Kapitulo 29

Mag-opay nga Ginbuhat ha Sabbath

KATSARINGSING na han 31 C.E. Pipira ka bulan na an naglabay tikang nga nakiistorya hi Jesus ha babaye ha may atabay ha Samaria han tikadto hira ha Galilea tikang ha Judea.

Katapos manutdo ha bug-os nga Galilea, binalik hi Jesus ha Judea ngan nagsangyaw ha mga sinagoga. Kon itanding ha mga asoy han Biblia mahitungod han ministeryo ni Jesus ha Galilea, gutiay la an mababasa mahitungod han iya ginbuhat ha Judea durante hito nga pagbisita ngan han mga bulan nga nakadto hiya katapos han naglabay nga Paskua. Matin-aw nga diri damu an kinarawat han iya ministeryo ha Judea, diri sugad ha Galilea.

Katapos kinadto hi Jesus ha Jerusalem, an kapital nga syudad han Judea, para ha Paskua han 31 C.E. Hirani ha ganghaan para han mga karnero, may karigoan nga gintatawag nga Betsata, diin damu nga may sakit, buta, ngan piay an napakadto. Natoo hira nga matatambal an mga may sakit nga nalugsong ha tubig kon nagkikiwa ito.

Sabbath adto, ngan nakita ni Jesus ha karigoan an tawo nga 38 ka tuig na nga may sakit. Maaram hi Jesus nga maiha na an iya sakit, salit nagpakiana hiya: “Karuyag mo ba nga mag-opay ka?”

Binaton an may sakit: “Mano, waray nabulig ha akon nga makalugsong ha tubig kon nagkikiwa ito; samtang tilugsong ako may nahiuuna ha akon.”

Ginsidngan hiya ni Jesus: “Buhát, dad-a an imo tiheras ngan lakat.” Nag-opay dayon hiya, gindara an iya tiheras ngan linakat!

Pero han nakita hiya han mga Judio, nagsiring hira: “Sabbath yana, salit supak ha balaud nga dad-on mo an tiheras.”

Binaton hiya: “An nagtambal mismo ha akon an nagsiring, ‘Dad-a an imo tiheras ngan lakat.’”

Nagpakiana hira: “Hin-o an nagsiring ha imo, ‘Dad-a ito ngan lakat’?” Binaya hi Jesus tungod han damu nga tawo didto, salit an nag-opay nga tawo diri maaram kon hin-o an nagtambal ha iya. Kondi nahibaroan niya kon hin-o ito han nagkita utro hira ni Jesus ha templo.

Salit ginbiling niya an mga Judio basi sumatan hira nga hi Jesus an nagtambal ha iya. Han hinbaroan ito han mga Judio, kinadto hira kan Jesus. Kay ano? Basi ba hibaroan kon kay ano nga nahihimo niya ito nga mga milagro? Diri. Kondi basi mamiling hin maiaakusar ha iya kay ginbubuhat niya inin mag-opay nga butang ha Sabbath. Ira pa ngani gintimaraot hi Jesus! Lucas 4:44; Juan 5:1-16.

▪ Mationan-o na kaiha tikang han urhi nga pagbisita ni Jesus ha Judea?

▪ Kay ano nga popular an karigoan nga gintatawag nga Betsata?

▪ Ano nga milagro an ginhimo ni Jesus ha karigoan, ngan ano an nagin reaksyon han mga Judio?