Kapitulo 13

Mahibaro ha mga Pagsulay kan Jesus

KATAPOS gud han bawtismo ni Jesus, gin-giyahan hiya han espiritu han Dios ngadto ha kamingawan han Judea. Damu an iya angay hunahunaon basi masabtan an langitnon nga mga butang, kay ha iya bawtismo “naabrihan an langit.” Oo, damu gud an iya kinahanglan pamalandungon!

Hi Jesus nakadto ha kamingawan hin 40 ka adlaw ngan 40 ka gab-i, ngan waray hiya ginkaon. Katapos, han ginugutom na gud hiya, ginsulay hiya han Yawa nga nagsiring: “Kon anak ka han Dios, himoa nga tinapay ini nga mga bato.” Pero maaram hi Jesus nga sayop an paggamit han iya gahum ha pagbuhat hin milagro basi la matagbaw an iya panginahanglan. Salit waray hiya magpasulay.

Kondi waray umundang an Yawa. Naggamit hiya hin iba nga paagi. Gin-ayat niya hi Jesus nga lumayog ha pader han templo kay tatalwason man hiya han mga anghel han Dios. Pero waray masulay hi Jesus nga magpasikat. Ginkotar niya an Kasuratan basi ipakita nga sayop nga sarihan an Dios hini nga paagi.

Ha ikatulo nga pagsulay han Yawa, milagroso nga iginpakita niya kan Jesus an ngatanan nga ginhadian han kalibotan ngan nagsiring: “Ini ngatanan ihahatag ko ha imo kon lumuhod ka ngan magsingba ha akon bisan makausa la.” Pero waray na liwat masulay hi Jesus nga magbuhat hin sayop, lugod ginpili niya nga magin matinumanon ha Dios.

May hibabaroan kita ha mga pagsulay kan Jesus. Pananglitan, iginpapakita hito nga an Yawa diri kay usa la nga maraot nga kinaiya, sugad han ginsisiring han iba, kondi totoo hiya nga persona nga diri nakikita. Iginpapakita liwat hito nga an Yawa an tag-iya han ngatanan nga gobyerno ha kalibotan. Kay paonan-o magigin makakombinse ito nga pagsulay kon diri an Yawa an tag-iya han iya igintatanyag kan Jesus?

Hunahunaa liwat ini: An Yawa nagsiring nga andam hiya nga tagan hin premyo hi Jesus kon magsingba ha iya bisan makausa la, nga ihahatag pa ngani niya an ngatanan nga ginhadian han kalibotan. Bangin sulayon liwat kita han Yawa ha pariho nga paagi; posible nga tanyagan kita hin nakakaengganyo nga mga oportunidad nga magkaada hin damu nga kwarta, awtoridad, o katungdanan. Maaramon gud kita kon susubaron naton hi Jesus pinaagi ha pagpabilin nga matinumanon ha Dios ha bisan ano nga pagsulay! Mateo 3:16; 4:1-11; Marcos 1:12, 13; Lucas 4:1-13.

▪ Ano an posible nga ginpamalandong ni Jesus han nakadto hiya ha kamingawan hin 40 ka adlaw?

▪ Paonan-o ginsulay hi Jesus han Yawa?

▪ Ano an aton mahibabaroan ha mga pagsulay kan Jesus?