga kalag, ha bug-os mo nga kusog, ngan ha bug-os mo nga hunahuna,’ ngan ‘higugmaa an imo igkasi-tawo sugad ha imo kalugaringon.’”

“Husto an imo baton,” siring ni Jesus. “Padayon nga buhata ini ngan magkakaada ka kinabuhi.”

Pero waray makontento hito an abogado, kay para ha iya diri ito espisipiko nga baton. Karuyag niya mabatian mismo kan Jesus nga husto an iya mga opinyon ngan matadong an iya pagtratar ha iba. Salit nagpakiana hiya: “Hin-o gud ba an akon igkasi-tawo?”

Para ha mga Judio, an pulong nga “igkasi-tawo” mga igkasi-Judio la nira, uyon ha konteksto han Lebitiko 19:18. Bisan hi apostol Pedro nagsiring: “Maaram gud kamo nga an Judio diri puydi makig-upod o kumadto ha tawo nga iba an lahi.” Salit an abogado ngan bangin pati an mga disipulo naghuhunahuna nga matadong hira kon tatrataron nira hin maopay an mga igkasi-Judio la, kay para ha ira diri nira igkasi-tawo an mga diri-Judio.

Paonan-o tatadungon ni Jesus an ira panhunahuna nga diri hira masisina? May igin-istorya hiya nga posible iginbasar ha aktuwal nga panhitabo: “Usa nga [Judio] tikang ha Jerusalem an tikadto ha Jerico. Ginburubligan hiya hin mga tulisan ngan ginhuboan, ginkastigo, ngan ginbayaan nga haros patay na.”

“Nahituman nga may saserdote nga inagi hito nga dalan,” nagpadayon hi Jesus, “pero han hinkit-an niya an lalaki, didto hiya agi ha luyo nga ligid han dalan. Inagi liwat didto an usa nga Lebihanon, ngan han nakita niya an lalaki, inagi hiya ha luyo nga ligid han dalan. Pero usa nga Samaritano an inagi hito nga dalan. Han nakita niya an lalaki, nalooy hiya.”

Damu nga saserdote ngan mga Lebihanon nga kabulig nira an naukoy ha Jerico, nga 23 ka kilometro an kahirayo tikang ha templo ha Jerusalem diin hira nag-aalagad. Delikado an ira inaagian nga mga 900 metros tipalugsad. Ginlalaoman nga bubuligan han saserdote ngan han Lebihanon an igkasi-Judio nga nagsasakit. Pero waray nira ito buhata, lugod usa nga Samaritano an bumulig. Nasisina gud an mga Judio ha mga Samaritano, salit diri pa la maiha, gin-insulto nira hi Jesus han ira gintawag hiya nga “Samaritano.”

Ano an ginbuhat han Samaritano basi buligan an Judio? “Dinaop hiya,” siring ni Jesus, “ngan ginbendahan an mga samad han lalaki ngan ginbuboan ito hin lana ngan bino. Katapos, iya iginsakay an lalaki ha iya hayop ngan gindara ha balay nga pahuwayan ngan ginmangnoan. Kinabuwasan, kinuha hiya hin duha nga denaryo [mga duha ka adlaw nga sweldo], iginhatag ito ha parabantay han balay nga pahuwayan, ngan nagsiring, ‘Mangnoi hiya, ngan anoman an imo magasto labot hini, babayaran ko ikaw pagbalik ko.’”

Katapos, ginpakianhan ni Jesus an abogado: “Ha imo hunahuna, hin-o hini nga tulo an igkasi-tawo han lalaki nga gintulis?”

Diri karuyag han abogado nga dayawon an Samaritano, salit nagsiring na la hiya: “An usa nga nagpakita hin kalooy ha iya.”

Ginsidngan hiya ni Jesus: “Lakat, ngan buhata liwat ito.”

Kon direkta nga ginsumatan ni Jesus an abogado nga igkasi-tawo liwat niya an mga diri-Judio, posible nga diri niya kakarawaton ini ngan bangin dinapig ha iya an kadam-an han namamati ha paghisgot nira ni Jesus. Pero iton totoo ha kinabuhi nga istorya matin-aw nga nagpapakita nga an aton mga igkasi-tawo diri la an aton mga kalahi ngan kapariho hin nasud. Maopay gud ini nga paagi han pagtutdo ni Jesus! Lucas 10:25-37; Buhat 10:28; Juan 4:9; 8:48.

▪ Ano an iginpakiana han abogado kan Jesus, ngan ano an bangin intensyon niya ha pagpakiana?

▪ Ha panhunahuna han mga Judio, hin-o an ira mga igkasi-tawo, ngan kay ano nga ito liwat an panhunahuna han mga disipulo?

▪ Paonan-o iginpatin-aw ni Jesus an husto nga panhunahuna nga waray makariwa an abogado?