Kapitulo 102

Madaugon nga Pagsulod han Kristo ha Jerusalem

KINABUWASAN, han Domingo nga aga han Nisan 9, binaya hi Jesus ha Betania upod an mga disipulo ngan inagi hira ha Bukid han mga Olibo han tikadto hira ha Jerusalem. Waray pag-iha, hirani na hira ha Betfage nga nahimumutang ha Bukid han mga Olibo.

Ginsugo ni Jesus an duha han iya mga disipulo: “Kadto kamo hito nga baryo nga iyo nakikita ha unhan, ngan makakakita dayon kamo hin nakahigot nga asno upod an nati hito. Badbari niyo ito ngan dad-a ha akon. Ngan kon may magpakiana, sidnga niyo nga ‘Kinahanglanon ini han Ginoo.’ Tungod hito, matugot dayon hiya nga dad-on niyo ito.”

Bisan kon waray anay masantop han mga disipulo nga ito nga sugo katumanan han tagna ha Biblia, ha urhi nasantop nira ito. Nagtagna hi propeta Sakarias nga an Hadi nga iginsaad han Dios masakay ha asno pakadto ha Jerusalem, oo, “ha usa nga pulyino, an nati han usa nga asno.” Hi Hadi Solomon hadto sinakay liwat ha nati han asno han gindihogan hiya.

Han sinulod an mga disipulo ha Betfage ngan ginkuha an nati ngan an iroy hito, an mga tawo nga naninindog didto nagsiring: “Kay ano nga ginbubuhat niyo ini?” Pero han nagsiring hira nga para ito ha Ginoo, tumugot an mga tawo nga dad-on ito kan Jesus. Iginsapin han mga disipulo an ira pantungbaw nga mga panapton ha iroy nga asno ngan ha nati hito, pero ha nati sinakay hi Jesus.

Samtang tipakadto hiya ha Jerusalem sakay han asno, nagtikadamu an tawo. Iginlatag han kadam-an an ira pantungbaw nga mga panapton ha dalan, samtang an iba nangutod hin mga sanga han kahoy ngan iginlatag ito ha dalan. “Bendisyonan unta Hiya nga napakanhi sugad nga Hadi ha ngaran ni Jehova!” ginuliat hira. “Kamurayawan ha langit, ngan paghimayaon an Dios ha kahitas-an!”

An iba nga Pariseo nga nakadto nasina hito nga ginsiring ngan nagreklamo kan Jesus: “Magturutdo, sidnga an imo mga disipulo nga diri mag-inaringasa.” Pero binaton hiya: “Susumatan ko kamo: Kon maghilom hira, mga bato an masinggit.”

Han hirani na hi Jesus ha Jerusalem, ginkita niya an syudad ngan nagtangis hiya, ngan nagsiring: “Ginhingyap ko gud nga unta nasabtan mo ini nga mga butang nga maghahatag ha imo hin kamurayawan, pero yana diri ka makakakita hito.” Tungod kay tinuyo nga waray sumugot an Jerusalem, sigurado nga mag-aantos ito han resulta, sugad han igintagna ni Jesus:

“An imo mga kaaway [an mga Romano ha panguna ni Heneral Tito] magbubutang ha imo palibot hin magtais nga alad, papalibotan ngan aatakehon ka tikang ha ngatanan nga direksyon, bubungkagon ka nira ngan an imo mga anak, ngan waray usa nga bato nga papabay-an nira ha bawbaw han usa nga bato.” An kabungkagan han Jerusalem nga igintagna ni Jesus nahitabo gud paglabay hin 37 ka tuig, han 70 C.E.

Pipira ka semana pa la an naglabay, damu hito nga mga tawo an nakakita han ginbanhaw ni Jesus hi Lasaro. Yana nagpipinanumat hira ha iba mahitungod hito nga milagro. Salit han pagsulod ni Jesus ha Jerusalem nagkarigumok an bug-os nga syudad. “Hin-o ini?” karuyag nira hibaroan. Ngan an mga tawo nagpinanumat: “Hiya an propeta nga hi Jesus, nga taga-Nazaret ha Galilea!” Han nakita han mga Pariseo an nahitatabo, nasubo gud hira nga waray hira nahihimo, kay siring nira: “Nasunod na ha iya an bug-os nga kalibotan.”

Sugad han nahiaraan ni Jesus kon nabisita ha Jerusalem, kinadto hiya ha templo basi magtutdo. Didto dinaop ha iya an mga buta ngan mga piay, ngan gintambal niya hira! Han nakita han punoan nga mga saserdote ngan mga eskriba an mga milagro nga ginbubuhat ni Jesus ngan han nabatian nira an kabataan nga kalalakin-an ha templo nga nasinggit, “Nag-aampo kami, talwasa an Anak ni David!” nasina hira. “Nababatian mo ba an ira ginsisiring?” nagreklamo hira.

Hi Jesus binaton: “Oo. Waray ba niyo mabasa ini: ‘An baba han kabataan ngan mga minasus-an pagigiuson mo nga magdayaw ha imo’?”

Nagpadayon hiya ha pagtutdo ha templo, ngan ginkita niya an ngatanan ha palibot. Tungod kay tikagab-i na, binaya hiya upod an 12 nga apostol ngan binalik hira ha Betania nga mga 3 ka kilometro an kahirayo. Didto hiya nagpalabay han Domingo nga gab-i, posible nga ha balay han iya sangkay nga hi Lasaro. Mateo 21:1-11, 14-17; Marcos 11:1-11; Lucas 19:29-44; Juan 12:12-19; Sakarias 9:9.

▪ Kakan-o ngan paonan-o sinulod hi Jesus ha Jerusalem sugad nga Hadi?

▪ Kay ano nga importante gud nga dayawon hi Jesus han damu nga tawo?

▪ Ano an inabat ni Jesus han ginkikita niya an Jerusalem, ngan ano an iya igintagna?

▪ Ano an nahitabo han kinadto hi Jesus ha templo?