Kapitulo 78

Mag-andam Pirme!

KATAPOS pahamangnoan an mga tawo mahitungod han kahakog, ngan sagdonan an mga disipulo mahitungod han sobra nga kabaraka ha materyal, ginparig-on hira ni Jesus: “Ayaw kahadlok, gutiay nga panon, kay an Ginhadian iginhatag ha iyo han iyo Amay.” Nagsumat hiya nga diri damu (iginpahibaro ha urhi nga 144,000) an hingangadto ha Ginhadian ha langit. An kadam-an han magkakaada hin kinabuhi nga waray kataposan magigin tunan-on nga sakop han Ginhadian.

Maopay gud nga regalo “an Ginhadian”! Iginsaysay ni Jesus ha mga disipulo an angay nira buhaton kon makarawat ito, nag-aghat hiya: “Ibaligya an iyo mga panag-iya ngan paghatag hin mga hatag tungod ha kalooy.” Oo, sadang nira gamiton an ira panag-iya basi buligan an iba nga mag-alagad ha Dios ngan magkaada “diri nauubos nga bahandi ha langit.”

Katapos, ginsagdonan ni Jesus an mga disipulo nga mag-andam pirme ha iya pagbalik. Nagsiring hiya: “Pag-epron ngan pag-andam kamo, palagaha an iyo mga lampara, ngan magin pariho kamo ha kalalakin-an nga naghuhulat ha pag-abot han ira agaron tikang ha kasal, basi ha iya pag-abot ngan pagtuktok, ira abrihan dayon hiya. Malipayon an mga uripon nga nagbabantay ha pag-abot han agaron! Ha pagkamatuod, susumatan ko kamo: Mag-iepron hiya basi magserbi, palilingkuron hira ha may lamesa, ngan madaop hiya ngan magsiserbi ha ira.”

Hini nga ilustrasyon, an pagin andam han mga surugoon ha pagbalik han agaron makikita ha pagpilo tipaigbaw han ira hilaba nga bado ngan pagsuksok hito ha paha, ngan padayon nga pagtuman han ira mga toka ha bug-os nga gab-i gamit an mga lampara nga puno hin lana. Nagsaysay hi Jesus: ‘Malipayon hira kon pag-abot han agaron ha ikaduha nga bahin han pagbantay [tikang ha alas-9 ha gab-i tubtob ha katutnga], o bisan ha ikatulo [tikang ha katutnga tubtob ha alas-3 ha aga], nagbabantay hira!’

Diri ordinaryo an balos han agaron ha iya mga surugoon. Ginpalingkod niya hira ha may lamesa ngan ginserbihan. Gintratar hira sugad nga maunungon nga kasangkayan, diri sugad nga mga uripon. Maopay gud ito nga balos han ira padayon nga pagtrabaho para ha ira agaron ha bug-os nga gab-i samtang naghuhulat han iya pagbalik! Sugad nga konklusyon, hi Jesus nagsiring: “Pag-andam liwat kamo, kay an Anak han tawo maabot ha oras nga diri niyo ginlalaoman.”

Katapos hi Pedro nagpakiana: “Ginoo, iginsusumat mo ba ini nga ilustrasyon ha amon o ha iba liwat?”

Imbes nga bumaton hin direkta, naghatag hi Jesus hin lain nga ilustrasyon. “Hin-o gud an matinumanon nga tinaporan,” nagpakiana hiya, “nga ha iya itatapod han Agaron an Iya grupo han mga surugoon basi padayon nga maghatag ha ira hin igo nga pagkaon ha husto nga panahon? Malipayon ito nga uripon kon ha pag-abot han iya Agaron ito an iya ginbubuhat! Ha pagkamatuod susumatan ko kamo: Iya itatapod hito nga uripon an ngatanan nga iya panag-iya.”

Matin-aw nga hi Jesu-Kristo an “agaron.” An “tinaporan” nagrirepresentar han “gutiay nga panon” han mga disipulo sugad nga kabug-osan nga grupo, ngan an “grupo han mga surugoon” nagtutudlok ha amo gihapon nga grupo han 144,000 nga magigin bahin han Ginhadian ha langit, pero ginpapabug-atan hini an ira buruhaton sugad nga mga indibiduwal. An “panag-iya” nga igintapod ha matinumanon nga tinaporan amo an importante nga mga butang han agaron dinhi ha tuna, upod na an tunan-on nga mga sakop han Ginhadian.

Ha ilustrasyon, ginpabug-atan ni Jesus nga posible nga diri ngatanan nga membro han tinaporan o uripon nga klase magigin maunungon. Nagsaysay hiya: “Kon ito nga uripon magsiring ha kalugaringon, ‘Nalalangan an akon agaron,’ ngan iya pangastiguhon an mga surugoon nga lalaki ngan babaye, ngan magkinaon, mag-ininom, ngan maghubog, an Agaron hito nga uripon maabot ha adlaw nga diri niya ginlalaoman . . . , ngan duro nga sirot an ipapadapat ha iya.”

Hi Jesus nagsiring nga an iya pagkanhi nagresulta hin daku nga pagsari ha mga Judio, kay ginkarawat han iba an iya mga igintutdo pero an iba waray kumarawat. Sobra tulo ka tuig na an naglabay han ginbawtismohan hiya ha tubig, ngan yana an iya bawtismo ha kamatayon hirani na gud. Nagsiring hiya: “Nagsasakit gud ako tubtob nga matapos ito!”

Katapos ito igsiring ha mga disipulo, ginkaistorya utro niya an mga tawo. Nasubo gud hiya kay waray nira karawata an matin-aw nga ebidensya kon hin-o hiya ngan an kahulogan hito. Nagsiring hiya: “Kon nakakakita kamo hin dampog ha weste, nasiring dayon kamo, ‘May bagyo nga tiabot,’ ngan nahitatabo ito. Ngan kon nahangin tikang ha sur, nasiring dayon kamo, ‘Magigin mapaso gud,’ ngan nahitatabo ito. Mga hipokrito, maaram kamo mag-usisa han kahimtang han tuna ngan han langit, kondi kay ano nga diri kamo maaram mag-usisa hini nga panahon?” Lucas 12:32-59.

▪ Pira kadamu an “gutiay nga panon,” ngan ano an ira nakarawat?

▪ Paonan-o ginpabug-atan ni Jesus nga kinahanglan magin andam an iya mga surugoon?

▪ Ha ilustrasyon ni Jesus, hin-o an “agaron,” an “tinaporan,” an “grupo han mga surugoon,” ngan an “panag-iya”?